World Cup 2019 Final Eng vs NZ Highlights: ലോർഡ്സിന്റെ മണ്ണിൽ ഇംഗ്ലണ്ടിന്റെ കിരീടധാരണം; കണ്ണീരണിഞ്ഞ് കിവികൾ

World Cup 2019 Final Eng vs NZ Highlights: ലോകകപ്പിൽ ഇനി പുതിയ തമ്പുരാക്കന്മാർ. ചരിത്രത്തിലാധ്യമായി ഇംഗ്ലണ്ടിന് കിരീടം. കലാശപോരാട്ടത്തിൽ ന്യൂസിലൻഡിനെ പരാജയപ്പെടുത്തിയാണ് ഇംഗ്ലണ്ട് കിരീടം സ്വന്തമാക്കിയത്. സൂപ്പർ ഓവറും സമനിലയിൽ അവസാനിച്ച മത്സരത്തിൽ ബൗണ്ടറികളുടെ എണ്ണത്തിന്റെ അടിസ്ഥാനത്തിലാണ് ഇംഗ്ലണ്ട് കിരീടം സ്വന്തമാക്കിയത്. തുടർച്ചയായ രണ്ടാം ഫൈനലിലും കിരീടം നഷ്ടപ്പെടുത്തി കിവികൾ നാട്ടിലേക്ക്.

Also Read: വിശ്വകിരീടം തറവാട്ടുകാർക്ക്; നന്ദി ന്യൂസിലന്‍ഡ്, ഇതുപോലൊരു ഫെെനലിന്…

ചെറിയ വിജയലക്ഷ്യം അനായാസം മറികടക്കാമെന്ന പ്രതീക്ഷയിൽ ബാറ്റിങ് ആരംഭിച്ച ഇംഗ്ലണ്ട് തകർത്തടിച്ച് തുടങ്ങിയെങ്കിലും ജേസൺ റോയ് പുറത്തായതോടെ സ്കോറിങ്ങിന്റെ വേഗത കുറഞ്ഞു. കാര്യമായ സംഭാവന നൽകാൻ കഴിയാതെ ജോ റൂട്ടും മടങ്ങിയതോടെ ഇംഗ്ലണ്ട് പതറി. ബെയർസ്റ്റോയുടെയും മോർഗന്റെയും പോരാട്ടം പെട്ടന്ന് തന്നെ അവസാനിച്ചു.

എന്നാൽ അഞ്ചാം വിക്കറ്റിൽ ഒത്തുചേർന്ന ബെൻ സ്റ്റോക്സ് ജോസ് ബട്‌ലർ സഖ്യം ഇംഗ്ലണ്ട് പ്രതീക്ഷകൾക്ക് ജീവവായു നൽകി. ബെൻ സ്റ്റോക്സ വിക്കറ്റ് കാത്തപ്പോൾ സ്കോറിങ്ങിന്റെ വേഗത കൂട്ടിയത് ജോസ് ബട്‌ലറായിരുന്നു. ഇരുവരും അർധസെഞ്ചുറി തികച്ചതോടെ ഇംഗ്ലണ്ട് വിജയലക്ഷ്യത്തിലേക്ക് കുതിച്ചു. എന്നാൽ അർധസെഞ്ചുറിക്ക് പിന്നാലെ ബട്‌ലർ മടങ്ങി. വീണ്ടും സാധ്യതകൾ സമാസമം. 49-ാം ഓവറിൽ പ്ലങ്കറ്റും ആർച്ചറും പുറത്തായതോടെ ഇംഗ്ലണ്ടിന്റെ സാധ്യതകൾ സ്റ്റോക്സിന്റെ തോളിലായി.

Also Read: ‘ഔട്ട് ഔട്ടല്ലെന്നും നോട്ട് ഔട്ട് ഔട്ടാണെന്നും’; അമ്പയറിങ്ങില്‍ ധര്‍മ്മസേനയ്ക്ക് വന്‍ പിഴവ്, ട്രോള്‍ മഴ

അവസാന ഓവറിൽ ജയിക്കാൻ വേണ്ടത് 15 റൺസ്. ആദ്യ രണ്ട് പന്തും ലോങ് ഓണിലേക്ക് തട്ടിയ സ്റ്റോക്സ് റൺസിനായി ശ്രമിച്ചില്ല. മൂന്നാം പന്ത് സിക്സർ പായിച്ച് സ്റ്റോക്സ് മൂന്ന് പന്തിൽ ഒമ്പത് റൺസെന്നാക്കി വിജയലക്ഷ്യം കുറച്ചു.നാലാം പന്തിൽ രണ്ട് റൺസിനായി ഓടുന്നതിനിടയിൽ ഗപ്റ്റിലിന്റെ ത്രോ സ്റ്റോക്സിന്റെ ബാറ്റിൽ തട്ടി ബൗണ്ടറിയിലേക്ക്. വിജയലക്ഷ്യം രണ്ട് പന്തിൽ മൂന്നായി ചുരുങ്ങി. അഞ്ചാം പന്തിൽ ഡബിളിന് ശ്രമിച്ച ആദിൽ റഷിദ് റൺഔട്ട്. അവസാന പന്തിൽ ജയിക്കാൻ രണ്ട് റൺസ് അവസാന പന്തിലും ഡബിളിന് ശ്രമിച്ച ഇംഗ്ലണ്ടിന് വിക്കറ്റ് നഷ്ടമായി. മത്സരം സമനിലയിൽ.

