ഇംഗ്ലണ്ടിനെതിരായ ആദ്യ ഏകദിന മത്സരത്തിൽ ഇന്ത്യയ്ക്ക് തകർപ്പൻ ജയം. 67 രൺസിനാണ് ഇന്ത്യ സന്ദർശകരെ പരാജയപ്പെടുത്തിയത്. ഇന്ത്യ ഉയർത്തിയ 203 റൺസെന്ന ചെറിയ വിജയലക്ഷ്യം പിന്തുടർന്ന ഇംഗ്ലണ്ടിന് 41 ഓവറിൽ 136 റൺസെടുക്കാനെ സാധിച്ചുള്ളു. നാല് ഇംഗ്ലിഷ് വിക്കറ്റുകൾ പിഴുത എക്ത ബിഷ്താണ് ഇന്ത്യയ്ക്ക് അനായാസ വിജയം സമ്മാനിച്ചത്. മൂന്ന് ഇംഗ്ലണ്ട് താരങ്ങളെയാണ് എക്ത പൂജ്യം റൺസിന് പുറത്താക്കിയത് അതും ഒരു ഓവറിൽ.

ടോസ് നഷ്ടപ്പെട്ട് ബാറ്റിങ്ങിനിറങ്ങിയ ഇന്ത്യയ്ക്കും കാര്യങ്ങൾ അത്ര എളുപ്പമായിരുന്നില്ല. ആദ്യം ബാറ്റ് ചെയ്ത ഇന്ത്യ 49.4 ഓവറിൽ 202 റൺസിന് എല്ലാവരും പുറത്താവുകയായിരുന്നു. മധ്യനിരയുടെ തകർച്ചയാണ് ഇന്ത്യൻ സ്കോർ കുറയാൻ കാരണം. മധ്യനിരയിൽ നായിക മിതാലി രാജിനല്ലാതെ മറ്റാർക്കും തിളങ്ങാനായില്ല.

ഇന്ത്യയ്ക്ക് മികച്ച തുടക്കമാണ് ഓപ്പണർമാരായ ജെമിമ റോഡ്രിഗസും സ്‌മൃതി മന്ദാനയും ചേർന്ന് നൽകിയത്. സ്കോർ 69ൽ നിൽക്കെ 24 റൺസുമായി മന്ദാന മടങ്ങിയതിന് പിന്നാലെ അർധ സെഞ്ചുറിയ്ക്ക് അരികിൽ ജെമിമയും വീണു. 58 പന്തിൽ നിന്ന് എട്ട് ബൗണ്ടറിയുൾപ്പടെ 48 റൺസാണ് ജെമിമ നേടിയത്. ഇതോടെ ഇന്ത്യ സമ്മർദ്ദത്തിലായി. മധ്യ നിര പൂർണമായും തകർന്നു.

എന്നാൽ മിതാലി രാജ് ഒരറ്റത്ത് മികച്ച ചെറുത്തുനിൽപ്പ് നടത്തിയതോടെ ഇന്ത്യ പതിയെ സ്കോർ ചലിപ്പിച്ചു. താനിയ ഭാട്ടിയായും ജൂലൻ ഗോസ്വാമിയും പൊരുതി നോക്കിയെങ്കിലും ക്രീസിൽ നിലയുറപ്പിക്കാൻ സാധിച്ചില്ല. 74 പന്തിൽ നിന്ന് 44 റൺസ് നേടി മിതാലിയും മടങ്ങിയതോടെ ഇന്ത്യ ചെറിയ സ്കോറിലേയ്ക്ക് ചുരുങ്ങി. അവസാന മൂന്ന് ഓവറുകളിലും ഓരോ വിക്കറ്റ് വീതം വീഴ്ത്തി ഇംഗ്ലണ്ട് 202 റൺസിന് ഇന്ത്യയെ പുറത്താക്കുകയായിരുന്നു.

മറുപടി ബാറ്റിങ്ങിൽ ഇംഗ്ലണ്ടിന് തുടക്കം മുതൽ പിഴച്ചു. ടീം സ്കോർ അഞ്ചിൽ നിൽക്കെ എമി എലനെ നഷ്ടപ്പെട്ടുകൊണ്ടായിരുന്നു തുടക്കം. പിന്നീട് കൃത്യമായ ഇടവേളകളിൽ ഇന്ത്യൻ താരങ്ങൾ ഇംഗ്ലീഷ് വനിതകളെ കൂടാരം കയറ്റി. നായിക ഹീത്തർ നൈറ്റും നഥാലിയും ക്രീസിൽ നിലയുറപ്പിക്കാൻ ശ്രമിച്ചെങ്കിലും കാര്യമായ വിജയം കണ്ടില്ല. വാലറ്റം ചീട്ടുകൊട്ടാരം പോലെ തകർന്നടിഞ്ഞതോടെ പരമ്പരയിലെ ആദ്യ ജയം ഇന്ത്യയ്ക്ക്.

ഇന്ത്യയ്ക്ക് വേണ്ടി എക്ത ബിഷത് നാല് വിക്കറ്റ് വീഴ്ത്തി. 41-ാം ഓവറിന്റെ രണ്ടാം പന്തിൽ അന്ന്യയെയും മൂന്നാം പന്തിൽ സോഫിയെയും പുറത്താക്കിയ എക്ത എന്നാൽ അടുത്ത പന്തിൽ ഹാട്രിക് നഷ്ടപ്പെടുത്തി. അതേ ഓവറിന്റെ അവസാന പന്തിൽ ഹാർട്‌ലിയെ പുറത്താക്കി എക്ത ഇന്ത്യയ്ക്ക് വിജയവും സമ്മാനിച്ചു. ശിഖ പാണ്ഡെ, ദീപ്തി ശർമ്മ എന്നിവർ രണ്ട് വിക്കറ്റ് വീതവും മത്സരത്തിൽ വീഴ്ത്തി. മത്സരത്തിൽ എട്ട് ഓവറെറിഞ്ഞ മുതിർന്ന താരം ജൂലൻ ഗോസ്വാമി 19 റൺസ് മത്രം വിട്ടുനൽകി ഒരു വിക്കറ്റും വീഴ്ത്തി.

Get Malayalam News and latest news update from India and around the world. Stay updated with today's latest Sports news in Malayalam at Indian Expresss Malayalam.

ഏറ്റവും പുതിയ വാർത്തകൾക്കും വിശകലനങ്ങൾക്കും ഞങ്ങളെ ഫെയ്സ്ബുക്കിലും ട്വിറ്ററിലും ലൈക്ക് ചെയ്യൂ