Happy Birthday Dada: ഇന്ത്യ കണ്ട എക്കാലത്തെയും മികച്ച നായകൻ സൗരവ് ഗാംഗുലിയുടെ ജന്മദിനം ആഘോഷമാക്കുകയാണ് ക്രിക്കറ്റ് ലോകം. ബിസിസിഐയുടെ പ്രസിഡന്റായി ഇപ്പോഴും ഇന്ത്യൻ ക്രിക്കറ്റിന്റെ തലപ്പത്ത് പ്രവർത്തിക്കുന്ന ഗാംഗുലിക്ക് സഹതാരങ്ങളും ശിഷ്യന്മാരുമെല്ലാം ആശംസ നേർന്നു. കൊറോണ വൈറസ് വ്യാപനം തടയുന്നതിനുള്ള നിയന്ത്രണങ്ങൾ രാജ്യത്ത് തുടരുന്നതിനാൽ ഓൺലൈനിൽ തന്നെയാണ് ദാദയുടെ പിറന്നാൾ ആരാധകരും ആഘോഷമാക്കുന്നത്.

സമൂഹമാധ്യമങ്ങളിലെല്ലാം ദാദയോടുള്ള സ്നേഹവും ആരാധനയും വാക്കുകളിലും ചിത്രങ്ങളിലുമായി പ്രകടിപ്പിക്കുകയാണ് ആരാധകർ. ട്വിറ്ററിൽ #HappyBirthdayDada എന്ന ഹാഷ്ടാഗ് ഇതിനോടകം തന്നെ ട്രെൻഡിങ്ങിൽ ഇടംപിടിച്ചു കഴിഞ്ഞു.

തന്റെ പിൻഗാമിയായിരുന്ന ധോണിയുടെ പിറന്നാൾ ചൊവ്വാഴ്ച ക്രിക്കറ്റ് ലോകം ആഘോഷിച്ചതിന് പിന്നാലെയാണ് ദാദയുടെ പിറന്നാളും എത്തുന്നത്. ചുരുക്കി പറഞ്ഞാൽ ഇന്ത്യൻ ക്രിക്കറ്റ് ആരാധകർക്ക് അവരുടെ പ്രിയപ്പെട്ട നായകന്മാരുടെ പിറന്നാളുകൾ തുടർച്ചയായ ആഘോഷദിനങ്ങളാണ് സമ്മാനിക്കുന്നത്.