തിരുവനന്തപുരം: സയ്യിദ് മുഷ്തഖ് അലി ട്രോഫിയിൽ കേരളത്തിന് രണ്ടാം തോൽവി. കരുത്തരായ രാജസ്ഥാൻ ഏഴ് വിക്കറ്റിനാണ് കേരളത്തെ പരാജയപ്പെടുത്തിയത്. സഞ്ജു സാംസണിന്റെയും സച്ചിൻ ബേബിയുടെയും വെടിക്കെട്ട് ബാറ്റിങ്ങിൽ കേരളം ഉയർത്തിയ 165 റൺസ് വിജയലക്ഷ്യം മൂന്ന് ഓവർ ബാക്കി നിൽക്കെ മൂന്ന് വിക്കറ്റ് നഷ്ടപ്പെടുത്തി രാജസ്ഥൻ മറികടന്നു. അർധസെഞ്ചുറി നേടിയ രാജേഷ് ബിഷ്ണോയിയാണ് രാജസ്ഥാന്റെ വിജയശിൽപി.

തുടക്കം തകർച്ചയോടെയായിരുന്നെങ്കിലും നാലാം വിക്കറ്റിൽ ഒത്തുചേർന്ന രാജേഷ് ബിഷ്ണോയി – അർജിത് ഗുപ്ത സഖ്യം രാജസ്ഥാനെ വിജയത്തിലെത്തിക്കുകയായിരുന്നു. രാജേഷ് 51 പന്തിൽ 76 റൺസും അർജിത് 22 പന്തിൽ 44 റൺസുമെടുത്ത് പുറത്താകാതെ നിന്നു. കഴിഞ്ഞ മത്സരങ്ങളിൽ തിളങ്ങിയ കേരള പേസർമാരെ ഇരുവരും നിരന്തരം ബൗണ്ടറി കടത്തി. കെ.എം.ആസിഫ് മാത്രമാണ് കേരള ബോളിങ്ങിൽ ഭേദപ്പെട്ട പ്രകടനം പുറത്തെടുത്തത്.

Also Read: മായങ്ക് അഗർവാളിന് സെഞ്ചുറി, ലീഡ് ഉയർത്തി ഇന്ത്യ

നേരത്തെ ആദ്യം ബാറ്റ് ചെയ്ത കേരളത്തെ മികച്ച സ്കോറിലെത്തിച്ചത് സഞ്ജു സാംസണിന്റെ അർധ സെഞ്ചുറി പ്രകടനമാണ്. ഇന്ത്യൻ ക്യാംപിൽ നിന്ന് മടങ്ങിയെത്തിയ സഞ്ജു ഫോം തിരിച്ചുപിടിച്ചതോടെ കേരളം കുതിച്ചു. 39 പന്തിൽ 53 റൺസാണ് താരം നേടിയത്. 29 പന്തിൽ 47 റൺസുമായി സച്ചിൻ ബേബിയും മികച്ച പിന്തുണ നൽകി.

ഇന്നലെ നടന്ന മത്സരത്തിൽ കേരളം ശക്തരായ വിദർഭയെ പരാജയപ്പെടുത്തിയിരുന്നു. 26 റൺസിനാണ് കേരളം വിദർഭയെ പരാജയപ്പെടുത്തിയത്. കേരളം ഉയർത്തിയ 163 റൺസ് വിജയലക്ഷ്യം പിന്തുടർന്ന വിദർഭയ്ക്ക് നിശ്ചിത ഓവറിൽ 136 റൺസെടുക്കാനെ സാധിച്ചുള്ളൂ.

Get all the Latest Malayalam News and Kerala News at Indian Express Malayalam. You can also catch all the Sports News in Malayalam by following us on Twitter and Facebook