Also Read: ലോകകപ്പ് ഫൈനലിനിടെ മൈതാനത്തേക്ക് ആരാധിക ഓടിക്കയറി; കാരണം ഇതാണ്

സൂപ്പർ ഓവറിൽ ഇംഗ്ലണ്ടിനായി ബാറ്റിങ്ങിനെത്തിയത് വെടിക്കെട്ട് ബാറ്റ്സ്മാന്മാരായ ബട്ലറും സ്റ്റോക്സും. ട്രെന്റ് ബോൾട്ടിന്റെ ഓവറിൽ രണ്ട് ബൗണ്ടറി ഉൾപ്പടെ 15 റൺസാണ് ഇരുവരും ചേർന്ന് അടിച്ചെടുത്തത്. മറുപടി ബാറ്റിങ്ങിനെത്തിയ ന്യൂസിലൻഡിന് വേണ്ടി നീഷം ഒരു സിക്സ് ഉൾപ്പടെ 13 റൺസ് അടിച്ചെടുത്തു. അവസാന പന്തിൽ വീണ്ടും രണ്ട് റൺസ് വിജയലക്ഷ്യം. ഡബിളിനോടിയ ഗപ്റ്റിലിനെ പുറത്താക്കി വീണ്ടും സമനില. കൂടുതൽ ബൗണ്ടറികളുടെ അടിസ്ഥാനത്തിൽ ഇംഗ്ലണ്ടിനെ വിജയികളായി പ്രഖ്യാപിച്ചു.

Also Read: ‘മീശയെ മുറുക്ക്’; മോര്‍ഗനെ പറന്നു പിടിച്ച് ഫെര്‍ഗൂസന്‍, ഈ ക്യാച്ചിന് പൊന്നും വില

ആദ്യം ബാറ്റ് ചെയ്ത ന്യൂസിലൻഡ് നിശ്ചിത ഓവറിൽ എട്ട് വിക്കറ്റ് നഷ്ടത്തിലാണ് 248 എന്ന സ്കോറിലെത്തിയത്. ഇംഗ്ലീഷ് ബോളർമാർ ആധിപത്യം പുലർത്തിയ ആദ്യ ഇന്നിങ്സിൽ അർധസെഞ്ചുറി ഹെൻറി നിക്കോൾസിന്റെയും പൊരുതി നിന്ന ടോം ലഥാമിന്റെയും പ്രകടനമാണ് ന്യൂസിലൻഡിനെ ഭേദപ്പെട്ട സ്കോറിലെത്തിച്ചത്.

ടോസ് നേടി ബാറ്റിങ് തിരഞ്ഞെടുത്ത ന്യൂസിലൻഡിന് ഭേദപ്പെട്ട തുടക്കം ആദ്യ ഘട്ടത്തിൽ ലഭിച്ചിരുന്നു. എന്നാൽ 19 റൺസുമായി മാർട്ടിൻ ഗപ്റ്റിൽ മടങ്ങിയതിന് പിന്നാലെ ന്യൂസിലൻഡ് സ്കോറിങ്ങിന്റെ വേഗത കുറഞ്ഞു. ഇംഗ്ലീഷ് താരങ്ങൾ നിരന്തരം വിക്കറ്റ് അവസരങ്ങൾ സൃഷ്ടിക്കുകയും ചെയ്തതോടെ സാവധാനമായിരുന്നു വില്യംസണും നിക്കോൾസും ബാറ്റ് വീശിയത്. രണ്ടാം വിക്കറ്റിൽ അർധസെഞ്ചുറി കൂട്ടുകെട്ട് തീർത്ത ഇരുവരും രക്ഷപ്രവർത്തനം ഏറ്റെടുത്തു. എന്നാൽ 30 റൺസുമായി നായകനും പിന്നാലെ തന്നെ നിക്കോൾസും പുറത്തായത് കിവികൾക്ക് തിരിച്ചടിയായി. 55 റൺസുമായാണ് നിക്കോൾസ് ക്രീസ് വിട്ടത്.

