ന്യൂഡൽഹി: വിവാദ പരാമർശത്തിൽ പാർലമെന്രിൽ ക്ഷമ ചോദിച്ച് കേന്ദ്രമന്ത്രി അനന്ത് കുമാർ ഹെഗ്ഡെ. ഭരണഘടനയാണ് പരമോന്നതം. ഇന്ത്യൻ പൗരനെന്ന നിലയിൽ ഭരണഘടനയ്ക്ക് എതിരെ പോകാൻ കഴിയില്ല. ഭരണഘടനയെ ബഹുമാനിക്കുന്നുവെന്നും അനന്ത് കുമാർ ഹെഗ്ഡെ പറഞ്ഞു. കേന്ദ്രമന്ത്രി ക്ഷമ ചോദിച്ചതോടെ ലോക്‌സഭയിൽ പ്രതിപക്ഷം പ്രതിഷേധം അവസാനിപ്പിച്ചു. ‘മതനിരപേക്ഷത’ എന്ന പദം ഭരണഘടനയിൽനിന്നും ഒഴിവാക്കണമെന്നായിരുന്നു കേന്ദ്രമന്ത്രിയുടെ പ്രസ്താവന.

അനന്ത്‌കുമാര്‍ ഹെഗ്ഡെ നടത്തിയ വിവാദപരാമര്‍ശത്തിന്‍റെ പേരില്‍ പാര്‍ലമെന്‍ററിലെ ഇരുസഭകളും ഇന്നലെ സ്തംഭിച്ചിരുന്നു. പ്രതിപക്ഷ കക്ഷികള്‍ അനന്ത്കുമാറിനെ മന്ത്രിസഭയില്‍ നിന്നും പുറത്താക്കണം എന്ന ആവശ്യമുന്നയിച്ച് പ്രതിഷേധിച്ചു. അനന്ത്കുമാറിനെ മന്ത്രിസ്ഥാനത്ത് നിന്നും പുറത്താക്കണം എന്നാവശ്യമുന്നയിച്ചു സഭയുടെ നടുത്തളത്തില്‍ ഇറങ്ങിയ കോണ്‍ഗ്രസ് നേതാക്കള്‍ “അംബേദ്കറിനെ അപമാനിക്കുന്നത് ഞങ്ങള്‍ അനുവദിച്ചു തരില്ല” എന്നും മുദ്രാവാക്യം മുഴക്കി. ലോക്‌സഭയില്‍ കോണ്‍ഗ്രസ് നേതാവ് മല്ലികാര്‍ജുന്‍ കാര്‍ഘെയാണ് വിഷയം ഉന്നയിച്ചത്. രാജ്യസഭയില്‍ വിഷയമുന്നയിച്ച കോണ്‍ഗ്രസ് നേതാവ് ഗുലാം നബി ആസാദ് ഹെഗ്ഡെയ്ക്ക് ” പാര്‍ലമെന്റില്‍ തുടരാനുള്ള അവകാശമില്ല” എന്നും പറഞ്ഞു.

കര്‍ണാടകത്തിലെ കൊപ്പാലില്‍ നടന്ന ബ്രാഹ്മണ യുവ പരിഷത്ത് യോഗത്തില്‍ സംസാരിക്കുമ്പോഴാണ് കേന്ദ്രമന്ത്രി ഭരണഘടനയെ മാറ്റുന്നതിനെക്കുറിച്ച് പരാമര്‍ശിക്കുന്നത്. പൗരന്മാര്‍ മതേതരരാകരുത്, അവര്‍ തങ്ങളുടെ ജാതിയുടേയും മതത്തിന്‍റെയും പേരില്‍ തിരിച്ചറിയപ്പെടണം എന്നും അതിനനുസരിച്ച് ഭരണഘടന മാറ്റാനാണ് തങ്ങള്‍ ഇവിടെയുള്ളത് എന്ന് കേന്ദ്രമന്ത്രി പറഞ്ഞു.

”മതേതരര്‍ എന്നും പുരോഗമനവാദികള്‍ എന്നും സ്വയം വിശേഷിപ്പിക്കുന്നവര്‍ സ്വന്തം മാതാപിതാക്കളുടെ രക്തം തിരിച്ചറിയാത്തവരാണ്. അത്തരം തിരിച്ചറിയലുകളിലൂടെയാണ് ഒരാള്‍ക്ക് ആത്മാഭിമാനം ഉണ്ടാകുന്നത്” എന്ന് പറഞ്ഞ അനന്ത്കുമാര്‍ ഹെഗ്ഡെ, ഓരോരുത്തരും മുസ്ലീം ആയും ക്രിസ്ത്യാനിയായും ബ്രാഹ്മണനായും ലിങ്കായത് ആയും ഹിന്ദുവായും തിരിച്ചറിയുകയാണെങ്കില്‍ താന്‍ സന്തുഷ്ടനാണ് എന്നും അഭിപ്രായപ്പെട്ടിരുന്നു. “പക്ഷെ അവർ മതേതരരാണ് എന്ന് പറയുന്നിടത്താണ് പ്രശ്നങ്ങൾ ഉണ്ടാകുന്നത്.” നൈപുണ്യ വികസനത്തിന്‍റെയും സംരംഭകത്വത്തിന്‍റെയും ചുമതല വഹിക്കുന്ന കേന്ദ്രമന്ത്രി പറഞ്ഞു.

Get Malayalam News and latest news update from India and around the world. Stay updated with today's latest News news in Malayalam at Indian Expresss Malayalam.

ഏറ്റവും പുതിയ വാർത്തകൾക്കും വിശകലനങ്ങൾക്കും ഞങ്ങളെ ഫെയ്സ്ബുക്കിലും ട്വിറ്ററിലും ലൈക്ക് ചെയ്യൂ