ഇന്ത്യ-പാകിസ്ഥാൻ മാച്ചിനിടെ കോഹ്ലിക്ക് പിണഞ്ഞ അമളി!

ഇന്ത്യ-പാകിസ്ഥാൻ മാച്ചിനിടെ ഇന്ത്യയുടെ സൂപ്പർതാരം വിരാട് കോഹ്ലിക്ക് പിണഞ്ഞ അമളിയെ ട്രോളി സോഷ്യൽ മീഡിയ. തിരക്കിട്ട് ദേശീയ ഗാനത്തിനായി ഗ്രൌണ്ടിലെത്തിയ വിരാട് കോഹ്ലി സ്വന്തം ജേഴ്സി മാറിയത് തിരിച്ചറിഞ്ഞിരുന്നില്ല. ലോകകപ്പിനായി പ്രത്യേകമായി രൂപകൽപ്പന ചെയ്ത, ഷോൾഡറിൽ ദേശീയ പതാകയുടെ നിറത്തിലുള്ള സ്ട്രിപ്പുള്ള ജഴ്സിയായിരുന്നില്ല കോഹ്ലി അണിഞ്ഞത്. മുൻ സീസണിനായി ഒരുക്കിയ ജഴ്സിയായിരുന്നു.

ആരെങ്കിലും കോഹ്ലിക്കിട്ട് പണി കൊടുത്തതാണോ, അതോ ശരിക്കും കോഹ്ലിയുടെ അശ്രദ്ധയാണോ ഇതിന് പിന്നിലെന്നാണ് സോഷ്യൽ മീഡിയയിലൂടെ ആരാധകർ ചോദിക്കുന്നത്. സഹതാരങ്ങൾ ഇത് ചൂണ്ടിക്കാട്ടിയതോടെ കോഹ്ലി നേരെ ഡ്രസ്സിങ് റൂമിലേക്ക് ഓടിക്കയറി ജഴ്സി മാറിയെത്തി. ചാനലുകളിൽ ലൈവിലും കോഹ്ലി പഴയ ജഴ്സിയണിഞ്ഞ് നിൽക്കുന്നത് കാണാമായിരുന്നു.

മുൻ ഇന്ത്യൻ ഇതിഹാസം സച്ചിനുമായും കോഹ്ലി നരേന്ദ്ര മോദി സ്റ്റേഡിയത്തിൽ സംസാരിച്ചു നിൽക്കുന്ന ചിത്രങ്ങളും പുറത്തുവന്നിട്ടുണ്ട്. ഈ ചിത്രങ്ങളിലും പഴയ ജഴ്സിയണിഞ്ഞ് നിൽക്കുന്ന കിങ് കോഹ്ലിയെ കാണാം.