റിയാദ്​: കാഴ്ചക്കാർക്ക് കൗതുകവും ആനന്ദവും നിറഞ്ഞ വിസ്മയ പ്രകടനം കാഴ്ചവയ്ക്കാൻ ലോക​പ്രശസ്​ത കായികാഭ്യാസ സംഘം നിട്രോ സർക്കസ്​ ആദ്യമായി സൗദിയിലെത്തുന്നു. ഒരു രാജ്യാന്തര സർക്കസ്​ സംഘം സൗദി കുടുംബ സദസ്സിന് മുന്നിലെത്തുന്നത് ഇതാദ്യമാണ്. സർക്കസ് കലയിലെ മാസ്മരിക പ്രകടനങ്ങൾ നേരിൽ കണ്ട്​ ആസ്വദിക്കാൻ അവസരമൊരുങ്ങിയതിന്റെ ആഹ്ലാദത്തിലാണ് റിയാദിലെ സ്വദേശികളും വിദേശികളുമുൾപ്പെടുന്ന കലാസ്‌നേഹികൾ​. സൗദി വിനോദരംഗത്ത്​ മാറ്റത്തിന്റെ കാറ്റ് വീശി നവംബർ മൂന്ന്, നാല്​ തീയതികളിൽ മിന്നും അഭ്യാസപ്രകടനങ്ങൾക്ക് റിയാദ്​ ബഗ്ലഫിലെ കിങ്​ ഫഹദ്​ രാജ്യാന്തര സ്റ്റേഡിയം വേദിയാകും​.

സൗദി ജനറൽ എന്റർടൈൻമെന്റ്​ അതോറിറ്റിയും ടൈം എന്റർടൈൻമെന്റും സംയുക്തമായാണ്​ വിസ്മയ കാഴ്​ചാനുഭവങ്ങൾ സൗദി കാണികൾക്ക്​ സമ്മാനിക്കാൻ ഒരുങ്ങുന്നത്​. വെള്ളിയാഴ്​ച വൈകീട്ട്​ 7.30നും ശനിയാഴ്​ച വൈകീട്ട് 5.30നുമാണ്​ പ്രദർശനങ്ങൾ. പ്രധാനമായും കുടുംബസദസിന്​ വേണ്ടിയാണ്​ വിശാലമായ സ്​റ്റേഡിയത്തിൽ ലോകോത്തര അഭ്യാസപ്രകടനങ്ങൾ അരങ്ങേറുക. ​ആഗോള സർക്കസ്​ രംഗത്തെ മിന്നും താരങ്ങളായ 30 അത്​ലറ്റുകളുടെ സംഘം അഭ്യാസപ്രകടനങ്ങൾ നടത്താനെത്തും. കാർ, ബൈക്ക്​, സ്​കൂട്ടർ പോലുള്ള വാഹനങ്ങളും കുതിര, മഞ്ഞുപാളികളിൽ തെന്നിനീങ്ങാനുള്ള പാദുകം, കളിപ്പാട്ട കാർ എന്നിവയും ഉപയോഗിച്ചുള്ള അത്യന്തം അപകടകരവും സാഹസികവുമായ അഭ്യാസ പ്രകടനങ്ങളും ട്രിപ്പിൾ എയറോബിക്​സ്​ പോലുള്ള മറ്റ്​ സർക്കസ്​ ഇനങ്ങളും കാണികൾക്ക്​ വിസ്​മയാനുഭവം പകരും.

കായികാഭ്യാസികൾ 40 അടി ഉയരത്തിൽ നിന്ന്​ ആകാശപാതയിലൂടെ സ്​റ്റേഡിയത്തിലേക്ക്​ ഇറങ്ങിവരുന്ന കണ്ണഞ്ചിപ്പിക്കുന്ന അഭ്യാസപ്രകടനത്തോടെയാണ്​ പരിപാടിയുടെ തുടക്കം​. അഞ്ച്​ തരം പ്രവേശന ഫീസാണ്​ നിശ്ചയിച്ചിരിക്കുന്നത്​. വിഐപി ടിക്കറ്റിന്​ 750 റിയാലാണ്​ നിരക്ക്​. പ്ലാറ്റിനം (500 റിയാദൽ), ഡയമണ്ട്​ (200 റിയാൽ), ഗോൾഡ്​ (100 റിയാൽ), സിൽവർ (50 റിയാൽ) എന്നിവയാണ്​ മറ്റ്​ വിഭാഗങ്ങൾ. രണ്ട്​ വയസിൽ കുറവുള്ള കുട്ടികൾക്ക്​ പ്രവേശനം സൗജന്യം. വിഭിന്നശേഷിക്കാർക്ക്​ പ്രത്യേക സൗകര്യം ഏർപ്പെടുത്തും. www.ticketmasterksa.com എന്ന വെബ്​സൈറ്റിൽ ടിക്കറ്റ്​ ബുക്കിങ്ങിന്​ സൗകര്യമുണ്ട്​.

വാർത്ത: നൗഫൽ പാലക്കാടൻ

Get all the Latest Malayalam News and Kerala News at Indian Express Malayalam. You can also catch all the Latest News in Malayalam by following us on Twitter and Facebook