IPL 2019, Delhi Capitals vs Kolkata Knight Riders Live Score: കൊൽക്കത്തയെ രണ്ടാം മത്സരത്തിലും പരാജയപ്പെടുത്തി ഡൽഹി ക്യാപിറ്റൽസ്. ഡൽഹിയിലെ തോൽവിയ്ക്ക് സ്വന്തം മണ്ണിൽ പകരം വീട്ടാനിറങ്ങിയ കൊൽക്കത്തയെ ധവാന്റെയും ഋഷഭ് പന്തിന്റെയും വെടിക്കെട്ട് ബാറ്റിങ് മികവിലാണ് ഡൽഹി വീണ്ടും പരാജയപ്പെടുത്തിയത്. ആദ്യം ബാറ്റ് ചെയ്ത കൊൽക്കത്ത 179 റൺസിന്റെ വിജയലക്ഷ്യമാണ് ഡൽഹിയ്ക്ക് മുന്നിൽ ഉയർത്തിയത്. ഡൽഹി 19-ാം ഓവറിൽ ലക്ഷ്യം മറികടക്കുകയായിരുന്നു.

നിശ്ചിത ഓവറിൽ ഏഴ് വിക്കറ്റ് നഷ്ടത്തിലാണ് 178 എന്ന മികച്ച സ്കോറിലേക്ക് കൊൽക്കത്ത എത്തിയത്. യുവതാരം ശുഭ്മാൻ ഗില്ലും വെടിക്കെട്ട് ബാറ്റ്സ്മാൻ ആന്ദ്രെ റസലും തകർത്തടിച്ചപ്പോൾ കൊൽക്കത്ത സ്കോർബോർഡ് ഉയരുകയായിരുന്നു.

ആദ്യ പന്തിൽ തന്നെ ജോ ഡെൻലിയെ മടക്കിയ ഇഷാന്ത് ശർമ്മയുടെ തീപാറുന്ന പന്തിലായിരുന്നു മത്സരത്തിന്റെ തുടക്കം. ഡെൻലിയുടെ വിക്കറ്റ് കൊൽക്കത്തയെ സമ്മർദ്ദത്തിലാക്കിയെങ്കിലും റോബിൻ ഉത്തപ്പയ്ക്കൊപ്പം ചേർന്ന് ശുഭ്മാൻ ആഞ്ഞടിച്ചതോടെ കൊൽക്കത്ത മത്സരത്തിലേക്ക് തിരിച്ചു വന്നു. 28 റൺസെടുത്ത ഉത്തപ്പ പുറത്തായതിന് പിന്നാലെ ക്രീസിലെത്തിയ നിതീഷ് റാണയും 11 റൺസിൽ മടങ്ങിയെങ്കിലും ശുഭ്മാൻ ക്രീസിൽ നിലയുറപ്പിച്ചു.

അർധ സെഞ്ചുറി തികച്ചതിന് പിന്നാലെ ശുഭ്മാനും മടങ്ങിയതോടെ കൊൽക്കത്ത മധ്യനിര തകർച്ചയുടെ വക്കിലെത്തി. ദിനേശ് കാർത്തിക്കിന്റെ വിക്കറ്റ് ആഘാതം വർധിപ്പിച്ചു. എന്നാൽ പിന്നീട് ബാറ്റിങ് ഉത്തരവാദിത്വം ഏറ്റെടുത്ത ആന്ദ്രെ റസൽ ആഞ്ഞടിക്കുകയായിരുന്നു. ശുഭ്മാൻ 65 റൺസും റസൽ 45 റൺസുമെടുത്താണ് ക്രീസ് വിട്ടത്.

മറുപടി ബാറ്റിങ്ങിൽ ഡൽഹിയുടെ തുടക്കം ഭേദപ്പെട്ടതായിരുന്നു. ടീം സ്കോർ 32ൽ നിൽക്കെ പൃഥ്വി ഷായുടെയും 57 എത്തിയപ്പോൾ ശ്രേയസ് അയ്യരുടെയും വിക്കറ്റുകൾ വീണെങ്കിലും ഡൽഹി വിജയത്തിലേക്ക് കുതിച്ചു. മൂന്നാം വിക്കറ്റിൽ ഋഷഭ് പന്തിനൊപ്പം ചേർന്ന് ശിഖർ ധവാൻ തകർത്തടിച്ചതോടെ കൊൽക്കത്ത പരാജയം മുന്നിൽ കണ്ടു. മൂന്നാം വിക്കറ്റിൽ സെഞ്ചുറി കൂട്ടുകെട്ട് തീർത്ത ശേഷമാണ് പന്ത് കളം വിട്ടത്. അർധസെഞ്ചുറിയ്ക്ക് നാല് റൺസ് അകലെയായിരുന്നു പന്ത് പവലിനേക്ക് മടങ്ങിയത്.

ധവാൻ സെഞ്ചുറിയിലേക്ക് മുന്നേറുമെന്ന് തോന്നിച്ചു. എന്നാൽ ഡൽഹി ആരാധകർക്ക് അതും കാണാൻ സാധിച്ചില്ല. അതിന് മുമ്പ് കോളിന ഇൻഗ്രാം ഡൽഹിയെ ജയത്തിലെത്തിച്ചു. മൂന്ന് റൺസ് അകലെ സെഞ്ചുറി നഷ്ടമായെങ്കിലും പുറത്താകാതെ ഒറ്റയാൾ പോരാട്ടം നടത്തിയ ധവാൻ ഡൽഹിക്ക് ധമാക്ക വിജയം സമ്മാനിച്ചു. പതിനൊന്ന് ഫോറും രണ്ട് സിക്സും ഉൾപ്പടെയാണ് ധവാൻ 97 റൺസ് നേടിയത്.