ലോകകപ്പിന് ശേഷം ക്രിക്കറ്റ് ലോകം വീണ്ടും ആവേശത്തിലേക്ക് ഉയര്‍ന്നിരിക്കുകയാണ്. ആഷസ് പരമ്പരയിലൂടെയാണ് ക്രിക്കറ്റ് ആവേശം വീണ്ടും സജീവമാകുന്നത്. പിന്നാലെ ഇന്ത്യയും വെസ്റ്റ് ഇന്‍ഡീസും തമ്മിലുള്ള പരമ്പര ഇന്ന് ആരംഭിക്കാനിരിക്കുന്നു. ഇതിനിടെ ആഷസ് പരമ്പരയേയും ഇന്ത്യന്‍ നായകന്‍ വിരാട് കോഹ്ലിയേയും കോര്‍ത്തിണക്കി കൊണ്ടുള്ള ന്യൂസിലന്‍ഡ് താരം ജിമ്മി നീഷമിന്റെ ട്വീറ്റ് വൈറലാവുകയാണ്.


ആഷസ് ടെസ്റ്റില്‍ തന്റെ കന്നി ടെസ്റ്റ് സെഞ്ചുറി നേടിയ ഇംഗ്ലീഷ് താരം റോറി ബേണ്‍സിനെ അഭിനന്ദിച്ചു കൊണ്ടുള്ള ട്വീറ്റാണ് വൈറലായത്. ബേണ്‍സിന് തന്റെ ആദ്യ ആഷസ് ഇന്നിങ്‌സില്‍ തന്നെ കോഹ് ലി മൊത്തം ആഷസില്‍ നേടിയതിനേക്കാള്‍ കൂടുതല്‍ റണ്‍സുണ്ടെന്നായിരുന്നു നീഷമിന്റെ ട്വീറ്റ്. സംഗതി സര്‍ക്കാസമായിരുന്നുവെങ്കിലും ഇന്ത്യന്‍ ആരാധകര്‍ക്ക് പിടിച്ചില്ല.


ട്വീറ്റിന് മറുപടിയുമായി കോഹ്ലി ആരാധകരെത്തി. കിവീസ് താരത്തെ ട്രോളിയും അധിക്ഷേപിച്ചും ആരാധകര്‍ തിരിച്ചടിച്ചു. എന്നാല്‍ ഒട്ടും പതറാതെ നീഷം മറുപടിയുമായെത്തി. താന്‍ പറഞ്ഞതിലെ തമാശ ഇന്ത്യന്‍ ആരാധകര്‍ക്ക് മനസിലായില്ലെന്നും കോഹ് ലിയ്ക്ക് ആഷസ് കളിക്കാന്‍ കഴിയില്ലെന്നും നീഷം വ്യക്താക്കി. ഇന്ത്യന്‍ ആരാധകരുടെ കമന്റുകള്‍ തേടിപ്പിടിച്ചാണ് നീഷം മറുപടി നല്‍കിയത്.

Get all the Latest Malayalam News and Kerala News at Indian Express Malayalam. You can also catch all the Sports News in Malayalam by following us on Twitter and Facebook