Also Read: കണ്ടാലല്ലേ അടിക്കാന്‍ പറ്റൂ…; ലോകകപ്പിലെ അതിവേഗ പന്തെറിഞ്ഞ് മാര്‍ക്ക് വുഡ്

പിന്നാലെ എത്തിയ റോസ് ടെയ്‌ലറും സംഘവും പൊരുതി നോക്കിയെങ്കിലും ടീം സ്കോറിൽ കാര്യമായ ചലനമുണ്ടായില്ല. 15 റൺസുമായി ടെയ്‌ലർ മടങ്ങിയതിന് പിന്നാലെ ടോം ലഥാമും ജെയിംസ് നിഷമും ചേർന്ന് സ്കോർബോർടഡ് ഉയർത്താൻ ശ്രമിച്ചെങ്കിലും നിഷമിനെ പുറത്താക്കി പ്ലങ്കറ്റ് ഇംഗ്ലണ്ടിന് വീണ്ടും ആധിപത്യം നൽകി. അതേസമയം ക്രീസിൽ നിലയുറപ്പിച്ച ലഥാം ഗ്രാൻഡ്ഹോമിനെ കൂട്ടുപിടിച്ച് ടീം സ്കോർ ഉയർത്തി.

എന്നാൽ അർധസെഞ്ചുറിക്ക് മൂന്ന് റൺസ് അകലെ ലഥാം വീണു. പിന്നാലെ മാറ്റ് ഹെൻറിയും. ഇതോടെ ന്യൂസിലൻഡ് ഇന്നിങ്സ് 241 റൺസിൽ അവസാനിച്ചു.

ഇംഗ്ലണ്ടിന് വേണ്ടി ക്രിസ് വോക്സ ലിയാം പ്ലങ്കറ്റ് എന്നിവർ മൂന്ന് വിക്കറ്റ് വീതം വീഴ്ത്തി. ജോഫ്രാ ആർച്ചറിനും മാർക് വുഡിനുമാണ് അവശേഷിക്കുന്ന രണ്ട് വിക്കറ്റുകൾ. റൺസ് വിട്ടുനൽകുന്നതിൽ പിശുക്ക് കാണിക്കാൻ ഇംഗ്ലീഷ് ബോളർമാർ തമ്മിലായിരുന്നു മത്സരം.

World Cup 2019 Final Eng vs NZ Live Score: കണക്കിലും കളിയിലും തുല്യ ശക്തികളുടെ പോരാട്ടം. ആതിഥേയരെന്ന ആനുകൂല്യം ഇംഗ്ലണ്ടിന് നേരിയ മുന്‍തൂക്കം നല്‍കുന്നു. ഇരു ടീമുകളും ഏകദിനങ്ങളില്‍ ഏറ്റുമുട്ടിയത് 90 തവണ. ഇതില്‍ 43 തവണയും ജയിച്ചത് ന്യൂസിലാന്‍ഡ്. ഇംഗ്ലണ്ട് ജയിച്ചത് 41 തവണ. സമീപകാല പ്രകടനങ്ങളില്‍ ന്യൂസിലാന്‍ഡിനേക്കാള്‍ ഒരുപടി മുന്നിലാണ് ഇംഗ്ലണ്ട്.

ക്രിക്കറ്റിന്‍റെ തറവാട്ടുകാരാണെങ്കിലും ഇതുവരെയും ലോകകപ്പില്‍ മുത്തമിടാന്‍ ഇംഗ്ലണ്ടിന് കഴിഞ്ഞിട്ടില്ല. കലാശപോരാട്ടത്തിന് തന്നെ അവര്‍ അര്‍ഹത നേടിയത് 27 വര്‍ഷങ്ങള്‍ക്ക് മുമ്പ് 1992ലാണ്. അന്ന് പാക്കിസ്ഥാനോട് 22 റണ്‍സിന്‍റെ തോല്‍വി ഏറ്റുവാങ്ങിയ ടീമിന് പിന്നെ ഇതുവരെ ഫൈനലില്‍ എത്താന്‍ കഴിഞ്ഞിട്ടില്ല. ഇത്തവണ സെമിയില്‍ ഓസ്ട്രേലിയയെ 8 വിക്കറ്റിന് തകര്‍ത്ത ഓയന്‍ മോര്‍ഗനും സംഘവും തികഞ്ഞ ആത്മവിശ്വാസത്തിലാണ്.

ലോകകപ്പ് ഗ്രൂപ്പ് മത്സരങ്ങളിലും സെമി ഫൈനലിലും നേടിയ ആധികാരിക ജയങ്ങള്‍ ന്യൂസിലന്റ് ടീമിന്റെ ആത്മവിശ്വാസം വര്‍ദ്ധിപ്പിക്കുന്നു. എന്നാല്‍ പരീക്ഷണങ്ങള്‍ അതിജീവിച്ചാണ് ന്യൂസിലാന്‍ഡ് എത്തുന്നത്. നന്നായി തുടങ്ങുകയും പിന്നീട് നിറം മങ്ങുകയും ചെയ്ത ടീം റണ്‍ റേറ്റിന്റെ ആനുകൂല്യത്തിലാണ് പാകിസ്താനെ മറികടന്ന് സെമിയില്‍ എത്തിയത്. ആവേശകരമായ മത്സരത്തില്‍ ഇന്ത്യയെ മറികടന്ന് തുടര്‍ച്ചയായ രണ്ടാം തവണയും ഫൈനല്‍ യോഗ്യത നേടി.