scorecardresearch
Latest News

‘ടോപ് മാന്‍’ റായിഡുവിന് ആശംസകളുമായി വിരാട് കോഹ്‌ലി

റായിഡു തന്റെ വിരമിക്കല്‍ കത്തില്‍ കോഹ്ലിയ്ക്ക് പ്രത്യേകം നന്ദി പറഞ്ഞിരുന്നു.

‘ടോപ് മാന്‍’ റായിഡുവിന് ആശംസകളുമായി വിരാട് കോഹ്‌ലി

ബര്‍മിങ്ഹാം: വിരമിക്കല്‍ തീരുമാനിച്ച അമ്പാട്ടി റായിഡുവിന് ആശംസകളുമായി ഇന്ത്യന്‍ നായകന്‍ വിരാട് കോഹ് ലി. നേരത്തെ റായിഡു തന്റെ വിരമിക്കല്‍ കത്തില്‍ കോഹ്ലിയ്ക്ക് പ്രത്യേകം നന്ദി പറഞ്ഞിരുന്നു.

മുന്നോട്ടുള്ള യാത്രയില്‍ റായിഡുവിന് ആശംസകള്‍ നേര്‍ന്ന കോഹ്‌ലി റായിഡുവിനെ ‘ടോപ് മാന്‍’ എന്നാണ് വിശേഷിപ്പിച്ചത്. വിരമിക്കല്‍ തീരുമാനം അറിയിച്ചുകൊണ്ട് ബിസിസിഐയ്ക്ക് എഴുതിയ കത്തിലാണ് റായിഡു കോഹ്‌ലിയ്ക്ക് പ്രേത്യേകം നന്ദി പറഞ്ഞത്.

ഇന്ത്യയ്ക്ക് വേണ്ടി കളിക്കാനായത് അഭിമാനമാണെന്ന് പറഞ്ഞ റായിഡു തന്റെ നായകന്മാരായിരുന്ന ധോണിക്കും രോഹിത് ശര്‍മ്മയ്ക്കും വിരാട് കോഹ്‌ലിയ്ക്കും നന്ദി പറഞ്ഞു. കോഹ്‌ലി എന്നും തന്നില്‍ വിശ്വസിച്ചിരുന്നുവെന്നും റായിഡു കത്തില്‍ പറയുന്നു. ഐപിഎല്ലില്‍ മുംബൈ ഇന്ത്യന്‍സിന്റേയും ചെന്നൈ സൂപ്പര്‍ കിങ്‌സിന്റേയും താരമായിരുന്നു റായിഡു.

ലോകകപ്പ് ടീമില്‍ രണ്ട് മാറ്റങ്ങള്‍ വരുത്തിയിട്ടും താരത്തെ പരിഗണിച്ചിരുന്നില്ല. ഇതിന് പിന്നാലെയാണ് അമ്പാട്ടി രാജ്യാന്തര ക്രിക്കറ്റില്‍ നിന്ന് വിരമിക്കുകയാണെന്ന് പ്രഖ്യാപിച്ചത്. ഇന്ത്യന്‍ പ്രീമിയര്‍ ലീഗിലും ഇനി മുതല്‍ അമ്പാട്ടി റായിഡു ഉണ്ടാകില്ല.

എന്നാല്‍ വിരമിക്കുന്നതിനുള്ള കാരണം അമ്പാട്ടി റായിഡു വ്യക്തമാക്കിയിട്ടില്ല. ഇന്ത്യന്‍ പ്രീമിയര്‍ ലീഗില്‍ നിന്നും മാറി പുറത്തുള്ള ലീഗുകളില്‍ കളിക്കാനാണ് റായിഡു ഒരുങ്ങുന്നത്. അതേസമയം, ഐപിഎല്ലില്‍ നിന്നുകൂടി മാറുന്നതോടെ ബിസിസിഐയുമായുള്ള എല്ലാ സഹകരണവും അവസാനിക്കും.

ഇന്ത്യന്‍ ടീമില്‍ മധ്യനിര ബാറ്റ്‌സ്മാനായി എത്തിയ റായിഡു 50 ഏകദിന മത്സരങ്ങളില്‍ നിന്ന് 1694 റണ്‍സ് സ്വന്തമാക്കി. മൂന്ന് സെഞ്ചുറിയും പത്ത് അര്‍ധ സെഞ്ചുറികളും നേടിക്കഴിഞ്ഞ താരത്തിന്റെ പ്രഹരശേഷി 79.04 ആണ്. ഇന്ത്യക്കായി അഞ്ച് ടി20 മത്സരങ്ങളും അമ്പാട്ടി റായിഡു കളിച്ചിരുന്നു.

ലോകകപ്പ് ടീമിനെ പ്രഖ്യാപിച്ചപ്പോള്‍ മുതല്‍ വാര്‍ത്തകളില്‍ നിറഞ്ഞു നിന്ന താരമാണ് അമ്പാട്ടി റായിഡു. ടീമില്‍ താരത്തിന് ഇടം ലഭിക്കാത്തതില്‍ വലിയ വിമര്‍ശനമാണ് ഉയര്‍ന്ന് കേട്ടത്. ലോകകപ്പ് ടീമില്‍ നിന്ന് ശിഖര്‍ ധവാന്‍ പരുക്കേറ്റ് പുറത്തായതിന് പകരം വിക്കറ്റ് കീപ്പര്‍ ബാറ്റ്‌സ്മാനായ ഋഷഭ് പന്തിനെയാണ് ടീമില്‍ ഉള്‍പ്പെടുത്തിയത്. ഓള്‍റൗണ്ടര്‍ വിജയ് ശങ്കറും പരുക്കേറ്റതിനെ തുടര്‍ന്ന് ടീമില്‍ നിന്ന് പുറത്തായപ്പോള്‍ പകരം മായങ്ക് അഗര്‍വാളിനെയാണ് പരിഗണിച്ചത്. ഇതോടെ സമൂഹമാധ്യമങ്ങളില്‍ വലിയ തരത്തിലുള്ള ട്രോളുകള്‍ക്കും അമ്പാട്ടി റായിഡു കഥാപാത്രമായി.

Stay updated with the latest news headlines and all the latest Cricket news download Indian Express Malayalam App.

Web Title: You are a top man virat kohli wishes ambati rayudu good luck274289

Best of Express