കാവിമുണ്ടും തോളത്തൊരു തോർത്തും; മലയാളം പാട്ടിനു താളം പിടിച്ച് സായിപ്പ്

കഴിഞ്ഞ ദിവസങ്ങളിൽ സോഷ്യൽ മീഡിയയിൽ ഏറെ വൈറലായ ഒരു റീലുണ്ട്. മലയാളിയായ ഭാര്യയ്ക്ക് ഒപ്പം ചെമ്മീനിലെ 'പെണ്ണാളേ പെണ്ണാളേ - കരിമീന്‍ കണ്ണാളേ കണ്ണാളേ' എന്ന ഗാനം പാടുന്ന ഒരു ജർമ്മൻകാരന്റെ വീഡിയോ. 'സായിപ്പിനെ കൊണ്ട് പെണ്ണാളേ പാടിക്കാൻ ശ്രമിച്ചതാ, സംഭവം കൈവിട്ടുപോയി' എന്ന അടിക്കുറിപ്പോടെ പ്രചരിച്ച വീഡിയോ കാണുന്നവരിലെല്ലാം ചിരിയുണർത്തുന്ന ഒന്നായിരുന്നു. ജർമ്മനിയിലെ മ്യൂണിച്ചിൽ നിന്നും ഡോക്ടർ പ്രഭ ബുർഖാർഡാണ് ഭർത്താവിനൊപ്പമുള്ള ഈ വീഡിയോ ഷെയർ ചെയ്തത്.

'പെണ്ണാളേ പെണ്ണാളേ - കരിമീന്‍ കണ്ണാളേ കണ്ണാളേ' എന്നു പാടി ബാക്കി പാടാനായി പ്രഭ മൈക്ക് പ്രിയതമനു കൈമാറുകയാണ്. പാട്ടിലെ 'തന്തന തന്തന തന്താന' എന്ന ഭാഗം സായിപ്പ് പാടി വന്നപ്പോൾ ആ ഉച്ഛാരണം കേൾക്കുന്നവരെയും ചിരിപ്പിക്കുന്ന രീതിയിലായി പോയി. ഇതിപ്പോ മൂന്നു തലമുറയുടെ അപ്പന് വിളിച്ചതു പോലായല്ലോ എന്നാണ് വൈറൽ പോസ്റ്റിനു താഴെ ചില രസികർ കമന്റ് ചെയ്തത്.

ഒറ്റ പാട്ടിലൂടെ തന്നെ വൈറലായ ഈ ജർമ്മൻ സ്വദേശിയുടെ മറ്റൊരു വീഡിയോയും ഇപ്പോൾ ശ്രദ്ധ കവരുകയാണ്. കാവി മുണ്ടുടുത്ത് തോളിലൊരു തോർത്തുമൊക്കെയായി പാചകം ചെയ്യുന്ന തിരക്കിലാണ് ആള്. അരികെ മലയാളം പാട്ടുമായി പ്രഭയുമുണ്ട്. പാട്ടിനു അനുസരിച്ച് താളം പിടിക്കുകയാണ് സായിപ്പ്.