പെർത്ത്: ഓസ്ട്രേലിയക്കെതിരായ രണ്ടാം ടെസ്റ്റിൽ ഇന്ത്യക്ക് പരാജയം. 146 റൺസിനാണ് ഓസ്ട്രേലിയ ഇന്ത്യയെ പരാജയപ്പെടുത്തിയത്. അഞ്ച് വിക്കറ്റിന് 112 റൺസെന്ന നിലയിൽ അഞ്ചാം ദിനം ബാറ്റിങ് പുനരാരംഭിച്ച ഇന്ത്യക്ക് 140 റൺസെടുക്കാനേ സാധിച്ചുള്ളൂ. കളിയുടെ അവസാന ദിനമായ ഇന്ന് ഇന്ത്യക്ക് ജയമുറപ്പിക്കാൻ 175 റൺസ് കൂടി വേണമെന്നിരിക്കെയാണ് 28 റൺസ് കൂട്ടി ചേർക്കുന്നതിനിടയിൽ അവശേഷിച്ച അഞ്ച് വിക്കറ്റുകൾ കൂടി ഇന്ത്യ വലിച്ചെറിഞ്ഞത്.

നേരത്തെ ഓസ്ട്രേലിയയുടെ രണ്ടാം ഇന്നിങ്സ് 243 ന് അവസാനിച്ചിരുന്നു. ഒന്നാം ഇന്നിങ്സിൽ ഇന്ത്യക്കെതിരെ 43 റൺസിന്റെ ലീഡാണ് ഓസീസ് നേടിയത്. ഇതോടെയാണ് ഇന്ത്യക്ക് മുന്നിൽ 287 റൺസിന്റെ വിജയലക്ഷ്യം ഓസ്ട്രേലിയ ഉറപ്പിച്ചത്.

എന്നാൽ ചെറിയ വിജയലക്ഷ്യം പിന്തുടർന്ന ഇന്ത്യക്ക് ബോളിങ്ങിന് അനുകൂലമായ പിച്ചിൽ കാര്യമായ പ്രകടനം പുറത്തെടുക്കാൻ കഴിഞ്ഞില്ല. ഇന്ത്യ അക്കൗണ്ട് ചെയ്യുന്നതിന് മുമ്പ് ഓപ്പണർ ലോകേഷ് രാഹുൽ പുറത്തായി. പിന്നാലെ നാല് റൺസ് നേടിയ ചേതേശ്വർ പൂജാരയും പുറത്തായത് ഇന്ത്യക്ക് തിരിച്ചടിയായി.

നായകൻ വിരാട് കോഹ്‍ലിക്കും കാര്യമായ ചെറുത്തുനിൽപ്പ് നടത്താൻ ആകാതെ വന്നതോടെ 48 റൺസിൽ ഇന്ത്യക്ക് മൂന്നാം വിക്കറ്റും നഷ്ടമായി. 30 റൺസെടുത്ത രഹാനെ രക്ഷാപ്രവർത്തനത്തിന് ശ്രമിച്ചെങ്കിലും ഹെയ്സൽ വുഡിന് മുന്നിൽ താരത്തിന്റെ ഇന്നിങ്സ് അവസാനിച്ചു.

അവസാന ദിനമായ ഇന്ന് ഹനുമ വിഹാരിയുടെ വിക്കറ്റാണ് ഇന്ത്യക്ക് തുടക്കത്തിൽ നഷ്ടമായത്. പിന്നാലെ എത്തിയ ഉമേഷ് യാദവ് രണ്ട് റൺസിനും പുറത്തായി. 30 റൺസ് നേടി പ്രതീക്ഷ നൽകിയ പന്തിനെ ലിയോൺ പുറത്താക്കുകയായിരുന്നു. ഇഷാന്തും ബുംറയും റൺസെടുക്കാതെ പുറത്തായതോടെ ഇന്ത്യക്ക് തോൽവി ഏറ്റുവാങ്ങേണ്ടി വന്നു. ഇതോടെ നാല് മത്സരങ്ങൾ അടങ്ങുന്ന ടെസ്റ്റ് പരമ്പരയിൽ ഓരോ വിജയം വീതം നേടി ഇരു ടീമുകളും ഒപ്പമെത്തി.

രണ്ടാം ഇന്നിങ്സിൽ ഉസ്മാൻ ഖ്വാജയുടെ മികച്ച പ്രകടനമാണ് ഓസ്ട്രേലിയയുടെ ലീഡ് ഉയർത്തിയത്. ഖ്വാജ 72 റൺസെടുത്തു. ക്യാപ്റ്റൻ ടിം പെയ്ൻ 37 റൺസും ആരോൺ ഫിഞ്ച് 25 റൺസെടുത്തും പുറത്തായി. മർക്കസ് ഹാരിസ് 20 റൺസെടുത്തു. ഇന്ത്യക്കായി മുഹമ്മദ് ഷമി ആറു വിക്കറ്റ് വീഴ്ത്തി.

Get Malayalam News and latest news update from India and around the world. Stay updated with today's latest Sports news in Malayalam at Indian Expresss Malayalam.

ഏറ്റവും പുതിയ വാർത്തകൾക്കും വിശകലനങ്ങൾക്കും ഞങ്ങളെ ഫെയ്സ്ബുക്കിലും ട്വിറ്ററിലും ലൈക്ക് ചെയ്യൂ