ആദായനികുതി ആനുകൂല്യം പ്രചാരണത്തിനപ്പുറം "പണികിട്ടുന്ന" മധ്യവർഗം

2025-26 ലെ ബജറ്റിൽ മധ്യവർഗത്തെ, പ്രത്യേകിച്ച് നഗരപ്രദേശങ്ങളിലെ ശമ്പളക്കാരായ, നികുതി അടയ്ക്കുന്ന മധ്യവർഗത്തെ, തൃപ്തിപ്പെടുത്തുന്നതിനായി എന്തെങ്കിലും ചെയ്യുന്നതിനായി വലിയ തോതിൽ പ്രചാരണം നടന്നിരുന്നു. ഫെബ്രുവരി അഞ്ചിന് നടക്കാനിരിക്കുന്ന ഡൽഹി നിയമസഭാ തിരഞ്ഞെടുപ്പിൽ ഇത് ചർച്ചാ വിഷയങ്ങളിലൊന്നായിരുന്നു എന്നത് യാദൃശ്ചികമല്ല.

ജനുവരി 16 ന് സർക്കാർ എട്ടാം കേന്ദ്ര ശമ്പള കമ്മീഷൻ രൂപീകരിക്കുന്നതായി പ്രഖ്യാപിച്ചിരുന്നു, ഇത് കേന്ദ്ര, സംസ്ഥാന സർക്കാർ ജീവനക്കാർക്ക് ഉയർന്ന ശമ്പളവും അലവൻസുകളും ലഭിക്കുമെന്ന പ്രതീക്ഷകൾ ഉയർത്തിയിരുന്നു. കഴിഞ്ഞ വർഷത്തെ ശമ്പള, ക്ഷാമബത്തയുടെ (ഡിഎ) 50 ശതമാനത്തിന് തുല്യമായ പെൻഷൻ ഉറപ്പുനൽകുന്ന ഏകീകൃത പെൻഷൻ പദ്ധതി (യുപിഎസ്) ജനുവരി 25 ന് വിജ്ഞാപനം ചെയ്തു.

പുതിയ ബജറ്റിൽ ധനമന്ത്രി നിർമ്മല സീതാരാമൻ  ഒരു പടികൂടി മുന്നോട്ട് പോയി. പുതിയ നികുതി വ്യവസ്ഥയിൽ നികുതി റിട്ടേൺ സമർപ്പിക്കുന്ന എല്ലാ നികുതിദായകർക്കും പ്രതിവർഷം 12 ലക്ഷം രൂപ വരെയുള്ള വരുമാനത്തെ ആദായനികുതി രഹിതമാക്കുകയും 24 ലക്ഷം രൂപ വരെയുള്ള വരുമാനത്തെ കുറഞ്ഞ നികുതി നിരക്കുകൾക്ക് വിധേയമാക്കുകയും ചെയ്തു. ഇതിനർത്ഥം ഒരു ലക്ഷം കോടി രൂപയുടെ ആദായനികുതി വരുമാനം ഉപേക്ഷിക്കലാണ്.

ഈ ഇളവുകൾ ഇന്ത്യയുടെ "മധ്യവർഗത്തെ" ആകർഷിക്കാൻ പര്യാപ്തമാണോ? ഇന്ത്യയുടെ ചാഞ്ചാടുന്ന ഉപഭോഗ വളർച്ചയുടെ കഥ മാറ്റുന്നതിൽ ഇത് വിജയിക്കുമോ?

ഇന്ത്യയുടെ വ്യക്തിഗത ആദായ നികുതി ഘടനയ്ക്ക് രണ്ട് വലിയ പ്രശ്‌നങ്ങളുണ്ടായിരുന്നു. ഒന്ന്, പഴയ പദ്ധതി പ്രകാരം 2.5 ലക്ഷം രൂപ (പുതിയ പദ്ധതി പ്രകാരം മൂന്ന് ലക്ഷം രൂപ) എന്ന നികുതി ഇളവ് പരിധി വളരെ കുറവായിരുന്നു. രണ്ടാമതായി, 30 ശതമാനം എന്ന പരമാവധി നികുതി നിരക്ക് പഴയ പദ്ധതി പ്രകാരം 10 ലക്ഷം രൂപയിൽ മുതല്‍ (പുതിയ പദ്ധതി പ്രകാരം 15 ലക്ഷം രൂപ മുതല്‍) കണകാക്കപെട്ടിരുന്നു. ഇത് നികുതിദായകരുടെ മേൽ അസഹനീയമായ ആദായ നികുതി ഭാരം ചുമത്തി. ധനമന്ത്രി നിർമ്മല സീതാരാമൻ രണ്ട് പ്രശ്‌നങ്ങളും ഒഴിവാക്കി.

