scorecardresearch

Latest News

‘ഒറ്റയടി, ചൈന വീണു’; ഹോക്കിയില്‍ ഇന്ത്യന്‍ വനിതകള്‍ ഫൈനലില്‍

ഫൈനലില്‍ ജപ്പാനാണ് ഇന്ത്യയുടെ എതിരാളികള്‍.

ജക്കാര്‍ത്ത: ഒറ്റ ഗോളിന് ചൈനയെ തകര്‍ത്ത് വനിതാ ഹോക്കിയില്‍ ഇന്ത്യ ഫൈനലില്‍. 1998 ന് ശേഷം ഇതാദ്യമായാണ് ഇന്ത്യന്‍ വനിതകള്‍ ഫൈനലിലെത്തുന്നത്. ഗുര്‍ജീത് കൗര്‍ 52-ാം മിനിറ്റില്‍ നേടിയ ഗോളാണ് ഇന്ത്യയ്ക്ക് വിജയം സമ്മാനിച്ചത്. ഫൈനലില്‍ ജപ്പാനാണ് ഇന്ത്യയുടെ എതിരാളികള്‍.

നേരത്തെ ഏഷ്യന്‍ ഗെയിംസ് ചരിത്രത്തിലാദ്യമായി ഇന്ത്യ ഹെപ്റ്റാത്തലോണില്‍ സ്വര്‍ണം നേടിയിരുന്നു. ഇന്നു നടന്ന ഏഴാമത്തെ ഇനത്തിലും മനഃസാന്നിധ്യം കൈവിടാതെ പൊരുതിയ സ്വപ്‌ന ബര്‍മനാണ് ഇന്ത്യയ്ക്ക് ചരിത്ര നേട്ടം സമ്മാനിച്ചത്. മറ്റൊരു ഇന്ത്യന്‍ താരമായ പൂര്‍ണിമ ഹെംബ്രാം നാലാമതെത്തി. ഇതോടെ ഇന്ത്യയുടെ മെഡല്‍ നേട്ടം 54 ആയി. 11 സ്വര്‍ണമാണ് ഇതുവരെ നേടിയത്.

അല്‍പ്പം മുമ്പാണ് ട്രിപ്പിള്‍ ജംപില്‍ അര്‍പീന്ദര്‍ ഇന്ത്യയുടെ 10-ാം സ്വര്‍ണം നേടുന്നത്. 48 വര്‍ഷങ്ങള്‍ക്ക് ശേഷമാണ് ഈ ഇനത്തില്‍ ഇന്ത്യ സ്വര്‍ണം നേടുന്നത്. 1970 ല്‍ മൊഹീന്ദര്‍ സിങ് ഗില്ലാണ് ഇന്ത്യയ്ക്ക് വേണ്ടി ട്രിപ്പിള്‍ ജംപില്‍ സ്വര്‍ണം നേടിയത്. 16.77 മീറ്റര്‍ ചാടിയാണ് അര്‍പീന്ദര്‍ സ്വര്‍ണം നേടിയത്.

200 മീറ്ററില്‍ വെള്ളി നേടി ദ്യുതിയാണ് ഇന്ത്യയ്ക്കായി മെഡല്‍ നേടിയത്. 23.20 സെക്കന്റില്‍ ഫിനിഷ് ചെയ്താണ് ദ്യുതി ചന്ദ് വെള്ളി നേടിയത്.

ടേബിള്‍ ടെന്നീസില്‍ ചരിത്രം കുറിച്ച് മണിക ബത്ര-ശരത് കമല്‍ സഖ്യം. ഇതാദ്യമായാണ് ഇന്ത്യന്‍ ടീം മിക്‌സഡ് ഡബിള്‍സിന്റെ സെമിയിലെത്തുന്നത്. സെമിയില്‍ ചൈനീസ് സഖ്യത്തോട് പരാജയപ്പെട്ട ഇന്ത്യന്‍ സഖ്യത്തിന് വെങ്കലം കൊണ്ട് തൃപ്തിപ്പെടേണ്ടി വന്നു. ഇന്ത്യയുടെ ഇന്നത്തെ ആദ്യ മെഡലാണിത്. ഏഷ്യന്‍ ഗെയിംസ് ചരിത്രത്തില്‍ തന്നെ ഇന്ത്യയുടെ രണ്ടാമത്തെ ടേബിള്‍ ടെന്നീസ് മെഡലാണിത്.

ഇന്നലെ പുരുഷന്മാരുടെ ടീം ഇനത്തില്‍ വികാസ് താക്കര്‍-ആന്റണി അമല്‍ രാജ്-ഹര്‍മീദ് ദേശായി- സത്യന്‍ സഖ്യമാണ് ടേബിള്‍ ടെന്നീസില്‍ ഇന്ത്യയുടെ ആദ്യ ഏഷ്യന്‍ ഗെയിംസ് മെഡല്‍ നേടിയത്. വെങ്കലമാണ് ഇവര്‍ നേടിയത്.

അതേസമയം, ബോക്‌സിങ്ങില്‍ ഇന്ത്യ മെഡലുറപ്പിച്ചു. ലൈറ്റ് വെയ്റ്റ് 49 കിലോഗ്രാമില്‍ അമിത് കുമാറും മിഡില്‍ വെയ്റ്റ് 75 കിലോഗ്രാമില്‍ വികാസ് കൃഷ്ണയുമാണ് മെഡലുറപ്പിച്ചത്. കഴിഞ്ഞ കോമണ്‍വെല്‍ത്ത് ഗെയിംസില്‍ വെള്ളി നേടിയിരുന്നു അമിത് കുമാര്‍. സ്വകാഷിലും ഇന്ത്യ മെഡലുറപ്പിച്ചിട്ടുണ്ട്. വനിതകളുടെ ടീം ഇനത്തില്‍ ഇന്ത്യ സെമിയില്‍ കടന്നിട്ടുണ്ട്.

ദീപിക പള്ളിക്കല്‍, ജോഷ്‌ന ചിന്ന, തന്‍വി ഖന്ന എന്നിവരുടെ ടീമാണ് ചൈനയെ പരാജയപ്പെടുത്തി സെമിയില്‍ കടന്നത്. ഹോങ്കോങ്ങാണ് ഇന്ത്യയുടെ അടുത്ത എതിരാളി. ഇതിന് പുറമെ ഹെപ്റ്റാത്തലണിലും ഇന്ത്യയ്ക്ക് മെഡല്‍ പ്രതീക്ഷയുണ്ട്. സപ്‌ന ബര്‍മനിലാണ് ഇന്ത്യയുടെ പ്രതീക്ഷ.

Stay updated with the latest news headlines and all the latest Sports news download Indian Express Malayalam App.

Web Title: Asian games india women beats china to enter final