റിയാദ്​: പഠന മികവ്​ തെളിയിക്കുന്ന പ്രവാസി വിദ്യാർഥികൾക്ക്​ ഡോക്​ടേഴ്​സ്​ ക്ലിനിക്കൽ ഫോറം (റിയാദ്​ ഇന്ത്യൻ മെഡിക്കൽ അസോസിയേഷൻ) എൻഡോവ്​മെന്റ്​ ഏർപ്പെടുത്തി. വൃക്കമാറ്റിവയ്​ക്കൽ ശസ്​ത്രക്രിയക്ക്​ വിധേയനായി ചികിത്സയിൽ കഴിയുന്നതിനിടെ കഴിഞ്ഞ വർഷം ഓഗസ്​റ്റ്​ നാലിന്​ എറണാകുളത്തെ സ്വകാര്യ ആശുപത്രിയിൽ മരിച്ച റിയാദ്​ മിഡിൽ ഈസ്​റ്റ്​​ ഇന്റർനാഷനൽ സ്​കൂൾ പൂർവ വിദ്യാർഥി ജോ ജോഷിയുടെ സ്​മരണാർഥമാണ്​ സ്​കോളർഷിപ്പ്​ ഏർപ്പെടുത്തിയതെന്ന്​ ഫോറം ഭാരവാഹികൾ വാർത്താസമ്മേളനത്തിൽ അറിയിച്ചു.

ജോ ജോഷി

റിയാദിലെ​ ഇന്ത്യൻ സ്​കൂളുകളിൽ നിന്ന്​ ഓരോ വർഷവും ഏറ്റവും ഉയർന്ന മാർക്കിൽ പാസാവുന്ന 10-ാം ക്ലാസ്​ വിദ്യാർഥിക്കാണ്​ 10,000 രൂപയും പ്രശസ്​തി പത്രവും പ്രശംസാഫലകവും അടങ്ങുന്ന എൻഡോവ്​മെന്റ് സമ്മാനിക്കുക. മുഴുവൻ വിഷയങ്ങളിലുമായി ഏറ്റവും ഉയർന്ന മാർക്ക്​ വാങ്ങുന്ന വിദ്യാർഥിക്കാണ്​ പുരസ്​കാരമെങ്കിലും ഒന്നിൽ കൂടുതൽ പേരുണ്ടായാൽ ഫിസിക്​സ്​, കെമിസ്​ട്രി, ബയോളജി, ഗണിതം എന്നീ വിഷയങ്ങളിലെല്ലാം കൂടി നേടിയ മാർക്കിന്റെ അടിസ്​ഥാനത്തിൽ അർഹരായ കുട്ടിയെ കണ്ടെത്തുമെന്ന്​ ഭാരവാഹികൾ വിശദീകരിച്ചു. ഈ വർഷം മുതൽ എൻഡോവ്​മെന്റ് കൊടുത്തു തുടങ്ങും.

Get all the Latest Malayalam News and Kerala News at Indian Express Malayalam. You can also catch all the Latest News in Malayalam by following us on Twitter and Facebook