അണ്ണനും തമ്പിയും ഒത്തുച്ചേർന്നാൽ; ആരാധകർക്കതിൽപരം എന്തുവേണം!

മമ്മൂട്ടിയും മോഹൻലാലും ഒന്നിച്ചെത്തുന്ന വേദികളും ഇരുവരും നിറഞ്ഞു ചിരിക്കുന്ന ചിത്രങ്ങളും എന്നും താരരാജാക്കന്മാരുടെ ആരാധകർക്ക് ഉത്സവപ്രതീതി സമ്മാനിക്കുന്ന കാഴ്ചയാണ്. കാരണം ഒരു നാണയത്തിന്റെ ഇരുവശങ്ങൾ പോലെയാണ് മലയാളസിനിമയ്ക്ക് മമ്മൂട്ടിയും മോഹൻലാലും

എംടി വാസുദേവൻനായരുടെ നവതിയാഘോഷത്തിൽ പങ്കെടുക്കാനായി ഒന്നിച്ചെത്തിയപ്പോൾ പകർത്തിയ ചിത്രമാണ് ഇപ്പോൾ വൈറലാവുന്നത്.

നാല് പതിറ്റാണ്ടിലധികമായി മലയാള സിനിമയുടെ നെടും തൂണുകളായി നിലനില്‍ക്കുന്നവരാണ് ഇരുവരും. അഭിനയത്തില്‍ ആരോഗ്യപരമായ മത്സരം എല്ലാ കാലത്തും ഇരുവരും തമ്മിലുണ്ട്, അതുപോലെ തന്നെയാണ് സൗഹൃദവും. ഇച്ചാക്കയുടേയും ലാലുവിന്റേയും സൗഹൃദത്തിന്റെ കഥകള്‍ എത്രകേട്ടാലും മതിയാവാത്തവരാണ് മലയാളികള്‍.

മോഹൻലാലിന് മമ്മൂട്ടി ഇച്ചാക്കയാണ്, മമ്മൂട്ടിയ്ക്ക് ലാലുവും. ഇരുവരുടെയും ആരാധകർ തമ്മിൽ പോർവിളികളും മത്സരബുദ്ധിയുമൊക്കെ മുറുകുമ്പോഴും അതിനുമെല്ലാം അപ്പുറം ഇരുവരും പങ്കിടുന്ന സൗഹൃദം മാതൃകാപരമാണ്.

‘നീലനുണ്ടായതു കൊണ്ട് മാത്രമാണ് മുണ്ടയ്ക്കൽ ശേഖരനുണ്ടായതെന്ന’ രഞ്ജിത്ത് ചിത്രം ‘രാവണപ്രഭു’വിലെ നെപ്പോളിയൻ കഥാപാത്രത്തിന്റെ തിരിച്ചറിവു പോലെയൊരു പരസ്പരപൂരകമായ ദ്വന്ദമാണത്.

നാലു പതിറ്റാണ്ടിലേറെയായി മലയാള സിനിമാ ആസ്വാദകരുടെ മനസ്സിലും അഭ്രപാളികളിലും പകരക്കാരില്ലാത്ത രീതിയിൽ ഇരിപ്പുറപ്പിച്ചവരാണ് ഇരുവരും.

പല കാലങ്ങളിലായി 25 ലേറെ ചിത്രങ്ങളിലാണ് ഇരുവരും ഒന്നിച്ചഭിനയിച്ചത്.