ഐ ലീഗിൽ ഗോകുലത്തിന് വീണ്ടും സമനില കുരുക്ക്. ഷില്ലോങ് ലജോങ് എഫ് സിയാണ് ഇക്കുറി ഗോകുലം കേരള എഫ്സിയെ സമനിലയിൽ തളച്ചത്. മത്സരത്തിൽ ഓരോ ഗോൾ വീതം നേടിയാണ് ഇരു ടീമുകളും പിരിഞ്ഞത്. ലീഗിൽ ഗോകുലം വഴങ്ങുന്ന എട്ടാമത്തെ സമനിലയാണിത്.

ആദ്യ പകുതിയുടെ അവസാന മിനിറ്റുകളിലൂടെ നേടിയ ഗോളിലൂടെ ആദ്യം മുന്നിലെത്തിയത് ഗോകുലമായിരുന്നു. തുടക്കം മുതൽ മത്സരത്തിന്റെ നിയന്ത്രണവും ഗോകുലത്തിനായിരുന്നു. ട്രിനിഡാട് താരം മാർക്കസ് ജോസഫിലൂടെയാണ് ഗോകുലം ഗോൾ കണ്ടെത്തിയത്.

രണ്ടാം പകുതിയിൽ ഷില്ലോങ് എത്തിയത് തന്നെ ഗോകുലത്തിന് മറുപടിയുമായിട്ടായിരുന്നു. സാമുവേലിന്റെ പെനാൽറ്റിയാണ് ഷില്ലോങിനെ ഒപ്പമെത്തിയത്. മഹേഷ് സിങ്ങിനെ ഫൗൾ ചെയ്ത് വീഴ്ത്തിയതിന് എതിരാളികൾക്ക് ലഭിച്ച പെനാൽറ്റിയെടുത്ത സാമുവേലിന് ലക്ഷ്യം പിഴച്ചില്ല.

സമനിലയോടെ ഗോകുലം ലീഗിൽ പത്താം സ്ഥാനം നിലനിർത്തി. 17 മത്സരങ്ങളിൽ രണ്ട് ജയം മാത്രമാണ് ഗോകുലത്തിനുള്ളത്. ഏഴ് മത്സരങ്ങൾ പരാജയപ്പെട്ടപ്പോൾ എട്ട് മത്സരങ്ങൾ സമനിലയിലും അവസാനിച്ചു. 14 പോയിന്റാണ് ഗോകുലത്തിന്റെ അക്കൗണ്ടിലുള്ളത്. പോയിന്റ് പട്ടികയിൽ അവസാനമെത്തുന്ന ടീം രണ്ടാം ഡിവിഷനിലേയ്ക്ക് തരംതാഴ്ത്തപ്പെടും. നിലവിൽ ഷില്ലോങ്ങാണ് 11-ാം സ്ഥാനത്ത്.

Get all the Latest Malayalam News and Kerala News at Indian Express Malayalam. You can also catch all the Sports News in Malayalam by following us on Twitter and Facebook