ഇന്ത്യൻ ക്രിക്കറ്റ് താരവും മലയാളിയുമായ സഞ്ജു സാംസണും പ്രിയ പത്നി ചാരുലതയും ഇന്ന് രണ്ടാം വിവാഹ വാർഷികം ആഘോഷിക്കുന്നു. ‘ജീവിതത്തിൽ തങ്ങളെടുത്ത ഏറ്റവും മികച്ച തീരുമാനം ആഘോഷിക്കുന്നു’ എന്ന കുറിപ്പോടെ ഭാര്യ ചാരുലതയ്‌ക്കൊപ്പമുള്ള ചിത്രം സഞ്ജു സോഷ്യൽ മീഡിയയിൽ പങ്കുവച്ചു. നിരവധി ആരാധകരാണ് ഇരുവർക്കും വിവാഹ വാർഷിക ആശംസകൾ നേർന്ന് രംഗത്തെത്തിയിരിക്കുന്നത്. 2018 ഡിസംബർ 22 നാണ് സഞ്ജു തന്റെ ജീവിത പങ്കാളിയായി ചാരുലതയെ ഒപ്പം ചേർത്തത്..
അഞ്ച് വർഷത്തെ പ്രണയത്തിനു ശേഷമാണ് ഇരുവരും ജീവിതത്തിൽ ഒന്നിച്ചത്. ചാരുലതയുമായുള്ള പ്രണയം വളരെ രസകരമായ ഒരു കുറിപ്പിലൂടെയാണ് സഞ്ജു പരസ്യമാക്കിയത്; “2013 ഓഗസ്റ്റ് 22-ാം തീയതി രാത്രി 11.11ന് ഞാനവൾക്ക് ആദ്യമായി ‘ഹായ്’ എന്ന് മെസേജ് അയച്ചു. അന്നു മുതൽ 5 വർഷമായി അവൾക്കൊപ്പമുളള ഒരു ചിത്രം പോസ്റ്റ് ചെയ്യാൻ ഞാൻ കാത്തിരിക്കുകയായിരുന്നു. വളരെ സ്പെഷ്യൽ ആയ ഒരു പെൺകുട്ടിയുമായി പ്രണയത്തിലാണെന്ന് ഇന്ന് ഞാൻ ലോകത്തോട് വിളിച്ചു പറയുകയാണ്. ഞങ്ങൾ ഇരുവരും ഒരുമിച്ച് സമയം ചെലവഴിച്ചു, പക്ഷേ ഞങ്ങൾക്കൊരിക്കലും പൊതുജനമധ്യത്തിൽ ഒരുമിച്ച് നടക്കാൻ കഴിഞ്ഞിരുന്നില്ല. എന്നാൽ ഇന്നു മുതൽ ഞങ്ങൾക്ക് അതിന് കഴിയും. ഞങ്ങളുടെ ബന്ധം അംഗീകരിച്ച മാതാപിതാക്കളോട് ഞാൻ നന്ദി പറയുന്നു. ചാരുവിനൊപ്പമുളള ഓരോ നിമിഷവും ഞാൻ സന്തോഷവാനാണ്. ചാരുവിനെപ്പോലെ വളരെ സ്പെഷ്യൽ ആയ ഒരു പെൺകുട്ടിയെ കിട്ടിയത് അനുഗ്രഹമാണ്”, സഞ്ജുവിന്റെ കുറിപ്പ് ഇങ്ങനെയായിരുന്നു.
മാര്‍ ഇവനിയോസ് കോളേജിൽ സഞ്ജുവിന്റെ സഹപാഠിയായിരുന്നു ചാരുലത.
അതേസമയം, ഓസ്‌ട്രേലിയൻ പര്യടനത്തിലെ ടി 20 പരമ്പരയിൽ ഇന്ത്യൻ ടീമിൽ ഇടംനേടിയ സഞ്ജു തുടർന്നും അവസരങ്ങൾ ലഭിക്കുമെന്ന പ്രതീക്ഷയിലാണ്. ടി 20 പരമ്പരയിലെ മൂന്ന് മത്സരങ്ങളിലും സഞ്ജു ഇന്ത്യയ്‌ക്കായി കളിച്ചു.
