കോണ്‍ഗ്രസ് പാളയത്തില്‍ ചാണക്യതന്ത്രം; അമിത് ഷായെ കണ്ടതിന് പിന്നാലെ ഗോവയില്‍ രണ്ട് എംഎല്‍എമാര്‍ കോണ്‍ഗ്രസ് വിട്ടു

ന്യൂഡല്‍ഹി: ഗോവയില്‍ രണ്ട് കോണ്‍ഗ്രസ് എംഎല്‍എമാര്‍ പാര്‍ട്ടി വിട്ടു. ചൊവ്വാഴ്ച ന്യൂഡല്‍ഹിയിയില്‍ ബിജെപി അദ്ധ്യക്ഷന്‍ അമിത് ഷായുമായി കൂടിക്കാഴ്ച നടത്തിയതിന് പിന്നാലെയാണ് എംഎല്‍എമാര്‍ രാജി പ്രഖ്യാപിച്ചത്. ഇരുവരും ഇന്ന് തന്നെ ബിജെപിയില്‍ ചേരുമെന്നാണ് വിവരം.

ദയാനന്ദ് സോപ്തെ, സുഭാഷ് ശിരോദ്കര്‍ എന്നിവരാണ് കോണ്‍ഗ്രസ് വിട്ടത്. ഇരുവരും അമിത് ഷായെ കാണാനായി തിങ്കളാഴ്ച അര്‍ദ്ധരാത്രിയോടെയാണ് ഡല്‍ഹിയിലെത്തിയത്. തുടര്‍ന്ന് ചൊവ്വാഴ്ച അദ്ദേഹവുമായി കൂടിക്കാഴ്ച്ച നടത്തി. ഇരുവരും ഇന്നലെ ബിജെപിയില്‍ ചേര്‍ന്നേക്കുമെന്ന അഭ്യൂഹങ്ങള്‍ക്കിടെയാണ് രാജി പ്രഖ്യാപിക്കുന്നത്. 'രണ്ട് കോണ്‍ഗ്രസ് എംഎല്‍എമാരും കോണ്‍ഗ്രസ് വിട്ടു. ഇരുവരും താമസിയാതെ ബിജെപിയില്‍ ചേരും,' എന്ന് പിടിഐ റിപ്പോര്‍ട്ട് ചെയ്യുന്നു.

നിലവില്‍ ഗോവ നിയമസഭയില്‍ കോണ്‍ഗ്രസിന് 16 എംഎല്‍എമാരാണുളളത്. രണ്ട് പേര്‍ പോയതോടെ ഇത് 14 ആയി മാറി. ബിജെപിക്ക് 14 എംഎല്‍എമാരാണുളളത്.