IPL 2019 SRH vs CSK Live Updates: ധോണിയില്ലാതെ ഇറങ്ങിയ ചെന്നൈ സൂപ്പര്‍ കിങ്‌സിനെതിരെ സണ്‍റൈസേഴ്‌സ് ഹൈദാരാബാദിന് ആറ് വിക്കറ്റ് വിജയം. ഒരിക്കല്‍ കൂടി വാര്‍ണര്‍-ബെയര്‍സ്‌റ്റോ ജോഡിയുടെ പ്രകടനമാണ് ഹൈദരാബാദിന് അനായാസ വിജയം നേടി കൊടുത്തത്. മൂന്ന് ഓവറും ഒരു പന്തും ബാക്കി നില്‍ക്കെയായിരുന്നു ഹൈദരാബാദിന്റെ വിജയം.

ചെന്നൈ ഉയര്‍ത്തിയ 133 റണ്‍സിന്റെ ലക്ഷ്യം പിന്തുടര്‍ന്നിറങ്ങിയ ഹൈദരാബാദിനായി വാര്‍ണറും ബെയര്‍സ്‌റ്റോയും മികച്ച തുടക്കമാണ് സമ്മാനിച്ചത്. വാര്‍ണര്‍ 50 റണ്‍സ് നേടി പുറത്തായി. ഇതോടെ ആക്രമണ ചുമതല ബെയര്‍സ്‌റ്റോ ഏറ്റെടുക്കുകയായിരുന്നു. മൂന്ന് സിക്‌സും ഫോറും നേടിയ ബെയര്‍സ്‌റ്റോ 61 റണ്‍സ് നേടി. ഹൈദരാബാദിനെ വിജയത്തിലേക്ക് എത്തിച്ച സിക്‌സും ഇതിലുള്‍പ്പെടും.

അഞ്ച് വിക്കറ്റ് നഷ്ടത്തില്‍ 132 റണ്‍സുമായാണ് ചെന്നൈ കളി അവസാനിപ്പിച്ചത്. മികച്ച തുടക്കം ലഭിച്ചിട്ടും അതു മുതലാക്കാന്‍ കഴിയാതെ പോയതാണ് ചെന്നൈയ്ക്ക് വിനയായത്.

ടോസ് നേടിയ ചെന്നൈ ബാറ്റ് ചെയ്യാന്‍ തീരുമാനിക്കുകയായിരുന്നു. ഓപ്പണര്‍മാരായ ഡുപ്ലെസിസും വാട്‌സണും മികച്ച തുടക്കമാണ് സമ്മാനിച്ചത്. വാട്‌സണ്‍ 31 റണ്‍സും ഡുപ്ലെസിസ് 45 റണ്‍സും നേടി. പിന്നാലെ വന്നവരാരും പ്രതീക്ഷക്ക് ഒത്തുയര്‍ന്നില്ല. അമ്പട്ടി റായിഡു 25 റണ്‍സ് നേടി. നായകന്‍ സുരേഷ് റെയ്‌ന 13 റണ്‍സാണ് കൂട്ടിച്ചേര്‍ത്തത്.

സണ്‍ റൈസേഴ്‌സ് ബോളര്‍മാരില്‍ തിളങ്ങിയത് രണ്ട് വിക്കറ്റെടുത്ത റാഷിദ് ഖാനാണ്. നദീമും വിജയ് ശങ്കറും ഖലീല്‍ അഹമ്മദും ഓരോ വിക്കറ്റ് വീതം നേടി.