IPL 2019, SRH vs DC:ഇന്ത്യൻ പ്രീമിയർ ലീഗിൽ സൺറൈസേഴ്സ് ഹൈദരാബാദിനെതിരെ ഡൽഹി ക്യാപിറ്റൽസിന് വിജയം. 39 റൺസിനാണ് ഹൈദരാബാദിനെ ഡൽഹി പരാജയപ്പെടുത്തിയത്. ഡൽഹി ക്യാപിറ്റൽസ് ഉയർത്തിയ 156 റൺസ് വിജയലക്ഷ്യം പിന്തുടർന്ന ഹൈദരാബാദ് ഇന്നിങ്സ് 116 റൺസിൽ അവസാനിച്ചു. ഓപ്പണിങ് പിഴച്ചപ്പോൾ ടീം മൊത്തത്തിൽ പരാജയത്തിലേക്ക് നീങ്ങുകയായിരുന്നു.

ആദ്യം ബാറ്റ് ചെയ്ത ഡൽഹി ക്യാപിറ്റൽസ് നിശ്ചിത ഓവറിൽ ഏഴ് വിക്കറ്റ് നഷ്ടത്തിലാണ് 155 റൺസ് സ്വന്തമാക്കിയത്. ടോസ് നേടിയ ഹൈദരാബാദ് ഡൽഹിയെ ബാറ്റിങ്ങിനയക്കുകയായിരുന്നു. നായകൻ ശ്രേയസ് അയ്യരും കോളിൻ മുൻറോയും നടത്തിയ പ്രകടനമാണ് ഹൈദരാബാദ് ബോളിങ് നിരയ്ക്കെതിരെ ഭേദപ്പെട്ട സ്കോറിലെത്താൻ ഡൽഹിയെ സഹായിച്ചത്.

ടോസിൽ തന്നെ പിഴച്ച ഡൽഹിക്ക് ഇന്നിങ്സും തകർച്ചയോടെയായിരുന്നു. ടീം സ്കോർ 11ൽ നിൽക്കെ നാല് റൺസുമായി പൃഥ്വി ഷാ പുറത്ത്. ശിഖർ ധവാനും പിന്നീട് ഒന്നും ചെയ്യാൻ സാധിച്ചില്ല, ഏഴ് റൺസുമായി ധവാനും മടങ്ങി. പിന്നെ കണ്ടത് കോളിൻ മുൻറോ – ശ്രേയസ് അയ്യർ സഖ്യത്തിന്റെ രക്ഷാപ്രവർത്തനം. തകർത്തടിച്ച മുൻറോ സ്കോർ അതിവേഗം ഉയർത്തി. 40 റൺസുമായി മുൻറോ മടങ്ങിയപ്പോൾ അയ്യർക്ക് കൂട്ടായി പന്ത് എത്തി.

യുവതാരങ്ങൾ രണ്ടുപേരും ചേർന്ന് നന്നായി പൊരുതിയതോടെ ഡൽഹി തകർച്ച ഒഴിവാക്കി. അർധസെഞ്ചുറിക്ക് അഞ്ച് റൺസകലെ ശ്രേയസ് അയ്യരും, അടുത്ത ഓവറിൽ തന്നെ പന്തും പുറത്തായി. എന്നാൽ ഡൽഹി സ്കോർ അപ്പോഴേക്കും 127 ൽ എത്തിയിരുന്നു. ക്രസ് മോറിസും കീമോ പോളും ചെറിയ സ്കോറിൽ മടങ്ങിയെങ്കിലും പ്രതിരോധിക്കാവുന്ന സ്കോറിലേക്ക് ഡൽഹി എത്തിയിരുന്നു.

ഹൈദരാബാദിന് വേണ്ടി ഖലീൽ അഹമ്മദ് മൂന്ന് വിക്കറ്റ് വീഴ്ത്തി. ഭുവനേശ്വർ കുമാർ രണ്ട് വിക്കറ്റും സ്വന്തമാക്കി. നായകനായി കെയ്ൻ വില്ല്യംസൺ ഹൈദരാബാദ് നിരയിൽ മടങ്ങിയെത്തിയിട്ടുണ്ട്. കഴിഞ്ഞ മത്സരത്തിൽ നിന്നും നാല് മാറ്റങ്ങളുമായാണ് ഹൈദരാബാദ് ഇന്ന് ഇറങ്ങിയത്.

മറുപടി ബാറ്റിങ്ങിൽ മികച്ച തുടക്കമാണ് ഓപ്പണിങ് സഖ്യം ഹൈദരാബാദിന് നൽകിയത്. ഒരിക്കൽ കൂടി ഒന്നാം വിക്കറ്റിൽ അർധസെഞ്ചുറി കൂട്ടുകെട്ട് തീർത്ത വാർണറും ബെയർസ്റ്റോയും ഹൈദരാബാദ് ജയത്തിലേക്ക് എന്ന് തന്നെ തോന്നിപ്പിച്ചു. 41 റൺസിൽ ബെയർസ്റ്റോ പുറത്തായെങ്കിലും ഹൈദരാബാദ് പ്രതീക്ഷ കൈവിട്ടില്ല. ഡേവിഡ് വാർണർ അർധസെഞ്ചുറി തികയ്ക്കുകയും ചെയ്തു.

എന്നാൽ ഡേവിഡ് വാർണർ പുറത്തായതിന് പിന്നാലെ ചീട്ടുകൊട്ടാരം പോലെ തകർന്നടിയുകയായിരുന്നു ഹൈദരാബാദ്. 16-ാം ഓവറിൽ അടുത്തടുത്ത പന്തുകളിൽ രണ്ട് വിക്കറ്റ് വീഴ്ത്തി റബാഡ ഹൈദരാബാദ് പതനത്തിന് തുടക്കം കുറിച്ചു. അടുത്ത ഓവറിൽ ക്രിസ് മോറിസ് വീഴ്ത്തിയത് മൂന്ന് വിക്കറ്റ്. 18-ാം ഓവറിൽ വീണ്ടും രണ്ട് വിക്കറ്റുകൾ വീഴ്ത്തി റബഡ ഹൈദരാബാദ് പതനം പൂർത്തിയാക്കുകയും ചെയ്തു.

റബാഡ നാല് വിക്കറ്റ് വീഴ്ത്തിയപ്പോൾ ക്രിസ് മോറിസ്, കീമോ പോൾ എന്നിവർ മൂന്ന് വീതം വിക്കറ്റും വീഴ്ത്തി. മൂന്ന് ഹാട്രിക് ചാൻസുകളാണ് മത്സരത്തിൽ പിറന്നത്. ഓപ്പണേഴ്സ് ഒഴികെ മറ്റാർക്കും രണ്ടക്കം കടക്കാൻ പോലും ഹൈദരാബാദ് നിരയിൽ സാധിച്ചില്ല.