IPL 2019 KXIP vs SRH Live Updates:അനായാസ വിജയം പ്രതീക്ഷിച്ചിറങ്ങിയ പഞ്ചാബിനെതിരെ പൊരുതി തോറ്റ് ഹൈദരാബാദ്. അവസാന ഓവറില്‍ ഒരു പന്ത് ബാക്കി നില്‍ക്കെയായിരുന്നു പഞ്ചാബിന്റെ വിജയം. തുടക്കത്തില്‍ തന്നെ പഞ്ചാബ് മേല്‍ക്കൈ നേടിയിരുന്നുവെങ്കിലും അവസാന നിമിഷം വിക്കറ്റുകള്‍ നഷ്ടമാവുകയും ഹൈദരാബാദ് മനോഹരമായി പന്തെറിയുകയും ചെയ്തതോടെ കളി ആവേശകരമായ അന്ത്യത്തിലേക്ക് നീങ്ങുകയായിരുന്നു.

ഓപ്പണര്‍ കെഎല്‍ രാഹുലാണ് പഞ്ചാബിന്റെ ടോപ് സ്‌കോറര്‍. രാഹുല്‍ 53 പന്തില്‍ 71 റണ്‍സാണ് നേടിയത്. ഇതില്‍ ഏഴ് ഫോറും ഒരു സിക്‌സുമുള്‍പ്പെടും. രാഹുലും മായങ്കും തമ്മിലുള്ള കൂട്ടുകെട്ടാണ് പഞ്ചാബിന് നിര്‍ണായകമായി മാറിയത്. മായങ്ക് 43 പന്തില്‍ 55 റണ്‍സ് നേടി. മൂന്ന് സിക്‌സും മൂന്ന് ഫോറും അടങ്ങുന്നതായിരുന്നു മായങ്കിന്റെ ഇന്നിങ്‌സ്.

ഹൈദരാബാദ് ബോളര്‍മാരില്‍ തിളങ്ങിയത് രണ്ട് വിക്കറ്റടുത്ത സന്ദീപ് ശര്‍മ്മയാണ്. റാഷിദ് ഖാനും സിദ്ധാര്‍ത്ഥ് കൗളും ഓരോ വിക്കറ്റ് വീതം നേടി.

ഡേവിഡ് വാര്‍ണറുടെ ചെറുത്തു നില്‍പ്പാണ് കിങ്‌സ് ഇലവന്‍ പഞ്ചാബിനെതിരെ സണ്‍റൈസേഴ്‌സ് ഹൈദരാബാദിന് പൊരുതാവുന്ന സ്‌കോര്‍ സമ്മാനിച്ചത്. 20 ഓവറില്‍ 150 റണ്‍സുമായാണ് ഹൈദരാബാദ് ഇന്നിങ്‌സ് അവസാനിപ്പിച്ചത്. റണ്‍ ഒഴുകുന്നത് തടയാനായെങ്കിലും വിക്കറ്റുകള്‍ വീഴ്ത്താന്‍ പഞ്ചാബിന് സാധിച്ചില്ല. നാല് ഹൈദരാബാദ് ബാറ്റ്‌സ്ന്മാന്മാരെ മാത്രമാണ് പഞ്ചാബ് പുറത്താക്കിയത്.

ഓപ്പണര്‍ ജോണി ബെയര്‍സ്‌റ്റോയെ ഹൈദരാബാദിന് തുടക്കത്തില്‍ തന്നെ നഷ്ടമായിരുന്നു. 62 പന്തുകളില്‍ നിന്നും വാര്‍ണര്‍ 70 റണ്‍സുമായി ടീമിനെ മുന്നില്‍ നിന്നു നയിക്കുകയായിരുന്നു. വിജയ് ശങ്കര്‍ 26 റണ്‍സും നേടി. അവസാന മൂന്ന് പന്തില്‍ 14 റണ്‍സ് നേടിയ ദീപക് ഹൂഡയും തിളങ്ങി. ഇതോടെയാണ് പൊരുതാവുന്ന സ്‌കോറില്‍ ഹൈദരാബാദ് എത്തിയത്. പഞ്ചാബ് ബോളര്‍മാരില്‍ മുജീബും ഷമിയും അശ്വിനും ഓരോ വിക്കറ്റ് വീതം വീഴ്ത്തി.