കോമയില്‍ നിന്ന് ഉണര്‍ന്ന മകനെ വാരിപ്പുണര്‍ന്ന് അമ്മ; ഹൃദ്യം വീഡിയോ

ന്യൂഡല്‍ഹി: ഇന്റര്‍നെറ്റിലുള്ള ചില വീഡിയോകള്‍ നമ്മുടെ കണ്ണുകളെപ്പോലും ഈറനണിയിക്കും. 16 ദിവസം കോമയില്‍ തുടര്‍ന്നതിന് ശേഷം ജീവിതത്തിലേക്ക് മടങ്ങിയെത്തിയ മകനെ കണ്ട അമ്മയുടെ വീഡിയോയാണ് നെറ്റിസണ്‍സിന്റെ ഹൃദയം കവരുന്നത്.

ഗുഡ് ന്യൂസ് മൂവ്മെന്റ് എന്ന ഇന്‍സ്റ്റഗ്രാം പേജിലൂടെയാണ് വീഡിയോ പുറത്തെത്തിയിരിക്കുന്നത്. തന്റെ മകന്റെ മുറിയിലേക്ക് ആശുപത്രി കോറിഡോറിലൂടെ ഓടുന്ന അമ്മയെയാണ് വീഡിയോയില്‍ കാണാന്‍ സാധിക്കുന്നത്.

ഗുയ് എന്നാണ് കുട്ടിയുടെ പേര്. ചര്‍മ്മ രോഗവുമായി ബന്ധപ്പെട്ടാണ് കുട്ടിയെ ആശുപത്രിയില്‍ അഡ്മിറ്റ് ചെയ്തത്. അമ്മയെ വിളിച്ച് കരയുന്ന കുട്ടിയെയാണ് മുറിയുടെ വാതില്‍ തുറക്കുമ്പോള്‍ കാണുന്നത്. ഉടന്‍ തന്നെ അമ്മ കുട്ടിയെ വാരിപ്പുണരുന്നതും കാണാം.

ഡിസ്ട്രോഫിക് എപ്പിഡെർമോളിസിസ് ബുല്ലോസ എന്ന അപൂർവ ചർമ്മരോഗമാണ് കുട്ടിക്ക് ജന്മനാ ഉണ്ടായിരുന്നത്. 'ബൈൻഡിംഗ് പ്രോട്ടീൻ' എന്നറിയപ്പെടുന്ന ചർമ്മത്തെ എപ്പിഡെർമിസുമായി ബന്ധിപ്പിക്കുന്ന ടൈപ്പ് 7 കൊളാജൻ എന്ന പ്രോട്ടീന്റെ അഭാവമാണ് ഈ അവസ്ഥയ്ക്ക് കാരണം.

മാതാപിതാക്കളുടെ മാത്രമല്ല സ്വന്തം പരിചരണവും ഇത്തരം രോഗികള്‍ക്ക് ആവശ്യമാണ്. ചെറിയ കാര്യങ്ങള്‍ പോലും ശരീരത്തില്‍ മുറിവുകള്‍ ഉണ്ടാകുന്നതിന് കാരണമാകും. രോഗം മൂര്‍ച്ഛിച്ചതോടെയാണ് കുട്ടി കോമയിലേക്ക് പോയത്.