ഏറ്റവും കുറഞ്ഞ നികുതി പരിധി നാല് ലക്ഷം രൂപയായി ഉയർത്തി, 30 ശതമാനം നിരക്ക് സ്ലാബ് ഇപ്പോൾ 24 ലക്ഷം രൂപയിൽ മാത്രമേ പ്രാബല്യത്തിൽ വന്നിട്ടുള്ളൂ. ധനമന്ത്രി അവകാശപ്പെടുന്നതുപോലെ, വളരെ ആവശ്യമായ ഈ നികുതി പരിഷ്കരണം, എട്ട് ലക്ഷം മുതൽ 24 ലക്ഷം രൂപ വരെ വരുമാനമുള്ള നികുതിദായകരുടെ നികുതി ഭാരം പ്രതിവർഷം 10,000 മുതൽ 1.10 ലക്ഷം രൂപ വരെ കുറയ്ക്കുന്നു. ഇതിനുപുറമെ, 12 ലക്ഷം രൂപയിൽ താഴെ ആകെ വരുമാനമുള്ള നികുതിദായകർ അടയ്ക്കേണ്ട നികുതിക്ക് റിബേറ്റ് അനുവദിച്ചുകൊണ്ട് ധനമന്ത്രി പൂർണ്ണമായും ഒഴിവാക്കി. അത്തരം നികുതിദായകർക്ക് 20,000 മുതൽ 60,000 രൂപ വരെ റിബേറ്റ് ആനുകൂല്യങ്ങൾ ലഭിക്കും. നികുതി സ്ലാബിന്റെയും റിബേറ്റിന്റെയും സംയോജിത ആനുകൂല്യങ്ങൾ 30,000 മുതൽ 1.10 ലക്ഷം രൂപ വരെയാണെന്ന് അവകാശപ്പെടുന്നു.

ഇതുവരെ, എല്ലാം നന്നായി. എന്നാൽ ഇതുമായി, ബന്ധപ്പെട്ട പ്രധാനപ്പെട്ട ചോദ്യങ്ങൾ ഇവയാണ്: അവകാശപ്പെടുന്നതിനേക്കാൾ യഥാർത്ഥ നേട്ടം എന്തായിരിക്കും, മധ്യവർഗത്തിലെ   എത്ര പേർക്ക് പ്രയോജനം ലഭിക്കാൻ സാധ്യതയുണ്ട്?

പുതിയ നികുതി വ്യവസ്ഥയ്ക്ക് കീഴിലുള്ള നികുതിദായകർക്ക് മാത്രമേ പുതിയ സ്ലാബുകൾ, നിരക്കുകൾ, റിബേറ്റുകൾ എന്നിവ ബാധകമാകൂ. പുതിയ പദ്ധതി പ്രകാരം വിലയിരുത്തപ്പെടുന്ന ആർക്കും വാടക വരുമാനത്തിൽ നിന്നോ നഷ്ടത്തിൽ നിന്നോ കിഴിവ് അനുവദിച്ചിരിക്കുന്ന ഭവന വായ്പകൾക്ക് നൽകുന്ന പലിശ, വീട്ടു വാടക അലവൻസ്, മെഡിക്കൽ ഇൻഷുറൻസ് പ്രീമിയം, അവധി യാത്രാ ഇളവ് തുടങ്ങിയ നിരവധി ഇളവുകളുടെയും മറ്റും ആനുകൂല്യം ലഭിക്കുന്നില്ല. അതിനാൽ, കുറഞ്ഞ ആദായ നികുതി ബാധ്യതയേക്കാൾ കുറഞ്ഞ ഇളവുകൾ അവകാശപ്പെടുന്ന നികുതിദായകർ മാത്രമേ പുതിയ നികുതി വ്യവസ്ഥയിലേക്ക് മാറൂ. നിലവിൽ പഴയ സംവിധാനം തിരഞ്ഞെടുക്കുന്ന ഏകദേശം മൂന്ന് കോടി ആദായ നികുതിദായകരിൽ, ധനമന്ത്രി പ്രഖ്യാപിച്ച നികുതി ആനുകൂല്യത്തിൽ നിന്ന് 50 ലക്ഷത്തിൽ കൂടുതൽ പേർക്ക് പ്രയോജനം ലഭിക്കാൻ സാധ്യതയില്ല. അവരുടെ ആനുകൂല്യത്തിന്റെ വ്യാപ്തി അവർ ഉപേക്ഷിക്കുന്ന ഇളവുകൾ/കിഴിവുകൾ എന്നിവയെ ആശ്രയിച്ചിരിക്കും.

