രാജുവേട്ടന്റെ ഇംഗ്ലീഷ്, ടോവിനോയുടെ ബുൾഗാൻ; ചിരിച്ചു മറിയും ഈ സംഭാഷണം കേട്ടാൽ

മലയാള സിനിമയിലെ പ്രമുഖ താരങ്ങളായ പൃഥ്വിരാജും ടൊവിനോയും തമ്മിലുള്ള സൗഹൃദം പ്രേക്ഷകർക്ക് വളരെ സുപരിചിതമാണ്. 'എന്ന് നിന്റെ മൊയ്തീൻ' എന്ന ചിത്രത്തിലാണ് ഇരുവരും ആദ്യമായി ഒന്നിച്ചഭിനയിച്ചത്. പിന്നീട് പൃഥ്വിരാജിന്റെ ആദ്യ സംവിധാന ചിത്രമായ 'ലൂസിഫറി'ലും വളരെ സുപ്രധാനമായ ഒരു വേഷം ടൊവിനോ കൈകാര്യം ചെയ്തു. തന്റെ സഹോദരനു തുല്യമാണ് പൃഥ്വിരാജ് എന്ന് പല വേദികളിലും ടൊവിനോ പറഞ്ഞിട്ടുണ്ട്.

ഇപ്പോഴിതാ ഇരുവരെയും അനുകരിച്ചു കൊണ്ട് ഇൻസ്റ്റഗ്രാം പേജിൽ പ്രത്യക്ഷപ്പെട്ട വീഡിയോയാണ് ശ്രദ്ധ നേടുന്നത്. പൃഥ്വിരാജിന്റെയും ടൊവിനോയുടെ ഫോൺ കോൾ എന്ന രീതിയിലാണ് വീഡിയോ പോസ്റ്റ് ചെയ്തിരിക്കുന്നത്. ലൂസിഫറിലെ ജതിൻ രാംദാസ് എന്ന കഥാപാത്രത്തിന് ക്ലീൻ ഷേവാണല്ലോ അതൊന്നു ബുൾഗാനാക്കാൻ പറ്റുമോയെന്നാണ് ടൊവിനോ ചോദിക്കുന്നത്. ഇതു കേട്ട ഉടനെ പൃഥ്വിരാജ് ഇംഗ്ലീഷിൽ മറുപടി പറയുന്നു.

പൃഥ്വിരാജിന്റെ ഇംഗീഷ് കേട്ട ടൊവിനോ തനിക്ക് ബുൾഗാൻ വേണ്ടെന്ന് പറയുകയും ഇങ്ങനെയൊന്ന് ചോദിച്ചതിന് ഇംഗ്ലീഷിൽ ചീത്തവിളിക്കേണ്ട കാര്യമില്ലായിരുന്നെന്നും വീഡിയോയിൽ പറയുന്നത് കേൾക്കാം. "വല്ലാത്ത ജാതി, ചിരിച്ചു ഒരു വഴി ആയി," എന്ന അടികുറിപ്പോടെയാണ് വീഡിയോ പങ്കുവച്ചിരിക്കുന്നത്.

നൗഫർ മുഹമ്മദിന്റെ ഇൻസ്റ്റഗ്രാം അക്കൗണ്ടിൽ പ്രത്യക്ഷപ്പെട്ട വീഡിയോയുടെ ഉടമസ്ഥനാരെന്ന് വ്യക്തമല്ല. ജൂലൈ പന്ത്രണ്ടിന് പോസ്റ്റ് ചെയ്ത വീഡിയോയ്ക്ക് 59,437 ലൈക്കുകളുണ്ട്. ഇതിന്റെ അർത്ഥം എന്താണെന്ന് രഞ്ജിനി ഹരിദാസിനോട് പോയി ചോദിക്കേണ്ടി വരും, പകച്ചു പോയി ടോവിനോ ഇച്ചായന്റെ ബാല്യം പോലും തുടങ്ങിയ കമന്റുകളാണ് വീഡിയോയ്ക്ക് താഴെ നിറയുന്നത്.