വല്ലാത്തൊരു കോമ്പിനേഷന്‍; മുട്ട കൊണ്ട് ചായയുണ്ടാക്കി യുവാവ്, വൈറല്‍

മുട്ടകൊണ്ട് പലവിധ പരീക്ഷണങ്ങള്‍ നമ്മള്‍ കണ്ടിട്ടും ചെയ്തിട്ടും കഴിച്ചിട്ടും ഉണ്ടായിരിക്കാം. എന്നാല്‍ മുട്ടകൊണ്ട് ചായ ഉണ്ടാക്കിയാല്‍ എങ്ങനെയിരിക്കുമെന്ന് ആലോചിച്ചിട്ടുണ്ടോ.

ജുഗീഷ് ഷാജു എന്ന ഇന്‍സ്റ്റഗ്രാം അക്കൗണ്ടിലൂടെ പങ്കുവച്ച മുട്ട ചായയുടെ വീഡിയോയാണ് ഇപ്പോള്‍ നെറ്റിസണ്‍സിനിടയില്‍ കൗതുകം ഉണര്‍ത്തുന്നത്. പാലില്ലാതെയാണ് മുട്ട ചായ ഉണ്ടാക്കുന്നതെന്നാണ് മറ്റൊരു പ്രത്യേകത.

മുട്ട ചായ തയാറാക്കുന്നതിനായി വീഡിയോയിലുള്ള യുവാവ് ആദ്യ ഗ്ലാസിലേക്ക് ഒരു മുട്ട പൊട്ടിച്ച് ഒഴിക്കുകയാണ്. പിന്നാലെ കട്ടന്‍ ചായയാണ് ഒഴിക്കുന്നത്. ശേഷം നന്നായി ഇളക്കുന്നു. ഇളക്കിയ ശേഷം പാല്‍ ചായയുടെ രൂപത്തിലേക്ക് മാറുകയാണ് മുട്ട ചായ.

ഇത് ഒരുപാട് പേര്‍ക്ക് അപരിചിതമാണെങ്കിലും പലരും മുട്ട ചായ കഴിച്ചിട്ടുള്ളതായി കമന്റില്‍ രേഖപ്പെടുത്തിയിട്ടുണ്ട്. ജൂണ്‍ 28-ാം തീയതി പോസ്റ്റ് ചെയ്ത വീഡിയോ ഇതിനോടകം തന്നെ എട്ട് ലക്ഷത്തിലധികം പേരാണ് കണ്ടത്.