scorecardresearch
Latest News

വ്ലാഡിമർ പുടിൻ ഇന്ത്യയിലേക്ക്; എസ് 400 മിസൈൽ കരാർ പ്രധാനം

റഷ്യയിൽ നിന്ന് എസ് 400 മിസൈൽ ഇന്ത്യ വാങ്ങുന്നതിൽ അമേരിക്കയ്ക്ക് അതൃപ്തിയുണ്ട്

വ്ലാഡിമർ പുടിൻ ഇന്ത്യയിലേക്ക്; എസ് 400 മിസൈൽ കരാർ പ്രധാനം

ന്യൂഡൽഹി: രണ്ട് ദിവസത്തെ സന്ദർശനത്തിനായി റഷ്യന്‍ പ്രസിഡന്റ് വ്ലാഡിമര്‍ പുടിനും റഷ്യൻ ഉന്നതതല സംഘവും ഇന്ന് ഇന്ത്യയിലെത്തും. എസ് 400 മിസൈല്‍ കരാറടക്കം 20 ഓളം പ്രധാന കരാറുകളിൽ ഇന്ത്യയും റഷ്യയും ഒപ്പുവയ്ക്കും. വെളളിയാഴ്ചയാണ് പുടിൻ-മോദി കൂടിക്കാഴ്ച.

500 കോടി ഡോളറിന്റെ ആയുധകരാറാണ് ഇന്ത്യയും റഷ്യയും തമ്മില്‍ ഒപ്പിടാനായി പോകുന്നത്. റഷ്യയുടെ എസ് 400 മിസൈലുകളില്‍ അഞ്ചെണ്ണം വാങ്ങിക്കാനാണ് ഇന്ത്യ ഉദ്ദേശിക്കുന്നത്. ലോകത്തിലെ ഏറ്റവും കരുത്തുറ്റ പ്രതിരോധ സംവിധാനങ്ങളിലൊന്നായ എസ് 400 ട്രയംഫ് 2015 ല്‍ സിറിയയില്‍ റഷ്യയുടെയും സിറിയയുടെയും നാവിക, വ്യോമയാന സംവിധാനങ്ങളെ സംരക്ഷിക്കാനായി നിയോഗിച്ചിരുന്നു.

എസ് 400 മിസൈലുകള്‍ വാങ്ങാനുള്ള ഇന്ത്യയുടെ നടപടിയില്‍ അമേരിക്കയ്ക്ക് കടുത്ത അതൃപ്തിയുണ്ട്. എന്നാൽ ആണവ-ബഹിരാകാശ-സാമ്പത്തിക മേഖലകളിൽ 20 കരാറുകളാണ് ഇന്ത്യയും റഷ്യയും ഒപ്പുവയ്ക്കുന്നത്. റഷ്യയുമായി പ്രതിരോധ ഇടപാടുകള്‍ നടത്തുന്നതിലൂടെ ഉപരോധം ഏര്‍പ്പെടുത്താതിരിക്കാനുള്ള നീക്കങ്ങള്‍ ഇന്ത്യ നടത്തിയതായാണ് വിവരം.

മിസൈല്‍ കരാറിന് പുറമെ റഷ്യയും ഇന്ത്യയും തമ്മിലുള്ള ചെറുകിട ഇടത്തരം സംരംഭങ്ങളുടെ മേഖലയിലെ സഹകരണ കരാറും പുടിന്റെ സന്ദര്‍ശനവേളയില്‍ ഒപ്പിടും. റോഡ് ഗതാഗത വ്യവസായ രംഗത്തെ സഹകരണത്തിലും റഷ്യയുമായി നയതന്ത്രകരാര്‍ ഒപ്പിടുന്നുണ്ട്.

Stay updated with the latest news headlines and all the latest News news download Indian Express Malayalam App.

Web Title: Vladimar putin two day visit to india starts today likely to sign 20 agreements