തെയ്യം മാതൃകയിൽ കൊൽക്കത്തയിൽ ദുര്‍ഗാ പൂജ പന്തൽ; ചിത്രങ്ങൾ

ബംഗാളിലെ ഏറ്റവും പ്രധാന ആഘോഷങ്ങളിലൊന്നാണ് ദുർഗ പൂജ. ദുർഗാ ദേവി മഹിഷാസുരനെ വധിച്ചതിന്റെ പ്രതീകമായാണ് ദുർഗാ പൂജ ആഘോഷിക്കുന്നത്.

ദുർഗാ പൂജയ്ക്കായി ബംഗാളിൽ പല ഇടങ്ങളിലും പന്തൽ നിർമ്മിക്കാറുണ്ട്. ദക്ഷിണ കൊൽക്കത്തയിലെ ഏറ്റവും പ്രശസ്തമായ രണ്ട് ദുർഗാ പൂജ പന്തലുകളാണ് ത്രിധാര അകൽബോധനും 66 പള്ളിയും.

വടക്കൻ മലബാറിലെ നൃത്ത കലാരൂപമായ തെയ്യത്തിന്റെ മാതൃകയിൽ ദുർഗാ പൂജ പന്തൽ നിർമ്മിച്ചിരിക്കുകയാണ് കൊൽക്കത്തയിലെ 66 പള്ളി ക്ലബ്ബ്.

ദുർഗാ പൂജയുടെ ചരിത്രത്തിൽ ആദ്യമായാണ് കേരള വാസ്തു വിദ്യാ രീതിയിൽ പന്തൽ ഒരുക്കിയത്. ഓരോ തവണയും വ്യത്യസ്ത മോഡലിലുള്ള പന്തൽ നിർമ്മിച്ച് ക്ലബ് ഭക്തരെ അദ്ഭുതപ്പെടുത്താറുണ്ട്.

ക്ലബ്ബിന്റെ 75-ാമത് പ്ലാറ്റിനം ജൂബിലി ആഘോഷങ്ങൾക്കും തുടക്കമായിട്ടുണ്ട്. ഈ പ്രത്യേക വർഷത്തെ അവിസ്മരണീയമാക്കുന്നതിനായാണ് കേരളത്തിലെ കലാരൂപങ്ങളിലൊന്നായ തെയ്യം പവലിയനിലേക്ക് കൊണ്ടുവന്നിരിക്കുന്നത്.

കേരളത്തിൽ നിന്നുള്ള ഏകദേശം 25 കലാകാരന്മാർ എത്തിയാണ് മണ്ഡപം നിർമ്മിച്ചത്. കഴിഞ്ഞ മൂന്ന് മാസത്തെ പരിശ്രമത്തിലൂടെയാണ് ഇത് യാഥാർത്ഥ്യമാക്കിയത്. ഏകദേശം 25 ലക്ഷം രൂപയാണ് ബജറ്റ്.

എല്ലാ ദിവസവും വൈകിട്ട് സന്ദർശകർക്ക് തെയ്യം അവതരണം തത്സമയം കാണാനും സംഘാടകർ അവസരം ഒരുക്കിയിട്ടുണ്ട്. എക്സ്പ്രസ് ഫോട്ടോ: ശശി ഘോഷ്.