റിയാദ്: റമസാൻ മാസത്തിന്റെ പുണ്യം തേടി മക്കയിലും മദീനയിലും എത്തുന്ന തീർത്ഥാടകർക്ക് ഇത്തവണ കനത്ത സുരക്ഷയാണ് സൗദി ഗവൺമെന്റ് ഒരുക്കിയിട്ടുള്ളത്. സൗദി വ്യോമയാന വകുപ്പിന് കിഴിൽ മക്കയിലെ മസ്ജിദുൽ ഹറമിലും പരിസരത്തുമായി ഒൻപത് ഹെലികോപ്റ്ററുകളാണ് സുരക്ഷാ ചിറകുകൾ വിരിച്ച് പറക്കുന്നത്. അത്യാധുനിക സംവിധാനത്തോടെയുള്ള ഹെലികോപ്റ്ററുകൾ ഹറം മസ്ജിദ് പരിസരം, ഹറാമിലേക്ക് എത്തിചേരുന്ന വഴികൾ, ജിദ്ദ, മക്ക, മദീന എന്നീ നഗരങ്ങളുമായി ബന്ധിപ്പിക്കുന്ന പ്രധാന ഹൈവേകൾ ഉൾപ്പടെ എല്ലാ നിരത്തുകളിലും ഹെലികോപ്റ്ററിന്റെ സുരക്ഷ പരിശോധനയുണ്ടാകും.

ആധുനിക ടെലികമ്മ്യൂണിക്കേഷൻ ടെക്‌നോളജിയും പ്രഥമ വൈദ്യസഹായം നൽകാൻ വേണ്ട എല്ലാ സൗകര്യങ്ങളോടും കൂടിയാണ് ഹെലികോപ്‌റ്ററുകൾ പറക്കുന്നതെന്ന് വ്യോമയാന സുരക്ഷാ കമാൻഡർ മുഹമ്മദ് ബിൻ ഈദ് അൽ ഹറബി വ്യക്തമാക്കി. അടിയന്തിര വൈദ്യസഹായം ആവശ്യം വന്നാൽ രോഗികളുമായി പറന്നെത്തുന്ന ഹെലോകോപ്റ്ററുകളെ സ്വീകരിക്കാൻ ഹോസ്പിറ്റലുകളിൽ ഹെലിപാഡുകളും പ്രവർത്തന സജ്ജമായിട്ടുണ്ട്. കിങ് അബ്ദുല്ല മെഡിക്കൽ സിറ്റി, അൽ നൂർ ഹോസ്പിറ്റൽ, ഹിറ ഹോസ്പിറ്റൽ എന്നിവിടങ്ങളിലാണ് അടിയന്തിര വൈദ്യസഹായത്തിനായി രോഗികളുമായെത്തുന്ന ഹെലികോപ്റ്ററുകൾക്ക് ലാൻഡ് ചെയ്യാൻ ഹെലിപാഡുകൾ ഒരുക്കിയിട്ടുള്ളത്.

വ്യോമയാന സുരക്ഷക്ക് പുറമെ റമസാനിൽ മക്കയിലുണ്ടാകുന്ന തിരക്ക് നിയന്ത്രിക്കുന്നതിനും ഹറാമിലെത്തുന്ന തീർത്ഥാടകർക്ക് സേവനങ്ങൾ നൽകുന്നതിനും വിവിധ സുരക്ഷാ വകുപ്പുകൾക്ക് കീഴിൽ പ്രവർത്തനങ്ങൾ സുസജ്ജമാണ്. മക്കയിൽ ട്രാഫിക് വിഭാഗം 119 ഓഫിസർമാരുടെ കീഴിലായി 3000 പേർ സേവനരംഗത്തുണ്ട്. ട്രാഫിക് നിയമ ലംഘനങ്ങൾ നിരീക്ഷിക്കാൻ രഹസ്യ പൊലീസ് സംഘങ്ങളും ക്യാംപ് ചെയ്യുന്നുണ്ട്. ഹറം പരിസരത്ത് തിരക്ക് കുറക്കാൻ ഗതാഗത നിയന്ത്രണമുണ്ടാകും. സമാധാനപൂർണ്ണവും ഭക്തിനിർഭരവുമായ അന്തരീക്ഷത്തിൽ ഉംറ നിർവഹിക്കാനും സന്ദർശനം നടത്താനും എല്ലാ ഒരുക്കങ്ങളും സൗദി ഗവൺമെന്റ് പൂർത്തിയാക്കിയിട്ടുണ്ട്.

വാർത്ത: നൗഫൽ പാലക്കാടൻ

Get all the Latest Malayalam News and Kerala News at Indian Express Malayalam. You can also catch all the Latest News in Malayalam by following us on Twitter and Facebook