ആദായ നികുതി ഇളവുകൾ വാഗ്ദാനം ചെയ്ത് ഒരു ലക്ഷം കോടി രൂപ ത്യാഗം ചെയ്യുമെന്ന ധനമന്ത്രിയുടെ അവകാശവാദവും വളരെ അതിശയോക്തിപരമാണ്. വ്യക്തിഗത ആദായ നികുതിയിലൂടെ 2025-26 ൽ സർക്കാരിന് 14.38 ലക്ഷം കോടി രൂപയുടെ വരുമാനം ലഭിക്കുമെന്ന് കണക്കാക്കപ്പെടുന്നു എന്ന വസ്തുത ഇതിന് തെളിവാണ്, ഇത് 2024-25 ലെ ബജറ്റ് എസ്റ്റിമേറ്റിനേക്കാൾ 21.15 ശതമാനം കൂടുതലാണ് (മൊത്ത നികുതി വരുമാനത്തിന് 11.20 ശതമാനം, കോർപ്പറേഷൻ നികുതികൾക്ക് 6.08 ശതമാനം, ചരക്ക് സേവന നികുതിക്ക് 10.93 ശതമാനം എന്നിങ്ങനെയാണ് കണക്കാക്കിയ വളർച്ച). സർക്കാർ ത്യാഗം ചെയ്താൽ ഇത്രയും ഉയർന്ന വളർച്ച സംഭവിക്കില്ല.

മാത്രമല്ല, പഴയ നികുതി വ്യവസ്ഥയിൽ നികുതിദായകർക്ക് പുതിയ നികുതി സ്ലാബുകൾ ബാധകമാക്കാത്തതിലൂടെ, ധനമന്ത്രി രണ്ടര മുതൽ മൂന്ന്  ( 2.5-3) കോടിവരെയുള്ള മധ്യവർഗ നികുതിദായകരോട് വലിയ ദ്രോഹമാണ് ചെയ്തത്.

2025-26 ലെ ബജറ്റിൽ ധനമന്ത്രി നൽകിയ ആശ്വാസത്തിന്റെ ഗുണം ലഭിക്കാൻ സാധ്യതയുള്ള അമ്പത് ലക്ഷം ആദായനികുതിദായകർ ഇന്ത്യയിലെ മധ്യവർഗത്തിൽ പെടുന്നില്ല. 2024-25 ൽ പി എഫ് സി ഇ ( സാമ്പത്തിക മേഖലയ്ക്കുള്ളിലോ പുറത്തോ നടത്തുന്ന സാധനങ്ങളുടെയും സേവനങ്ങളുടെയും അന്തിമ ഉപഭോഗത്തിനായി സ്ഥിരവാസികളായ കുടുംബങ്ങളും കുടുംബങ്ങൾക്ക് സേവനം നൽകുന്ന ലാഭേച്ഛയില്ലാത്ത സ്ഥാപനങ്ങളും (NPISH) നടത്തുന്ന ചെലവ്)  200.30 ലക്ഷം കോടി രൂപയായി വർദ്ധിപ്പിക്കാൻ അവകാശപ്പെടുന്ന ഒരു ലക്ഷം കോടി രൂപയുടെ നികുതി ഇളവ് (യഥാർത്ഥ ആഘാതം 25,000 കോടി രൂപയിൽ കൂടുതലാകണമെന്നില്ല) പര്യാപ്തമല്ല (NSO; അഡ്വാൻസ് ജിഡിപി 2024-25 പത്രക്കുറിപ്പ്).

