മദ്യം ജീവിതത്തെ നിയന്ത്രിച്ചിരുന്ന ഒരു കാലമുണ്ടായിരുന്നു; ശ്രുതി ഹാസൻ മനസ്സ് തുറക്കുന്നു

നടനും ഗായികയുമായ ശ്രുതി ഹാസനെ സംബന്ധിച്ചിടത്തോളം മികച്ച വർഷമാണ് 2023. രണ്ട് ബ്ലോക്ക്ബസ്റ്റർ തെലുങ്ക് ചിത്രങ്ങളിൽ അവർ പ്രധാന കഥാപാത്രങ്ങളെ അവതരിപ്പിച്ചു - വീര സിംഹ റെഡ്ഡി, വാൾട്ടയർ വീരയ്യ എന്നീ സിനിമകൾ.

നിരൂപക പ്രശംസ നേടിയ ഹിറ്റ് സിനിമയായ 'ഹായ് നാന'യിൽ അതിഥി വേഷം ചെയ്ത സൃതിയുടെ മൂന്നാമത്തെ സോളോ ഗാനമായ 'മോൺസ്റ്റർ മെഷീൻ' ഈ വർഷം പുറത്തിറങ്ങി. പ്രശാന്ത് നീലിന്റെ പ്രഭാസ് നായകനായ 'സലാർ: ഭാഗം 1'ലും ശ്രുതി എത്തുകയാണ്.

ഇതുമായി ബന്ധപ്പെട്ട ഒരു അഭിമുഖത്തിനിടെ, തനിക്കു ഉണ്ടായിരുന്ന മദ്യപാന ശീലത്തെക്കുറിച്ചും എന്തു കൊണ്ടാണ് താൻ മദ്യപാനം ഉപേക്ഷിക്കാൻ തീരുമാനിച്ചതെന്നും ശ്രുതി തുറന്നു പറഞ്ഞു.

"എട്ടു വർഷമായി ഞാൻ സോബർ ആണ്. നിങ്ങൾ മദ്യപിക്കാത്തപ്പോൾ പാർട്ടി സാഹചര്യങ്ങളിൽ മദ്യപിക്കുന്ന ആളുകളെ സഹിക്കാൻ പ്രയാസമാണ്," ശ്രുതി പറഞ്ഞു.

"മദ്യം ഉപേക്ഷിച്ചതിൽ എനിക്ക് ഖേദമില്ല. ഇപ്പോൾ ഹാംഗ് ഓവറുകൾ ഇല്ല, ശാന്തമായിരിക്കുന്നതാണ് ഏറ്റവും നല്ലത്,” കമൽ ഹാസൻ- സരിക ദമ്പതികളുടെ മകളായ ശ്രുതി പറഞ്ഞു.

മദ്യപാനത്തിന്റെ പേരിൽ താൻ ആരെയും ജഡ്ജ് ചെയ്യില്ല എന്ന് ഊന്നിപ്പറഞ്ഞ ശ്രുതി, "ഇത് നിങ്ങളുടെ ജീവിതതിലെ ഒരു ഘട്ടമായിരിക്കാം, അല്ലെങ്കിൽ നിങ്ങളുടെ ജീവിതകാലം മുഴുവൻ ഇത് ചെയ്യാൻ നിങ്ങൾ ആഗ്രഹിച്ചേക്കാം എന്തായാലൂം 'ചിൽ' ആണ്," എന്നും കൂട്ടിച്ചേർത്തു.

"ഞാൻ ഒരിക്കലും മയക്കുമരുന്നിന് അടിമയായിരുന്നില്ല, പക്ഷേ മദ്യം എന്റെ ജീവിതത്തിലെ ഒരു വലിയ കാര്യമായിരുന്നു. [ഒരു ഘട്ടത്തിന് ശേഷം] അത് എന്നെ സഹായിച്ചില്ല, ഒരു പോസിറ്റീവ് തരത്തിലും... എപ്പോഴും സുഹൃത്തുക്കളോടൊപ്പം കുടിക്കാൻ ഞാൻ ആഗ്രഹിച്ചു... അത് എന്നെ കൂടുതൽ നിയന്ത്രിക്കുന്നതായി എനിക്ക് തോന്നി."

സിഗരറ്റാണ് ഏറ്റവും മോശമായത് എന്നും ശ്രുതി ഹാസൻ പറഞ്ഞു.

നിരന്തരം പാർട്ടികൾ നിർദ്ദേശിക്കുന്നതിലൂടെ തന്റെ മദ്യപാനശീലം വഷളാക്കുന്ന പലരിൽ നിന്നും, പ്രത്യേകിച്ച് ഫ്രീലോഡർമാരിൽ നിന്നും അകന്നു നിൽക്കാനാണ് താൻ ഈ നടപടി സ്വീകരിച്ചതെന്നും ശ്രുതി പങ്കുവെച്ചു.

അച്ഛൻ കമൽഹാസന്റെ ചിത്രമായ 'ഹേ റാമി'ലൂടെയാണ് ശ്രുതി അഭിനയ രംഗത്തേക്ക് വരുന്നത്.