മേക്കോവര്‍ എന്ന് കേട്ടപ്പോള്‍ ഇത്രയും പ്രതീക്ഷിച്ചില്ല; കേശവേട്ടനു വന്ന മാറ്റമേ!

പ്രായം ഒന്നിന്‌റെയും പരിധിയല്ലെന്ന് കാണിച്ചുതരുകയാണ് 55കാരനായ ചെര്‍പ്പുളശ്ശേരിക്കാരുടെ കേശവേട്ടന്‍. ചെര്‍പ്പുളശ്ശേരിയിലെ ഒരു കൂട്ടം യുവാക്കളുടെ നേതൃത്വത്തില്‍ നടത്തിയ ഒരു കിടിലൻ മേക്കോവര്‍ വീഡിയോ ആണ് ഇപ്പോൾ സോഷ്യല്‍ മീഡിയയില്‍ തരംഗമാവുന്നത്. വീഡിയോയ്ക്ക് ഒപ്പം ചെര്‍പ്പുളശ്ശേരി പുലാപ്പറ്റ സ്വദേശി കേശവന്‍ നായരും വൈറലായി.

മേക്കോവര്‍ ആശയവുമായി മോക്കാ മെന്‍സിലെ യുവാക്കൾ കേശവേട്ടനെ സമീപിച്ചപ്പോള്‍ ആദ്യം താല്‍പര്യമില്ലെന്നാണ് അദ്ദേഹം പറഞ്ഞത്. എന്നാൽ പിന്നീട് യുവാക്കളുടെ സ്നേഹപൂർവ്വമായ നിര്‍ബന്ധത്തിനു വഴങ്ങി ഫൊട്ടോഷൂട്ടിനു തയ്യാറാവുകയായിരുന്നു.

സാധാരണ ചെര്‍പ്പുളശ്ശേരി ടൗണിലൂടെ ലുങ്കിയും ഷര്‍ട്ടും ധരിച്ച് കൈയ്യിലൊരു കമ്പുമായി നടന്നു പോവുന്ന കേശവൻ നായർ ആ നാട്ടുകാർക്കെല്ലാം പരിചിതനാണ്. എന്നാൽ കോട്ടും സൂട്ടും ഇട്ട് കിടിലന്‍ മേക്കോവർ ലുക്കിൽ കേശവൻ നായർ വന്നതു കണ്ടാൽ ചെര്‍പ്പുളശ്ശേരികാര്‍ മാത്രമല്ല, ആ വീഡിയോ കണ്ടവരെല്ലാം മൂക്കത്തു വിരൽവച്ചുപോവും.

സോഷ്യല്‍ മീഡിയയില്‍ വീഡിയോ വൈറലായതോടെ ഒട്ടേറെ സെലിബ്രിറ്റികള്‍ വീഡിയോ ഷെയർ ചെയ്തിട്ടുണ്ട്. പുതിയ വേഷം ഇഷ്ടപ്പെട്ടെങ്കിലും, ഇതു പോലെ എന്നും നടക്കാന്‍  താല്‍പര്യമില്ലായെന്നാണ്  അദ്ദേഹം പറയുന്നത്.

രസകരമായ കമന്റുകളാണ് വീഡിയോയ്ക്ക് ലഭിക്കുന്നത്.

• വൈകുന്നേരം വീട്ടിൽ ചെല്ലുമ്പോൾ കേശവേട്ടന്റെ വൈഫ്‌ : ദേ ചേട്ടനെ കാണാൻ ഏതോ വലിയ സാർ വന്നിരിക്കുന്നു.
• കണ്ടിട്ട് രോമാഞ്ചിഫിക്കേഷൻ ആയി.
• ലോകത്തെ തന്നെ നിയന്ത്രിക്കുന്ന ഏതോ വലിയ ബിസിനസ്സ് മാഗ്നെറ്റായി മാറിയ കേശവേട്ടന്‍.
• ഒരുങ്ങി ഇറങ്ങിയാൽ എല്ലാരും സൂപ്പർസ്റ്റാറുകൾ തന്നെ.

എന്നിങ്ങനെ പോവുന്നു കമന്റുകൾ.

മോക്കാ മെന്‍സിന്‌റെ ചെറുപ്പക്കാര്‍ വീഡിയോ ഇത്രയും വൈറലാകുമെന്ന് പ്രതീക്ഷിച്ചിരുന്നില്ല. അതുകൊണ്ട് വൈറല്‍ താരം കേശവേട്ടനെ വെറുതെ വിടാന്‍ ഉദ്ദേശിക്കുന്നില്ലെന്നാണ് അവർ തമാശയായി പറയുന്നത്. ഇന്‍സ്റ്റാഗ്രാമില്‍ 1.2 മില്ല്യണ്‍ ലൈക്ക്‌സ് ഇതിനകം ഈ വീഡിയോയ്ക്ക് ലഭിച്ചിട്ടുണ്ട്.