ഗാസയിൽ പൊലിഞ്ഞ 18000 കുഞ്ഞുങ്ങളെ ഓർത്ത് കേരളം

യുദ്ധക്കെടുതിയിലും പട്ടിണിയിലും വലയുന്ന ഗാസയിലെ ജനങ്ങളോട് പ്രത്യേകിച്ച് ഇസ്രായേൽ നിഷ്ഠൂരമായി കൊന്നൊടുക്കുന്ന കുട്ടികളോട് ഐക്യദാർഢ്യം പ്രഖ്യാപിച്ചു കൊണ്ട് ചിന്ത രവി ഫൗണ്ടേഷനും പലസ്തീൻ സോളിഡാരിറ്റി ഫോറവും ചേർന്നാണ് ഗാസയുടെ പേരിൽ എന്ന കൂട്ടായ്മക്ക് തുടക്കം കുറിച്ചത്.

കൊച്ചി വഞ്ചി സ്‌ക്വയറിൽ വച്ച് ഒക്ടോബർ 2 വ്യാഴാഴ്ച പലസ്തീനോട് ഐകൃദാർഢ്യം പ്രഖ്യാപിച്ചുള്ള ആദ്യ കൂട്ടായ്മ നടന്നത്. കലാ-സാഹിത്യ- മാധ്യമ രംഗത്തെ നിരവധി പേർ ഒത്തുചേർന്നു. ഐക്യദാർഢ്യ സദസ്സ് ഇന്ത്യയിലെ പലസ്തീൻ അംബാസിഡർ അബ്ദുള്ള അബു ഷാവേശ് വീഡിയോ കോൺഫറൻസിലൂടെ ഉദ്ഘാടനം ചെയ്തു. "ഇസ്രായേൽ ആക്രമണത്തിൽ ഒരു പലസ്തീനിക്ക് ബന്ധുവിനെ നഷ്ടമായോ എന്നല്ല ചോദിക്കേണ്ടത്. മറിച്ച് എത്ര ബന്ധുക്കളെ നഷ്ടമായെന്നാണ് ചോദിക്കേണ്ടത്."- അബ്ദുള്ള അബു ഷാവേശ് പറഞ്ഞു.

യോഗത്തിൽ പങ്കെടുത്തവർ പലസ്തീനോട് ഐകൃദാർഢ്യം പ്രഖ്യാപിച്ച് കഫീൻ ധരിച്ചെത്തി ഗാസയിൽ കൊല്ലപ്പെട്ട കുട്ടികളുടെ പേരുകൾ ഉറക്കെ വായിച്ചു.

കോളേജ് വിദ്യാർഥികളുടെ നേതൃത്വത്തിൽ പലസ്തീൻ നാടോടി നൃത്തമായ ഡബ്‌കെ അവതരിപ്പിച്ചു.

2023 ഒക്‌ടോബർ ഏഴിന് നടന്ന ഹമാസ് ആക്രമണത്തിന് പിന്നാലെ ഇസ്രായേൽ ആരംഭിച്ച ഗാസ യുദ്ധത്തിൽ ഇതുവരെ ഏകദേശം 18000-ലധികം കുട്ടികൾ കൊല്ലപ്പെട്ടെന്നാണ് കണക്കാക്കുന്നത്.

കൊച്ചിയിൽ നടന്ന സദസ്സിൽ കൊല്ലപ്പെട്ട 1500 കുട്ടികളുടെ പേരുകൾ വായിച്ചു. വരും ദിവസങ്ങളിൽ പാലക്കാടും വയനാടും സദസ്സ് സംഘടിപ്പിക്കും.

കേരളത്തിലെ മറ്റ് ജില്ലകളിലും സമാനമായ ഒത്തുചേരലുകൾ നടക്കും. സംഘർഷത്തിൽ ജീവൻ നഷ്ടപ്പെട്ട എല്ലാ നിരപരാധികളായ കുട്ടികൾക്കും ആദരാഞ്ജലികൾ അർപ്പിക്കും.

നെയിംസ് ഓഫ് ഗാസ എന്ന പേരിൽ സെപ്റ്റംബറിൽ ബെൽജിയൻ തലസ്ഥാനമായ ബ്രസ്സൽസിൽ നടന്ന സമ്മേളനത്തോട് സമാനമായാണ് കേരളത്തിലും ഐക്യദാർഢ്യം സംഘടിപ്പിക്കുന്നത്.

ഗാസയിൽ സമാധാനം പുലരട്ടെയെന്ന പ്രത്യാശയോടെയാണ് ഈ ഒരു കൂട്ടായ്മക്ക് തുടക്കം കുറിച്ചിരിക്കുന്നത്.