കയ്യോണ്ട് അല്ലാട്ടോ വാസിങ് മിസീനിലാ, ഡ്രസ് ഇങ്ങനെയാ വാഷ് ചെയ്യേണ്ടത്; വീഡിയോയുമായി കിലുക്കാംപെട്ടി

കുട്ടികളുടെ കുസൃതി നിറഞ്ഞ സംസാരവും കുറുമ്പുകളുമൊക്കെ കാണാൻ ഏവർക്കും ഇഷ്ടമാണ്. അതുകൊണ്ടു തന്നെ പലപ്പോഴും കിലുക്കാംപെട്ടികളായ കുട്ടികളുടെ പാട്ടും ഡാൻസും തമാശകളുമൊക്കെ അടങ്ങിയ വീഡിയോകൾ പെട്ടെന്ന് ആളുകളുടെ ശ്രദ്ധ നേടാറുണ്ട്. വാഷിംഗ് മെഷീനിൽ തുണി അലക്കുന്നതെങ്ങനെ എന്നു വിശദീകരിക്കുന്ന ഒരു കുഞ്ഞിന്റെ വീഡിയോ ആണ് ഇപ്പോൾ ശ്രദ്ധ നേടുന്നത്.

"എങ്ങനെയാ ഡ്രസ് വാഷ് ചെയ്യാ എന്നു നോക്കാം. കയ്യോണ്ട് അല്ലാട്ടോ വാസിങ് മിസീനിലാ. കയ്യോണ്ട് വാഷ് ചെയ്യാൻ അമ്മ സമ്മതിക്കില്ല. ഞാൻ വെള്ളത്തിൽ കളിച്ച് നിൽക്കാന്ന് അറിയാം. അതുകൊണ്ട് അമ്മ വാസിങ് മിസീനിലെ വാഷ് ചെയ്യാൻ സമ്മതിക്കൂ," എന്നാണ് കുഞ്ഞ് ഇസബൽ പറയുന്നത്.

പിന്നീട് തുണിയലക്കലിന്റെ ഓരോ ഘട്ടങ്ങളായി വിശദീകരിക്കുന്നുമുണ്ട് കുഞ്ഞു ഇസബെൽ.

"ഇത്രയൂള്ളൂ, സിമ്പിളാ, എല്ലാ ബേബീസും മമ്മീസിനെ സഹായിക്കണംട്ടോ," എന്നു പറഞ്ഞുകൊണ്ടാണ് ഇസബെൽ വീഡിയോ അവസാനിപ്പിക്കുന്നത്.

സോഷ്യൽ മീഡിയയിലെ വൈറൽ താരമാണ് കുഞ്ഞ് ഇസബെൽ. 88000 ഫോളോവേഴ്സ് ഈ കുഞ്ഞു കുട്ടിയുടെ ഇൻസ്റ്റ അക്കൗണ്ട് ഫോളോ ചെയ്യുന്നുണ്ട്.