യുഎസ്-ഇറാൻ സംഘർഷം രൂക്ഷമാകുന്നു: വ്യോമാക്രമണത്തിന് ഒരുങ്ങി ട്രംപ്; തിരിച്ചടിക്കുമെന്ന് ടെഹ്റാൻ

വാഷിംഗ്ടൺ/ടെഹ്റാൻ: പശ്ചിമേഷ്യയിൽ യുദ്ധഭീതി വിതച്ചുകൊണ്ട് യുഎസ്-ഇറാൻ സംഘർഷം നിർണായക ഘട്ടത്തിലേക്ക്. വരാനിരിക്കുന്ന ആണവ ചർച്ചകൾ പരാജയപ്പെട്ടാൽ ഇറാനെതിരെ പരിമിതമായ സൈനിക നടപടി  സ്വീകരിക്കുന്ന കാര്യം ഗൗരവമായി പരിഗണിക്കുകയാണെന്ന് അമേരിക്കൻ പ്രസിഡന്റ് ഡൊണാൾഡ് ട്രംപ് വ്യക്തമാക്കി. ഇതോടെ മേഖലയിൽ വൻ സൈനിക വിന്യാസമാണ് അമേരിക്ക നടത്തുന്നത്.

Also Read:ആണവ ചർച്ചകളിൽ ഇറാനും അമേരിക്കയും തമ്മിൽ ധാരണ; ട്രംപിന്റെ നിബന്ധനകൾ അംഗീകരിക്കാൻ ഇറാൻ തയ്യാറാകുന്നില്ലെന്ന് വാൻസ്

വ്യാഴാഴ്ച ജനീവയിൽ നടക്കാനിരിക്കുന്ന നിർണായക ചർച്ചകൾക്ക് മുന്നോടിയായാണ് ട്രംപിന്റെ മുന്നറിയിപ്പ്. ഇറാൻ മാന്യമായ ഒരു കരാറിന് തയ്യാറാകണമെന്നും അല്ലാത്തപക്ഷം പ്രത്യാഘാതങ്ങൾ നേരിടേണ്ടി വരുമെന്നും ട്രംപ് പറഞ്ഞു. മെഡിറ്ററേനിയൻ കടലിൽ യുഎസ്എസ് ജെറാൾഡ് ആർ. ഫോർഡ്, യുഎസ്എസ് എബ്രഹാം ലിങ്കൺ എന്നീ രണ്ട് വിമാനവാഹിനിക്കപ്പലുകളെ വിന്യസിച്ചുകൊണ്ട് 2003-ന് ശേഷമുള്ള ഏറ്റവും വലിയ സൈനിക ശക്തിയാണ് അമേരിക്ക മേഖലയിൽ ഒരുക്കിയിരിക്കുന്നത്.

നയതന്ത്ര കാര്യാലയങ്ങൾ ഒഴിപ്പിക്കുന്നു

സുരക്ഷാ മുൻകരുതലിന്റെ ഭാഗമായി ബെയ്റൂട്ടിലെ യുഎസ് എംബസിയിൽ നിന്ന് അടിയന്തര പ്രാധാന്യമില്ലാത്ത ജീവനക്കാരെ പിൻവലിക്കാൻ സ്റ്റേറ്റ് ഡിപ്പാർട്ട്മെന്റ് ഉത്തരവിട്ടു.പരിമിതമായ ആക്രമണം എന്ന വാഷിംഗ്ടണിന്റെ വാദത്തെ ഇറാൻ തള്ളി.

ഏത് തരത്തിലുള്ള പ്രകോപനമുണ്ടായാലും അതിശക്തമായി തിരിച്ചടിക്കുമെന്നും മേഖലയിലെ യുഎസ് സൈനിക കേന്ദ്രങ്ങൾ തങ്ങളുടെ ലക്ഷ്യങ്ങളാണെന്നും ഇറാന്റെ പരമോന്നത നേതാവ് ആയത്തുള്ള അലി ഖമനേയി മുന്നറിയിപ്പ് നൽകി.

Also Read:ഇറാനിൽ യുദ്ധഭീതി; ഉടൻ രാജ്യം വിടാൻ ഇന്ത്യൻ പൗരന്മാർക്ക് നിർദേശം

അതിനിടെ, മധ്യ ഇറാനിലെ ഇസ്ഫഹാൻ പ്രവിശ്യയിൽ സൈനിക ഹെലികോപ്റ്റർ തകർന്ന് വീണ് നാല് പേർ കൊല്ലപ്പെട്ടു. കൂടാതെ, അമേരിക്കൻ ഭീഷണി നിലനിൽക്കെ ചൈനയിൽ നിന്ന് അത്യാധുനിക സൂപ്പർസോണിക് കപ്പൽ വിരുദ്ധ മിസൈലുകൾ വാങ്ങാനുള്ള നീക്കത്തിലാണ് ടെഹ്റാൻ എന്നും റിപ്പോർട്ടുകളുണ്ട്.

Also Read:ഇറാനിൽ വീണ്ടും സർക്കാർ വിരുദ്ധ പ്രക്ഷോഭം; തെരുവുകളിൽ വൻ പ്രതിഷേധവുമായി വിദ്യാർത്ഥികൾ

ഇറാനിലെ സർവ്വകലാശാലകളിൽ ഭരണകൂട വിരുദ്ധ പ്രക്ഷോഭങ്ങൾ ശക്തമാകുന്നതിനിടെയാണ് അന്താരാഷ്ട്ര തലത്തിൽ ഇത്തരമൊരു സൈനിക നീക്കം നടക്കുന്നത് എന്നത് സ്ഥിതിഗതികൾ കൂടുതൽ സങ്കീർണ്ണമാക്കുന്നു.

ഇന്ത്യൻ പൗരന്മാർക്ക് നിർദ്ദേശം

സംഘർഷം രൂക്ഷമായ സാഹചര്യത്തിൽ ഇറാനിലുള്ള ഇന്ത്യൻ പൗരന്മാർ എത്രയും വേഗം രാജ്യം വിടണമെന്ന് ഇന്ത്യൻ എംബസി നിർദ്ദേശിച്ചു. ജമ്മു കശ്മീർ മുൻ മുഖ്യമന്ത്രി ഫാറൂഖ് അബ്ദുള്ളയും ഇറാനിൽ പഠിക്കുന്ന വിദ്യാർത്ഥികളോട് ഉടൻ മടങ്ങാൻ അഭ്യർത്ഥിച്ചു.

Read More: യുഎസുമായി ചർച്ചയ്ക്ക് തയ്യാറാണെന്ന് ഇറാൻ; മിസൈൽ പദ്ധതികളിൽ വിട്ടുവീഴ്ചയില്ലെന്ന് വിദേശകാര്യമന്ത്രി