IPL 2023: ഭയക്കണം ഗുജറാത്തും ഹാര്‍ദിക്കും, കാരണം ചരിത്രം ചെന്നൈക്കൊപ്പം

IPL 2023: ഇന്ത്യന്‍ പ്രീമിയര്‍ ലീഗിന്റെ (ഐപിഎല്‍) പതിനാറാം സീസണിലെ കലാശപ്പോരില്‍ നാല് തവണ ചാമ്പ്യന്മാരായ ചെന്നൈ സൂപ്പര്‍ കിങ്സ് ഇന്ന് നിലവിലെ ജേതാക്കളായ ഗുജറാത്ത് ടൈറ്റന്‍സിനെ നേരിടും. അഹമ്മദാബാദിലെ നരേന്ദ്ര മോദി സ്റ്റേഡിയത്തില്‍ ഒരു ലക്ഷത്തിലധികം കാണികളായിരിക്കും ചെന്നൈ-ഗുജറാത്ത് പോരാട്ടം കാണാനെത്തുക.

ഐപിഎല്ലിന്റെ ചരിത്രത്തിലെ തന്നെ ഏറ്റവും മികച്ച ടീമുകളിലൊന്നാണ് ചെന്നൈ. 10 തവണ ഫൈനലിലെത്തുകയും നാല് തവണ കിരീടവും നേടി. ഗുജറാത്തും ഒട്ടും പിന്നിലല്ല. ലീഗിലെത്തിയ രണ്ടാം സീസണിലും ഫൈനലിലെത്തിയിരിക്കുയാണ് ഹാര്‍ദിക്കും സംഘവും.

ചെന്നൈയേക്കാള്‍ സന്തുലിതമായ ടീമാണ് ഗുജറാത്തെങ്കിലും അവരെ ഭയപ്പെടുത്തുന്ന ചില ചരിത്രങ്ങളുണ്ട്. 2011-ന് ശേഷം ക്വാളിഫയര്‍ ഒന്നില്‍ വിജയിച്ച ടീമാണ് 12 ഫൈനലില്‍ ഒന്‍പതെണ്ണത്തിലും വിജയിച്ചത്. അതിനാല്‍ തന്നെ ചെന്നൈക്കൊപ്പമാണ് ചരിത്രം.

ഇന്ന് വിജയം നേടാനായാല്‍ ഐപിഎല്ലിന്റെ ചരിത്രത്തില്‍ ഏറ്റവും കൂടുതല്‍ കിരീടം നേടുന്ന ടീമെന്ന റെക്കോര്‍ഡില്‍ മുംബൈ ഇന്ത്യന്‍സിന് ഒപ്പമെത്താനും ചെന്നൈക്കാകും. അഞ്ച് തവണയാണ് മുംബൈ ജേതാക്കളായത്.

ഐപിഎല്ലില്‍ 250 മത്സരം കളിക്കുന്ന ആദ്യ താരമെന്ന റെക്കോര്‍ഡാണ് ധോണിയെ കാത്തിരിക്കുന്നത്.

എന്നാല്‍ ഹാര്‍ദിക്കിന് മുന്നിലും ചില റെക്കോര്‍ഡുകള്‍ ഉണ്ട്. ഫൈനലില്‍ വിജയിച്ചാല്‍ ധോണിക്കും രോഹിത് ശര്‍മയ്ക്കും ശേഷം തുടര്‍ച്ചയായി രണ്ട് കിരീടങ്ങള്‍ നേടുന്ന നായകനാകാന്‍ ഹാര്‍ദിക്കിന് സാധിക്കും.