ടൈ ബ്രേക്കറില്‍ പ്രഗ്നാനന്ദയ്ക്ക് പിഴച്ചു; മാഗ്നസ് കാള്‍സണ്‍ ലോക ചെസ് ചാമ്പ്യന്‍

ന്യൂഡല്‍ഹി: ലോക ചെസ് ചാമ്പ്യന്‍ഷിപ്പ് ഫൈനലില്‍ ഇന്ത്യയുടെ ആര്‍ പ്രഗ്നാനന്ദയ്ക്ക് തോല്‍വി. ലോക ഒന്നാം നമ്പര്‍ താരം മാഗ്നസ് കാള്‍സണോട് ടൈ ബ്രേക്കറിലായിരുന്നു പ്രഗ്നാനന്ദ പരാജയപ്പെട്ടത്.

ഫൈനലിലെ രണ്ട് മത്സരങ്ങള്‍ സമനിലയില്‍ ആയതോടെയാണ് ടൈ ബ്രേക്കറില്‍ വിജയിയെ നിശ്ചയിക്കേണ്ട സാഹചര്യമുണ്ടായത്. ചൊവ്വ, ബുധന്‍ ദിവസങ്ങളിലായിരുന്നു ആദ്യ രണ്ട് ഗെയിമുകള്‍.

ആദ്യ ഗെയിം 35 നീക്കങ്ങള്‍ക്കും രണ്ടാം ഗെയിം 30 നീക്കങ്ങള്‍ക്കും ശേഷമാണ് സമനിലയായത്. ടൈ ബ്രേക്കറില്‍ ടൂര്‍ണമെന്റില്‍ മികച്ച റെക്കോര്‍ഡുള്ള പ്രഗ്നാനന്ദ ചരിത്രമെഴുതുമെന്ന പ്രതീക്ഷ നിലനിന്നിരുന്നു.

ലോക മൂന്നാം നമ്പര്‍ ഫാബിയാനൊ കരുവാനയെ കീഴടക്കിയായിരുന്നു 18-കാരനായ പ്രഗ്നാനന്ദയുടെ ഫൈനല്‍ പ്രവേശനം. ക്വാര്‍ട്ടറില്‍ ലോക രണ്ടാം നമ്പര്‍ ഹിക്കാരു നക്കാമുറയേയും പ്രഗ്നാനന്ദ പരാജയപ്പെടുത്തിയിരുന്നു.

20 വര്‍ഷത്തിന് ശേഷം ചെസ് ലോകകപ്പ് ഫൈനലില്‍ പ്രവേശിക്കുന്ന ആദ്യ ഇന്ത്യന്‍ താരമാണ് പ്രഗ്നാനന്ദ. 2002-ല്‍ വിശ്വനാഥന്‍ ആനന്ദാണ് അവസാനമായി ചെസ് ലോകകപ്പ് ഫൈനലിലെത്തിയത്.