ഐപിഎല്ലിലെ വലിയ വിവാദമായി മാറിയിരിക്കുകയാണ് അശ്വിന്റെ മങ്കാദിങ്. രാജസ്ഥാന്‍ റോയല്‍സിനെതിരെയുള്ള കളിയിലായിരുന്നു അശ്വിന്‍ മങ്കാദിങ്ങിലൂടെ ജോസ് ബട്‌ലറെ പുറത്താക്കിയത്. കളിയുടെ ഗതി തന്നെ മാറ്റുകയും ഒടുവില്‍ പഞ്ചാബിനെ വിജയികളാക്കുകയും ചെയ്ത ആ നീക്കം ക്രിക്കറ്റ് ലോകത്ത് വന്‍ ചര്‍ച്ചയായി മാറി. അശ്വിനെ അനുകൂലിച്ചും എതിര്‍ത്തും ആരാധകര്‍ രണ്ട് ചേരികളായി മാറി. ഇന്ന് അതേ അശ്വിനെ തന്നെ കാഴ്ചക്കാരനാക്കി മങ്കാദിങിനുള്ള അവസരം ലഭിച്ചിട്ടും അതിന് മുതിരാതെ മാന്യതയുടെ മുഖമായി മാറിയിരിക്കുകയാണ് ക്രുണാല്‍ പാണ്ഡ്യ.

മുംബൈ ഉയര്‍ത്തിയ 177 റണ്‍സിന്റെ വിജയ ലക്ഷ്യം പിന്തുടര്‍ന്നിറങ്ങിയ പഞ്ചാബിന്റെ സ്‌കോര്‍ 80 ലെത്തി നില്‍ക്കുമ്പോഴായിരുന്നു സംഭവം. കെഎല്‍ രാഹുലായിരുന്നു ക്രീസില്‍. പന്തെറിയാനായി ക്രുണാല്‍ റണ്‍ അപ്പെടുത്ത് വരുമ്പോഴേക്കും നോണ്‍ സ്‌ട്രൈക്കര്‍ എന്‍ഡിലുണ്ടായിരുന്ന മായങ്ക് ക്രീസ് വിട്ടിരുന്നു. എന്നാല്‍ മങ്കാദിങിന് മുതിരാതെ ക്രുണാല്‍ മായങ്കിന് വാണിങ് നല്‍കി മടങ്ങുകയായിരുന്നു. ആ സമയം മായങ്ക് 19 റണ്‍സ് മാത്രമേ എടുത്തിരുന്നുള്ളൂ. പിന്നീട് 43 റണ്‍സുമായാണ് മായങ്ക് കളം വിട്ടത്.

ക്രിക്കറ്റിലെ മാന്യത മറന്ന് ക്രുണാല്‍ മായങ്കിനെ പുറത്താക്കിയിരുന്നുവെങ്കില്‍ മുംബൈയ്ക്ക് ഒരുപക്ഷെ ജയിക്കാന്‍ വരെ സാധിക്കുമായിരുന്നുവെന്നും എന്നാല്‍ ക്രുണാല്‍ മാന്യനാണെന്നുമാണ് ആരാധകര്‍ പറയുന്നത്. ഇതിനെ ചൊല്ലി സോഷ്യല്‍ മീഡിയയിലും ചര്‍ച്ച ആരംഭിച്ചിട്ടുണ്ട്.

Get Malayalam News and latest news update from India and around the world. Stay updated with today's latest Sports news in Malayalam at Indian Expresss Malayalam.

ഏറ്റവും പുതിയ വാർത്തകൾക്കും വിശകലനങ്ങൾക്കും ഞങ്ങളെ ഫെയ്സ്ബുക്കിലും ട്വിറ്ററിലും ലൈക്ക് ചെയ്യൂ