scorecardresearch

ബ്ലാസ്റ്റേഴ്‌സ് തങ്ങളോട് കളിച്ചിട്ടില്ലെന്ന് ബാങ്കോക്ക് എഫ്‌സി, പിന്നെ ജയിച്ചത് ആരോട്?

മത്സരം നടന്നിട്ടില്ല എന്ന് അറിയിച്ചുകൊണ്ട് ബാങ്കോക്ക് എഫ്‌സി മുന്നോട്ട് വന്നതോടെ കേരള ബ്ലാസ്റ്റേഴ്‌സ് തങ്ങളുടെ ട്വീറ്റ് ഒഴിവാക്കിയിട്ടുണ്ട്.

കൊച്ചി: ഇന്ത്യന്‍ സൂപ്പര്‍ ലീഗിന് മുന്നോടിയായി പ്രീ സീസണ്‍ മത്സരങ്ങള്‍ക്ക് തായ്‌ലന്‍ഡ് സന്ദര്‍ശിക്കുകയാണ് കേരള ബ്ലാസ്റ്റേഴ്‌സ്. വെള്ളിയാഴ്ച നടന്ന മത്സരത്തില്‍ ബാങ്കോക്ക് എഫ്സിയെ ഒന്നിനെതിരെ നാല് ഗോളുകള്‍ക്കെതിരെ പരാജയപ്പെടുത്തിയ വാര്‍ത്ത കേരളത്തില്‍ നിന്നുമുള്ള ടീം തന്നെ ട്വീറ്റ് ചെയ്തിരുന്നു. എന്നാല്‍ ബ്ലാസ്റ്റേഴ്‌സിന്റെ അവകാശവാദത്തെ നിഷേധിച്ച് വന്നിരിക്കുകയാണ് തായ് ക്ലബ്. തങ്ങള്‍ കേരള ബ്ലാസ്റ്റേഴ്സിനോട്‌ കളിച്ചില്ല എന്നാണ് ടീം വ്യക്തമാക്കുന്നത്. അങ്ങനെയെങ്കില്‍ കേരള ബ്ലാസ്റ്റേഴ്സ് കളിച്ചത് ആരോട് എന്നാണ് ആരാധകരുടെ ചോദ്യം.

ബാങ്കോക്ക് മൂന്നാം ഡിവിഷന്‍ ക്ലബ്ബിനെ മെന്‍ഷന്‍ ചെയ്ത് ബ്ലാസ്റ്റേഴ്സ് നടത്തിയ ട്വീറ്റ് ആണ് മത്സരത്തെ കുറിച്ചുള്ള സംശയത്തിലേക്ക് വഴിവയ്ക്കുന്നത്. തങ്ങള്‍ ബ്ലാസ്റ്റേഴ്സിനോട് കളിച്ചിട്ടില്ല എന്ന് അറിയിച്ചുകൊണ്ട് ബാങ്കോക്ക് എഫ്സി റിപ്ലൈ നല്‍കുകയായിരുന്നു.

ബാങ്കോക്ക് എഫ്‌സിയുടെ റിപ്ലൈ ട്വീറ്റ്

“നിങ്ങളുടെ പോസ്റ്റില്‍ നിന്നും ദയവായി ഞങ്ങളുടെ ലോഗോ ഒഴിവാക്കൂ. നിങ്ങള്‍ ബാങ്കോക്ക് എഫ്സിയോടല്ല, മറ്റേതോ ടീമിനോടാണ് പ്രീ സീസണ്‍ കളിച്ചത്” എന്നായിരുന്നു ബാങ്കോക്ക് എഫ്സിയുടെ മറുപടി ട്വീറ്റ്. ബാങ്കോക്ക് എഫ്സിയോടൊപ്പമുള്ള മത്സരം എന്ന പേരില്‍ ബ്ലാസ്റ്റേഴ്സ് ഇട്ട ഫെയ്സ്ബുക്ക് പോസ്റ്റിലും ബാങ്കോക്ക് എഫ്സി കമന്‍റ് ചെയ്തു.

