ഐ ലീഗിൽ തുടർച്ചയായ നാലാം പരാജയം ഏറ്റുവാങ്ങി ഗോകുലം കേരള എഫ് സി. ഇന്ന് നടന്ന മത്സരത്തിൽ ചർച്ചിൽ ബ്രദേഴ്സിനോടാണ് ഗോകുലം പരാജയപ്പെട്ടത്. ഒന്നിനെതിരെ മൂന്ന് ഗോളുകൾ മടക്കിയായിരുന്നു ചർച്ചിൽ ബ്രദേഴ്സ് വിജയം ആഘോഷിച്ചത്. ജയത്തോടെ ചർച്ചിൽ പോയിന്റ് പട്ടികയിൽ രണ്ടാം സ്ഥാനത്തേക്ക് മുന്നേറി.

അരങ്ങേറ്റ മത്സരത്തിൽ തന്നെ ഗോൾ കണ്ടെത്തിയ മാർക്കസ് ജോസഫാണ് ഗോകുലത്തിന്റെ ഏക ഗോൾസ്കോറർ. 14-ാം മിനിറ്റിൽ ജോസഫ് നേടിയ ഗോളിലൂടെ ഗോകുലമാണ് മുന്നിലെത്തിയത്. 37-ാം മിനിറ്റിൽ സീസെ ചർച്ചിൽ ബ്രദേഴ്സിനെ ഒപ്പമെത്തിക്കുകയായിരുന്നു. പിന്നീട് ഗോൾ കണ്ടെത്തുന്നതിൽ ഇരു ടീമുകളും പരാജയപ്പെട്ടതോടെ ആദ്യ പകുതി സമനിലയിൽ അവസാനിച്ചു.

എന്നാൽ രണ്ടാം പകുതിയിൽ ചർച്ചിൽ ബ്രദേഴ്സ് മത്സരത്തിന്റെ നിയന്ത്രണം ഏറ്റെടുത്തതോടെ ഗോകുലം കളി മറന്നു. 57-ാം മിനിറ്റിൽ വില്ലിസ് പ്ലാസ വോവൻ വമ്പന്മാരെ മുന്നിലെത്തിച്ചു. ഗോൾ തിരിച്ചടിക്കാനുള്ള ഗോകുലത്തിന്റെ ശ്രമങ്ങൾ തുടരെ തുടരെ പരാജയപ്പെട്ടു. കളിയുടെ അധിക സമയത്ത് പ്ലാസ വീണ്ടും ലക്ഷ്യം കണ്ടതോടെ ചർച്ചിൽ ബ്രദേഴ്സ് ജയം ഉറപ്പിച്ചു.

സീസണിൽ ഗോകുലം വഴങ്ങുന്ന തുടർച്ചയായ നാലാം പരാജയമാണിത്. ഗോകുലം ഒരു വിജയം അറിഞ്ഞിട്ട് ഏഴ് മത്സരങ്ങൾ പിന്നിടുന്നു. ചെന്നൈയ്ക്കെതിരെ കഴിഞ്ഞ ദിവസം നടന്ന മത്സരത്തിൽ രണ്ടിനെതിരെ മൂന്ന് ഗോളുകൾക്കായിരുന്നു ഗോകുലത്തിന്റെ പരാജയം. ഐസ്വാളിനെതിരെയും ഇതേ ഗോൾനിലയിലായിരുന്നു ഗോകുലത്തിന്റെ പരാജയപ്പെട്ടത്.

Get all the Latest Malayalam News and Kerala News at Indian Express Malayalam. You can also catch all the Sports News in Malayalam by following us on Twitter and Facebook