IPL 2019 RR vs RCB: ബെംഗളൂരു: മഴ വില്ലനായ മത്സരത്തില്‍ ഭാഗ്യക്കേടും ഗതി നിയന്ത്രിച്ചപ്പോള്‍ രാജസ്ഥാന്‍ റോയല്‍സ്-റോയല്‍ ചലഞ്ചേഴ്സ് മത്സരം ഫലം കാണാതെ അവസാനിച്ചു. റോയല്‍ ചലഞ്ചേഴ്സ് ഉയർത്തിയ 68 റണ്‍സിന്റെ വിജയ ലക്ഷ്യം രാജസ്ഥാന്‍ പിന്തുടരുന്നതിനിടെ മഴ വീണ്ടും വന്നതോടെയാണ് കളി അവസാനിപ്പിച്ചത്.

ഇതോടെ രണ്ട് ടീമുകളും ഓരോ പോയന്റ് വീതം ലഭിച്ചു. ഈ പോയന്റെ കരുത്തില്‍ രാജസ്ഥാന്‍ പോയന്റ് പട്ടികയില്‍ അഞ്ചാമതെത്തി. എട്ടാമതുള്ള ബെംഗളൂരുവിന് 9 പോയന്റുമായി.

ടോസിന് പിന്നാലെ തന്നെ ബെംഗളൂരുവില്‍ കനത്ത മഴ ആരംഭിക്കുകയായിരുന്നു. പതിവിലും സമയം പിന്നിട്ടതോടെ കളി ഉപേക്ഷിക്കുമെന്ന് ആരാധകര്‍ പ്രതീക്ഷിച്ചെങ്കിലും 11.20 ഓടെ കളി പുനരാരംഭിക്കുകയായിരുന്നു. അഞ്ച് ഓവറാക്കി ചുരുക്കിയ മത്സരത്തില്‍ ബെംഗളൂരുവിനായി നായകന്‍ വിരാട് കോഹ്ലിയും എബി ഡിവില്യേഴ്‌സുമാണ് ഓപ്പണിങ് ഇറങ്ങിയത്.

ആദ്യ പന്തു മുതല്‍ തന്നെ കോഹ്ലി നയം വ്യക്തമാക്കിയിരുന്നു. വരുണ്‍ ആരോണ്‍ എറിഞ്ഞ ആദ്യ രണ്ട് പന്തും കോഹ്ലി സിക്‌സ് പറത്തി. കോഹ്ലിയും ഡിവില്യേഴ്‌സും ചേര്‍ന്ന് ബെംഗളൂരുവിനെ 35 റണ്‍സിലെത്തിച്ചു. എന്നാലെ രണ്ടാം ഓവറില്‍ ഹാട്രിക്ക് വിക്കറ്റിലൂടെ ശ്രേയസ് ഗോപാല്‍ രാജസ്ഥാന്റ രക്ഷകനായി മാറി. വിരാട് കോഹ്ലി, ഡിവില്യേഴ്‌സ്, മാര്‍ക്കസ് സ്‌റ്റോയ്‌നിസ് എന്നീ വന്‍ വിക്കറ്റുകളാണ് ശ്രേയസ് നേടിയത്.

പിന്നാലെ വന്നവരാരും രണ്ടക്കം കടന്നില്ല. കോഹ്ലി 25 റണ്‍സും ഡിവില്യേഴ്‌സ് 10 റണ്‍സുമാണ് നേടിയത്. രാജസ്ഥാനായി ശ്രേയ്‌സ് മൂന്ന് വിക്കറ്റ് നേടിയപ്പോള്‍ ഓഷാനെ തോമസ് രണ്ട് വിക്കറ്റും റിയാന്‍ പരാഗും ജയ്‌ദേവ് ഉനദ്കട്ടും ഓരോ വിക്കറ്റ് വീതവും വീഴത്തി.

സഞ്ജു സാംസണും ലിവിങ്സ്റ്റണുമാണ് രാജസ്ഥാനായി ഇന്നിങ്സ് ഓപ്പണ്‍ ചെയ്തത്. വെടിക്കെട്ട് പ്രകടനം കാഴ്ച്ച വച്ച സഞ്ജു 13 പന്തില്‍ 28 റണ്‍സ് നേടി. പിന്നാലെ മഴ വീണ്ടും വില്ലനായി എത്തുകയായിരുന്നു. നായകന്‍ സ്മിത്ത് ഒരു പന്ത് പോലും നേരിട്ടിട്ടുണ്ടായിരുന്നില്ല അപ്പോള്‍. സ്കോർ 41-1 എന്ന നിലയിലായിരുന്നു.

Get all the Latest Malayalam News and Kerala News at Indian Express Malayalam. You can also catch all the Sports News in Malayalam by following us on Twitter and Facebook