ഇന്ത്യന്‍ ഫുട്‌ബോളിലെ ജോത്സ്യ വിവാദം: ഇഗോര്‍ സ്റ്റിമാക് ഏഷ്യന്‍ ഗെയിംസില്‍ ടീമിനെ അനുഗമിക്കില്ല

ന്യൂഡല്‍ഹി: എഎഫ്സി ഏഷ്യന്‍ കപ്പ് യോഗ്യതാ മത്സരത്തില്‍ ഇന്ത്യന്‍ ഫുട്ബോള്‍ ടീമിനെ തിരഞ്ഞെടുക്കുന്നതില്‍ ജ്യോത്സ്യന്റെ സഹായം തേടിയെന്ന റിപ്പോര്‍ട്ടുകള്‍ക്ക് പിന്നാലെ പരിശീലകനായ ഇഗോര്‍ സ്റ്റിമാക് ഏഷ്യന്‍ ഗെയിംസില്‍ ടീമിനെ അനുഗമിക്കില്ലെന്ന് ഇന്ത്യന്‍ എക്‌സ്പ്രസ് റിപ്പോര്‍ട്ട്. ടൂര്‍ണമെന്റില്‍ ദുര്‍ബലരായ ടീമിനെ ഇറക്കാന്‍ ഇന്ത്യ നിര്‍ബന്ധിതരാകും.

സെപ്തംബര്‍ 19 ന് നടക്കുന്ന ഹാങ്ഷൗ ഗെയിംസില്‍ ഇന്ത്യ ആതിഥേയരായ ചൈനയെയാണ് നേരിടുന്നത്. ഐഎസ്എല്‍ പുതിയ സീസണ്‍ സെപ്റ്റംബര്‍ 21 നാണ് ആരംഭിക്കുന്നത്. കളിക്കാരുടെ ലഭ്യതയെ ചൊല്ലി ഐഎസ്എല്‍ ക്ലബ്ബുകളും ഓള്‍ ഇന്ത്യ ഫുട്‌ബോള്‍ ഫെഡറേഷനും (എഐഎഫഎഎഫ്) തമ്മിലുള്ള തര്‍ക്കം രൂക്ഷമായതോടെ ഏഷ്യാഡ് ടീമില്‍ അനിശ്ചിതത്വം നിലനില്‍ക്കുന്നുണ്ട്.

നിയമമനുസരിച്ച് ഓരോ രാജ്യവും മൂന്ന് സീനിയര്‍ താരങ്ങള്‍ക്കൊപ്പം അണ്ടര്‍ 23 ടീമിനെ ഇറക്കണം. ദേശീയ ടീമിലെ ഇന്ത്യയുടെ ഏറ്റവും മികച്ച താരങ്ങള്‍ ഈ പ്രായ വിഭാഗത്തില്‍ ഉള്‍പെടുന്നു, കൂടാതെ രാജ്യത്തെ ഏറ്റവും കൂടുതല്‍ ഗോള്‍ വേട്ടക്കാരനായ സുനില്‍ ഛേത്രി, ഡിഫന്‍ഡര്‍ സന്ദേശ് ജിംഗാന്‍, ഗോള്‍കീപ്പര്‍ ഗുര്‍പ്രീത് സിംഗ് സന്ധു തുടങ്ങിയ മുതിര്‍ന്ന താരങ്ങളും ആദ്യ ടീമില്‍ ഇടംനേടി. എന്നിരുന്നാലും, ഈ കളിക്കാരൊന്നും ഇപ്പോള്‍ ഹാങ്ഷൗവിലേക്ക് പോകാന്‍ സാധ്യതയില്ല. സ്‌ക്വാഡില്‍ മികച്ച കളിക്കാര്‍ വേണമെന്ന തന്റെ ആവശ്യത്തില്‍ ഉറച്ചുനില്‍ക്കുന്ന സ്റ്റിമാക് ഏഷ്യന്‍ ഗെയിംസിലേക്ക് പോകുന്ന ടീമിനെ അനുഗമിക്കാന്‍ സാധ്യതയില്ലെന്നുമാണ് റിപ്പോര്‍ട്ട്.

ഒരു ജ്യോതിഷിയുടെ ഉപദേശപ്രകാരം കഴിഞ്ഞ വര്‍ഷം ഏഷ്യന്‍ കപ്പ് യോഗ്യതാ മത്സരങ്ങള്‍ക്കുള്ള ടീമിനെ സ്റ്റിമാക് തിരഞ്ഞെടുത്തുവെന്ന് ദി ഇന്ത്യന്‍ എക്‌സ്പ്രസ് റിപ്പോര്‍ട്ട് ചെയ്ത ദിവസമാണ് സംഭവവികാസം. ഓള്‍ ഇന്ത്യ ഫുട്‌ബോള്‍ ഫെഡറേഷന്റെ (എഐഎഫ്എഫ്) അന്നത്തെ സെക്രട്ടറി ജനറലായിരുന്ന കുശാല്‍ ദാസ് പറയുന്നതനുസരിച്ച്, രണ്ട് മാസത്തെ സേവനത്തിന് 12 മുതല്‍ 15 ലക്ഷം രൂപ വരെയാണ് ജ്യോത്സ്യന് നല്‍കിയത്. ഇന്ത്യ ഏഷ്യന്‍ കപ്പിന് യോഗ്യത നേടിയപ്പോള്‍ അതൊരു വലിയ തുകയായി തോന്നിയില്ല' കുശാല്‍ ദാസ് വെളിപ്പെടുത്തി.

''ഇന്ത്യന്‍ ഫുട്ബോളിന്റെ പുരോഗതിക്ക് ലക്ഷ്യമാണോ, സത്യസന്ധനായ പോരാളിയോ? എല്ലാ മേശപ്പുറത്ത് വച്ചിട്ട് ഈ രാജ്യത്ത് ഫുട്‌ബോളിനെക്കുറിച്ച് ആരാണ് ശരിക്കും ശ്രദ്ധിക്കുന്നതെന്ന് ശ്രദ്ധിക്കേണ്ട സമയം വരുന്നു. നിങ്ങളുടെ വിധി പറയുന്നതിന് മുമ്പ് ഒരു ചിന്ത നല്‍കുക, നിങ്ങളുടെ പിന്തുണയ്ക്ക് ഒരിക്കല്‍ കൂടി നന്ദി. ഇന്ത്യയെ ഒരു ഫുട്‌ബോള്‍ രാഷ്ട്രമാക്കുക എന്ന എന്റെ സ്വപ്നം ഇപ്പോഴും സജീവമാണെന്ന് അദ്ദേഹം പറഞ്ഞു.