Latest News

India vs South Africa 2nd Test: എൽഗാറിന്റെ കരുത്തിൽ ദക്ഷണാഫ്രിക്കയ്ക്ക് ജയം; പരമ്പര സമനിലയിൽ

നാലാം ദിനം രണ്ട് വിക്കറ്റ് നഷ്ടത്തില്‍ 118 റണ്‍സെന്ന നിലയിൽ ബാറ്റിങ്ങിനിറങ്ങിയ ദക്ഷിണാഫ്രിക്ക അനായാസം ജയം സ്വന്തമാക്കുകയായിരുന്നു

Photo: Cricket South Africa

ജോഹന്നാസ്ബർഗ്: ഇന്ത്യയ്‌ക്കെതിരായ രണ്ടാം ടെസ്റ്റിൽ ദക്ഷിണാഫ്രിക്കയ്ക്ക് ജയം. വാണ്ടറേഴ്‌സിൽ നടന്ന മത്സരത്തിൽ ഏഴ് വിക്കറ്റിനാണ് പ്രോട്ടീസ് ഇന്ത്യയെ തകർത്തത്. ദക്ഷിണാഫ്രിക്കൻ ക്യാപ്റ്റൻ ഡീൻ എൽഗാറാണ് ടീമിനെ വിജയത്തിലെത്തിച്ചത്. ഇതോടെ പരമ്പര 1-1ന് സമനിലയിലായി.

നാലാം ദിനം ആദ്യ രണ്ട് സെഷനുകളും പൂര്‍ണമായും നഷ്ടമായെങ്കിലും അവസാന സെഷനില്‍ രണ്ട് വിക്കറ്റ് നഷ്ടത്തില്‍ 118 റണ്‍സെന്ന നിലയിൽ ബാറ്റിങ്ങിനിറങ്ങിയ ദക്ഷിണാഫ്രിക്ക അനായാസം ജയം സ്വന്തമാക്കുകയായിരുന്നു. സ്കോര്‍ ഇന്ത്യ 202, 266, ദക്ഷിണാഫ്രിക്ക 229, 243-3.

188 പന്തില്‍ നിന്ന് 10 ബൗണ്ടറിയടക്കം 96 റണ്‍സെടുത്ത് പുറത്താകാതെ നിന്ന ക്യാപ്റ്റന്‍ ഡീന്‍ എല്‍ഗാറാണ് ടീമിനെ മുന്നിൽ നിന്ന് നയിച്ചത്. 92 പന്തില്‍ നിന്ന് 40 റണ്‍സെടുത്ത റാസ്സി വാന്‍ഡര്‍ ഡസ്സനും 23 റൺസെടുത്ത ടെംബ ബവുമയും മികച്ച പിന്തുണ നൽകി. നാലാം ദിനം വാന്‍ഡര്‍ ഡസ്സന്റെ വിക്കറ്റ് മാത്രമാണ് ഇന്ത്യക്ക് നേടാനായത്. മൂന്നാം വിക്കറ്റിൽ എൽഗാറിനോപ്പം ചേർന്ന് 82 റൺസിന്റെ കൂട്ടുകെട്ടുണ്ടാക്കിയ ശേഷമായിരുന്നു മടക്കം.

Also Read: ഐസിസി ടെസ്റ്റ് റാങ്കിങ്: 18 റാങ്ക് മുകളിലെത്തി രാഹുൽ, ഷമിക്കും ബുംറയ്ക്കും മുന്നേറ്റം

രണ്ടാം ഇന്നിങ്സില്‍ 240 റൺസ് വിജയലക്ഷ്യവുമായി ബാറ്റിങ്ങിനിറങ്ങിയ ദക്ഷിണാഫ്രിക്കയ്ക്ക് മികച്ച തുടക്കമാണ് ഓപ്പണര്‍മാരായ ഡീന്‍ എല്‍ഗാറും എയ്ഡന്‍ മാര്‍ക്രവും ചേര്‍ന്ന് നല്‍കിയത്. ആക്രമിച്ചു കളിച്ച മാർക്രം 38 പന്തില്‍ 31 റണ്‍സെടുത്ത് പുറത്തായി. പിന്നാലെയെത്തിയ കീഗന്‍ പീറ്റേഴ്സണും നന്നായി ബാറ്റ് ചെയ്‌തു. അതോടെ ഇന്ത്യ പ്രതിരോധത്തിലായി. എല്‍ഗാറും പീറ്റേഴ്സണും ചേര്‍ന്ന് അനായാസം ഇന്ത്യന്‍ പേസര്‍മാരെ നേരിട്ടു. രണ്ടാം വിക്കറ്റില്‍ ഇരുവരും 46 റണ്‍സിന്റെ കൂട്ടുകെട്ടുണ്ടാക്കി. പിന്നാലെ 28 റണ്‍സെടുത്ത പീറ്റേഴ്സണെ അശ്വിന്‍ പുറത്താക്കി. ഇന്ത്യയ്ക്ക് വേണ്ടി മുഹമ്മദ് ഷമി, ഷാര്‍ദുല്‍ താക്കൂര്‍, അശ്വിന്‍ എന്നിവര്‍ ഓരോ വിക്കറ്റ് വീതം നേടി.

നേരത്തെ രണ്ടാം ഇന്നിങ്സില്‍ ഇന്ത്യ 266 റണ്‍സിന് ഓള്‍ഔട്ടായിരുന്നു. അര്‍ധസെഞ്ചുറി നേടിയ ചേതേശ്വര്‍ പൂജാരയും അജിങ്ക്യ രഹാനെയും 40 റണ്‍സെടുത്ത് പുറത്താകാതെ നിന്ന ഹനുമ വിഹാരിയുമാണ് ഇന്ത്യയ്ക്ക് ഭേദപ്പെട്ട സ്‌കോര്‍ സമ്മാനിച്ചത്.

ജനുവരി 11ന് കേപ്‌ടൗണിലാണ് പരമ്പരയിലെ മൂന്നാമത്തെയും അവസാനത്തെയും മത്സരം. അതിൽ ജയിക്കുന്ന ടീമിന് പരമ്പര ലഭിക്കും.

Get the latest Malayalam news and Sports news here. You can also read all the Sports news by following us on Twitter, Facebook and Telegram.

Web Title: India vs south africa 2nd test score updates highlights

The moderation of comments is automated and not cleared manually by malayalam.indianexpress.com
Best of Express