യഥാർത്ഥ ഉപഭോഗപ്രേരകം ജനങ്ങളുടെ യഥാർത്ഥ വരുമാനമാണ്. അവിടെ കഥ വളരെ മോശമാണ്.

2024-25 ലെ സാമ്പത്തിക സർവേ (പട്ടിക XII; പേജ് 378-379) ഇന്ത്യയിലെ തൊഴിലാളി വർഗ്ഗത്തിന്റെ യഥാർത്ഥ വരുമാനത്തിലെ പ്രവണതകൾ കാണാം. 2017-18 നും 2022-23 നും ഇടയിൽ, സ്ഥിര വേതന/ശമ്പളക്കാരായ തൊഴിലാളികളുടെ യഥാർത്ഥ വരുമാനം, പുരുഷന്മാർക്ക് പ്രതിമാസം 12,665 രൂപയിൽ നിന്ന് 11,858 രൂപയായും സ്ത്രീകൾക്ക് പ്രതിമാസം 10,116 രൂപയിൽ നിന്ന് 8,855 രൂപയായും കുറഞ്ഞു. സ്വയം തൊഴിൽ ചെയ്യുന്ന തൊഴിലാളികളുടെ കാര്യത്തിൽ, ഇത് പുരുഷന്മാർക്ക് പ്രതിമാസം 9,454 രൂപയിൽ നിന്ന് 8,591 രൂപയായും സ്ത്രീകൾക്ക് പ്രതിമാസം 4,348 രൂപയിൽ നിന്ന് 2,950 രൂപയായും കുറഞ്ഞു. നിർഭാഗ്യവതികളായ സ്വയം തൊഴിൽ ചെയ്യുന്ന വനിതാ തൊഴിലാളികളുടെ നാമമാത്ര വരുമാനം പോലും ഈ കാലയളവിൽ പ്രതിമാസം 5,935 രൂപയിൽ നിന്ന് 5,497 രൂപയായി കുറഞ്ഞു.

ഇന്ത്യയിലെ 65 കോടി തൊഴിലാളികളിൽ ഏകദേശം 20 ശതമാനം, അതായത് ഏകദേശം 12 മുതൽ 13 കോടി വരെ തൊഴിലാളികളാണ് സ്ഥിര വേതന/ശമ്പള വരുമാനമുള്ള തൊഴിലാളികൾ. അവരുടെ യഥാർത്ഥ വരുമാനം കുറയുന്നത് ധനമന്ത്രി അനുവദിച്ച ആദായനികുതി ഇളവുകൾ കൊണ്ട് നികത്താൻ കഴിയില്ല, കാരണം അവരിൽ ഭൂരിഭാഗവും നികുതിദായകരിൽ ഉൾപ്പെടാൻ ആവശ്യമായ വരുമാനം നേടുന്നില്ല എന്നതാണ്.

തീർച്ചയായും, ധനമന്ത്രി ബജറ്റിൽ പ്രഖ്യാപിച്ച ആദായനികുതി ഇളവുകൾ നഗരപ്രദേശങ്ങളിലെ ഉയർന്ന വരുമാനക്കാരായ മധ്യവർഗ നികുതിദായകർക്ക് കൂടുതൽ ആശ്വാസം നൽകും. എന്നിരുന്നാലും, അത് ഇന്ത്യയിലെ മധ്യവർഗത്തിന്റെ ഒരു ചെറിയ ഭാഗം മാത്രമാണ്. ഇന്ത്യയിലെ ബഹുഭൂരിപക്ഷം ജനങ്ങൾക്കും, ഈ ഇളവുകൾ അവരുടെ ഉപഭോഗ നിലവാരത്തെ ഒരു തരത്തിലും സഹായിക്കില്ല.

• 
   മുൻ ധനകാര്യ, സാമ്പത്തിക കാര്യ സെക്രട്ടറിയാണ് സുഭാഷ് ചന്ദ്ര ഗാർഗ്