കള്ളനെ പിടിക്കാൻ മാത്രമല്ല, അത്യാവശ്യത്തിന് ട്രോളിറക്കാനും അറിയാമെന്ന് നേരത്തേ തെളിയിച്ചതാണ് കേരള പൊലീസ്. എന്നാൽ സംഗീതത്തെ കുറിച്ച് ബോധമുള്ള നന്നായി പാടുന്ന ഉദ്യോഗസ്ഥരുമുണ്ട് പൊലീസ് സേനയിൽ. അതിന് ഉദാഹരണമാണ് രാജാക്കാട് സർക്കിൾ ഇൻസ്പെക്ടർ. മോഹൻലാൽ നായകനായ ‘പവിത്രം’ എന്ന ചിത്രത്തിലെ ‘ശ്രീരാഗമോ’ എന്ന ഗാനമാണ് അദ്ദേഹം പാടിയത്. ഇതിന്റെ വീഡിയോ പങ്കുവച്ചിരിക്കുന്നത് രാജാക്കാട് വില്ലേജ് എക്സ്റ്റൻഷൻ ഓഫീസറായ ജിജോ പാറേക്കാട്ടിലാണ്.

കാക്കിക്കുള്ളിലെ പാട്ടുകാരന് വലിയ കൈയടിയാണ് സോഷ്യൽ മീഡിയയിൽ ലഭിക്കുന്നത്. ‘ശ്രീരാഗമോ’ എന്ന ഗാനത്തിനു പുറമേ ‘ചന്ദനമണിവാതിൽ പാതിചാരി’ എന്ന ഗാനവും അദ്ദേഹം പാടുന്നുണ്ട്. കുറേ സ്കൂൾ കുട്ടികളാണ് കേൾവിക്കാർ.

സോഷ്യൽ മീഡിയയിൽ ഈ പാട്ടുകാരനെ അഭിനന്ദിക്കുന്നതിനോടൊപ്പം ചില രസികൻ കമന്റുകളും വരുന്നുണ്ട്. “സ്വന്തം കസേരയ്ക്ക് കീഴെ ഒരു യുവാവിന്റെ മൃതദേഹം ഉള്ളത് മനസ്സിലാക്കാൻ കഴിയാത്ത സർക്കിൾ,” എന്നായിരുന്നു ഒരാളുടെ കമന്റ്. മറ്റൊരാൾ പറഞ്ഞത് “ആഹ് നിങ്ങൾ ഇങ്ങനെ പാട്ടും പാടി നടന്നോ, ആ ജോർജുകുട്ടി കേസും തേച്ചു മായിച്ചു, പുല്ല് പോലെ നടപ്പുണ്ട്,” എന്നായിരുന്നു.

കമന്റുകൾ കണ്ട് എല്ലാവരും ആദ്യമൊന്ന് അമ്പരന്നെങ്കിലും പിന്നീടാണ് കാര്യം മനസിലായത്. ‘ദൃശ്യം’ എന്ന സിനിമയെ സൂചിപ്പിച്ചുകൊണ്ടാണ് കമന്റ്. ചിത്രത്തിൽ മോഹൻലാൽ അഭിനയിക്കുന്ന ജോർജ് കുട്ടി എന്ന കഥാപാത്രം തങ്ങളുടെ ജീവിതത്തിലെ വില്ലനായെത്തുന്ന വരുണിനെ കൊന്ന് പണി നടക്കുന്ന പൊലീസ് സ്റ്റേഷൻ സ്ഥലത്താണ് കുഴിച്ചിടുന്നത്. ഇതേക്കുറിച്ചാണ് രസകരമായ കമന്റുകൾ പ്രത്യക്ഷപ്പെട്ടിരിക്കുന്നത്.

Get all the Latest Malayalam News and Kerala News at Indian Express Malayalam. You can also catch all the Latest News in Malayalam by following us on Twitter and Facebook