അശ്വിനും രോഹിത്തും പുറത്ത്; രണ്ടാം ടെസ്റ്റിനുള്ള 13 അംഗ ടീമിനെ പ്രഖ്യാപിച്ചു

പെർത്ത്: ഇന്ത്യ-ഓസ്ട്രേലിയ ടെസ്റ്റ് പരമ്പരയിലെ രണ്ടാം മത്സരത്തിനുള്ള ഇന്ത്യൻ ടീമിനെ പ്രഖ്യാപിച്ചു. വിരാട് കോഹ്‍ലി നായകനായ 13 അംഗ ടീമിനെയാണ് പ്രഖ്യാപിച്ചിരിക്കുന്നത്. അന്തിമ ഇലവനെ മത്സരത്തിന് തൊട്ടുമുമ്പ് മാത്രമേ അറിയാൻ സാധിക്കൂ. ആദ്യ ടെസ്റ്റിൽ നിന്നും രണ്ട് പ്രധാന മാറ്റങ്ങളാണ് ഇന്ത്യൻ ടീമിലുള്ളത്.

കഴിഞ്ഞ മത്സരത്തിലെ ഇന്ത്യൻ ടീമിലെ ഏക സ്പിന്നർ ആർ.അശ്വിനും. ബാറ്റ്സ്മാൻ രോഹിത് ശർമ്മയും രണ്ടാം മത്സരത്തിനുള്ള ടീമിൽ ഇടം കണ്ടെത്തിയില്ല. പരുക്കുമൂലമാണ് ഇരു താരങ്ങളെയും ഒഴിവാക്കിയത്. സന്നാഹ മത്സരത്തിനിടയിൽ പരുക്കേറ്റ യുവതാരം പൃഥ്വി ഷാ രണ്ടാം ടെസ്റ്റിലും തിരിച്ചെത്തിയില്ല.

അശ്വിന് പകരം രവീന്ദ്ര ജഡേജയ്ക്കാകും സ്പിൻ ചുമതല. രോഹിത്തിന്റെ അഭാവത്തിൽ യുവതാരം ഹനുമ വിഹാരിക്ക് അവസരം ലഭിക്കും. എന്നാൽ പേസർമാരിൽ ആരൊക്കെ ടീമിലിടം കണ്ടെത്തും എന്ന കാര്യത്തിലാണ് സംശയം. പതിമൂന്നംഗ ടീമിൽ അഞ്ച് പേസർമാരെയും ഉൾപ്പെടുത്തിയിട്ടുണ്ട്.

കഴിഞ്ഞ മത്സരത്തിൽ നിന്നും മാറ്റൻ വരുത്താൻ സാധ്യത ഇല്ലെങ്കിലും പരീക്ഷണങ്ങൾക്കും ഇന്ത്യൻ ടീം മുതിർന്നേക്കും. അങ്ങനെയെങ്കിൽ മുഹമ്മദ് ഷമിക്ക് പകരം ഉമേഷ് യാദവ് ടീമിലെത്താൻ സാധ്യതയുണ്ട്. ഭുവനേശ്വർ കുമാർ രണ്ടാം മത്സരത്തിലും പുറത്തിരിക്കുമെന്നാണ് കരുതുന്നത്.

ഇന്ത്യൻ ടീം: വിരാട് കോഹ്‌ലി (നായകന്‍), മുരളി വിജയ്, കെ.എല്‍.രാഹുല്‍, ചേതേശ്വര്‍ പൂജാര, അജിങ്ക്യ രഹാനെ, ഹനുമ വിഹാരി, ഋഷഭ് പന്ത്, രവീന്ദ്ര ജഡേജ, ഇശാന്ത് ശര്‍മ്മ, മുഹമ്മദ് ഷമി, ജസ്പ്രീത് ബുംമ്ര, ഭുവനേശ്വര്‍ കുമാര്‍, ഉമേഷ് യാദവ്.