ട്വീറ്റ് ഫുട്ബോള്‍ ആരാധകരുടെ ഇടയില്‍ പ്രചരിച്ച് തുടങ്ങിയതോടെ ഇന്ത്യന്‍ എക്‌സ്പ്രസ് മലയാളം ബാങ്കോക്ക് എഫ്സിയെ ബന്ധപ്പെടുകയായിരുന്നു. കേരള ബ്ലാസ്റ്റേഴ്സ് വിജയിച്ചതായി അവകാശപ്പെടുന്ന മത്സരം വ്യാജവാര്‍ത്തയാണ് എന്നായിരുന്നു ബാങ്കോക്ക് എഫ്സിയുടെ ആദ്യ പ്രതികരണം. ഇനി ബ്ലാസ്റ്റേഴ്സ് കളിച്ചത് ബാങ്കോക്ക് എഫ്സിയുടെ രണ്ടാം നിര ടീമിനോടോ മറ്റും ആണോ എന്നും ഇന്ത്യന്‍ എക്‌സ്പ്രസ് മലയാളം ആരാഞ്ഞു. ബാങ്കോക്ക് എഫ്സിയുടെ ഒരു ടീമിനോടും ഇന്ത്യയില്‍ നിന്നുമുള്ള ക്ലബ് പ്രീ സീസണ്‍ മത്സരത്തില്‍ ഏറ്റുമുട്ടിയിട്ടില്ല എന്നും ബ്ലാസ്റ്റേഴ്സ് പുറത്തുവിട്ട മത്സരം മറ്റേതോ ടീമിനോട്‌ ആയിരുന്നു എന്നും ബാങ്കോക്ക് എഫ്സി വിശദീകരിച്ചു.

ബാങ്കോക്ക് എഫ്‌സിയുടെ കമന്റ്

1999ല്‍ രൂപീകരിച്ച ക്ലബ്ബാണ്‌ ബാങ്കോക്ക് എഫ്‌സി. രണ്ട് പതിറ്റാണ്ടുകൾ കളിച്ചിട്ടും ഒരിക്കല്‍ പോലും തായ്‌ലന്‍ഡിലെ ഒന്നാം ലീഗായ തായ് ലീഗ് വണ്ണിലേക്ക് യോഗ്യത നേടാന്‍ അവര്‍ക്കായിട്ടില്ല. 2010ല്‍ രണ്ടാം ഡിവിഷനിൽ ഒന്നാമതെത്തിയത് അവരുടെ മികച്ച നേട്ടം. കഴിഞ്ഞ കുറെ വര്‍ഷങ്ങളായി മൂന്നാം ഡിവിഷനിലെ സ്ഥിരസാന്നിധ്യമാണ് ബാങ്കോക്ക് എഫ്സി.

മലയാളി താരമായ സഹല്‍, സെര്‍ബിയന്‍ താരം സ്ലാവിസ സ്റ്റോജനോവിച്ച്, ഷേയ്ബോര്‍സാങ് ഖാര്‍പ്പ എന്നിവര്‍ ഗോളുകള്‍ നേടി എന്നായിരുന്നു കേരള ബ്ലാസ്റ്റേഴ്സ് ഇന്നലെ ട്വീറ്റ് ചെയ്തത്. മത്സരം നടന്നിട്ടില്ല എന്ന് അറിയിച്ചുകൊണ്ട് ബാങ്കോക്ക് എഫ്‌സി മുന്നോട്ട് വന്നതോടെ കേരള ബ്ലാസ്റ്റേഴ്‌സ് തങ്ങളുടെ ട്വീറ്റ് ഒഴിവാക്കിയിട്ടുണ്ട്. ഫെയ്സ്ബുക്കിലെ പോസ്റ്റ്‌ ഇപ്പോഴും തുടരുന്നു.

Stay updated with the latest news headlines and all the latest Sports news download Indian Express Malayalam App.

Web Title: Kerala blasters pre season thailand bangkok fc wins

Best of Express