ഒളിമ്പിക്സിന് വേദിയൊരുക്കാൻ താൽപര്യം അറിയിച്ച് ഇന്ത്യ. 2032ൽ നടക്കുന്ന ഒളിമ്പിക്സിന് വേദിയാകാനുള്ള താൽപര്യം ഇന്ത്യ ഔദ്യോഗികമായി രാജ്യാന്തര ഒളിമ്പിക് കമ്മിറ്റിയെ അറിയിച്ചു. നേരത്തെ ഇന്ത്യയിലെത്തിയ രാജ്യാന്തര ഒളിമ്പിക് കമ്മിറ്റി തലവൻ തോമസ് ബാക്കിനോട് ഇന്ത്യൻ ഒളിമ്പിക് അസ്സോസിയേഷൻ താൽപര്യം അറിയിച്ചിരുന്നു. ഇന്ത്യയുടെ നീക്കത്തെ അന്ന് അദ്ദേഹം സ്വാഗതം ചെയ്യുകയും ചെയ്തു.

ഇതിന് പിന്നാലെയാണ് 2032 ഒളിമ്പിക്സിന് വേദിയാകാൻ ഔദ്യോഗികമായി ഇന്ത്യ താൽപര്യം കാണിച്ച് രംഗത്തെത്തിയത്. ഇന്ത്യൻ ഒളിമ്പിക് അസ്സോസിയേഷൻ സെക്രട്ടറി ജനറൽ രാജീവ് മേത്ത ഐഒസിയുടെ മൂന്നംഗ ബിഡ് കമ്മിറ്റിയുമായി ടോക്കിയോയിൽ കൂടിക്കാഴ്ച നടത്തുകയും ചെയ്തിരുന്നു.

ബിഡ് കമ്മിറ്റിയിൽ നിന്ന് അനുകൂല പ്രതികരണം കിട്ടിയതോടെ കേന്ദ്ര കായികമന്ത്രാലയത്തെ സമീപിക്കാൻ ഒരുങ്ങുകയാണ് ഇന്ത്യൻ ഒളിമ്പിക് അസ്സോസിയേഷൻ. 2022ലാണ് 2032 ഒളിമ്പിക് വേദി തീരുമാനിക്കുന്നതുമായി ബന്ധപ്പെട്ട നടപടികൾ ആരംഭിക്കുന്നത്. ഇന്ത്യയ്ക്ക് പുറമെ ഇന്തോനേഷ്യയും താൽപര്യം അറിയിച്ച് കഴിഞ്ഞു. കഴിഞ്ഞ ഏഷ്യൻ ഗെയിംസിനും ഇന്തോനേഷ്യയായിരുന്നു വേദിയായത്.

ചൈനയും ഓസ്ട്രേലിയയും വേദിക്കായി ശ്രമിക്കുമെന്നുള്ള വാർത്തകളും സജീവമാണ്. 2025ലാണ് ഔദ്യോഗികമായി വേദി പ്രഖ്യാപിക്കുന്നത്. മുംബൈയിലോ ഡൽഹിയിലോ ഒളിമ്പിക്സിന് വേദിയൊരുക്കാനാണ് ഇന്ത്യ ശ്രമിക്കുന്നത്.

Get all the Latest Malayalam News and Kerala News at Indian Express Malayalam. You can also catch all the Sports News in Malayalam by following us on Twitter and Facebook