അടുത്ത 25 വര്‍ഷം ഓരോ മാസവും അഞ്ച് ലക്ഷം രൂപ വീതം; ദുബായിലെ ഫാസ്റ്റ് ഫൈവ് ലോട്ടറിയടിച്ച് ഇന്ത്യക്കാരന്‍

യഎഇയിലെ ഫാസ്റ്റ് ഫൈവ് നറുക്കെടുപ്പില്‍ കോളടിച്ച് ഉത്തര്‍ പ്രദേശ് സ്വദേശിയായ മുഹമ്മദ് അലി ഖാന്‍. ആദ്യ വിജയിയായി തിരഞ്ഞെടുക്കപ്പെട്ട മുഹമ്മദിന് അടുത്ത 25 വര്‍ഷം പ്രതിമാസം 5.5 ലക്ഷം രൂപ വീതം ലഭിക്കും.

വ്യാഴാഴ്ച നടന്ന നറുക്കെടുപ്പിലാണ് മുഹമ്മദ് അലിയെ വിജയിയായി തിരഞ്ഞെടുക്കപ്പെട്ടതെന്ന് ഗള്‍ഫ് ന്യൂസ് റിപ്പോര്‍ട്ട് ചെയ്യുന്നു. തന്റെ ജീവിതത്തിലെ സുപ്രധാന നിമിഷത്തിലാണ് ലോട്ടറി അടിച്ചതെന്ന് മുഹമ്മദ് പ്രതികരിച്ചു.

യുഎഇയിലെ ഒരു റിയല്‍ എസ്റ്റേറ്റ് കമ്പനിയില്‍ ഇന്റീരിയര്‍ ഡിസൈന്‍ കണ്‍സണ്‍ട്ടന്റായി ജോലി ചെയ്യുകയാണ് മുഹമ്മദ് അലി.

"എന്റെ കുടുംബത്തിലെ ഏക വരുമാന മാര്‍ഗം ഞാനാണ്. എന്റ സഹോദരന്‍ കോവിഡ് കാലത്ത് മരണപ്പെട്ടു. അതിനാല്‍ ഞാനാണ് കുടുംബത്തെ നോക്കുന്നത്. പ്രായമായ മാതാപിതാക്കളും ഒരു മകളുമാണ് എനിക്കുള്ളത്. ലോട്ടറി അടിച്ചത് കൃത്യസമയത്താണ്," മുഹമ്മദ് കൂട്ടിച്ചേര്‍ത്തു.

ഞാന്‍ എന്റെ കുടുംബത്തെ വിവരമറിയിച്ചെങ്കിലും അവര്‍ക്കും വിശ്വസിക്കാനായില്ല. വാര്‍ത്ത സ്ഥിരീകരിക്കാനാണ് എന്നോട് ആദ്യം ആവശ്യപ്പെട്ടത്, മുഹമ്മദ് പറഞ്ഞു. എമിറേറ്റ്‌സ് നറുക്കെടുപ്പ് സംഘടിപ്പിക്കുന്ന ടൈചെറോസിന്റെ മാർക്കറ്റിംഗ് മേധാവിയായ പോൾ ചാദറാണ് മുഹമ്മദിന് ലോട്ടറി അടിച്ച കാര്യം സ്ഥിരീകരിച്ചത്.