Top News Highlights: നടിയെ ആക്രമിച്ച കേസ്: തുടരന്വേഷണത്തിന് കൂടുതല്‍ സമയം ആവശ്യപ്പെട്ട് ക്രൈംബ്രാഞ്ച്

നടിയെ ആക്രമിച്ച കേസിൽ വിചാരണ കോടതിയുടെ കൈവശമുള്ള മെമ്മറി കാർഡിന്റെ ഹാ‍ഷ് വാല്യൂ മൂന്ന് തവണ മാറിയതായി സ്ഥിരീകരിച്ച് ശാസ്ത്രീയ പരിശോധനാ ഫലം. മൂന്ന് കോടതികളുടെ കൈവശമിരിക്കുമ്പോഴും ഹാഷ് വാല്യൂ മാറിയതായാണ് കണ്ടെത്തൽ. തീയതി അടക്കമുള്ള റിപ്പോർട്ടാണ്ലഭിച്ചിരിക്കുന്നത് . റിപ്പോ‍ർട്ട് കോടതിക്ക് കൈമാറി.

ചാവശേരിയിൽ ഉണ്ടായത് തികച്ചും ദൗര്‍ഭാഗ്യകരമായ സംഭവമാണെന്ന് പറഞ്ഞ മുഖ്യമന്ത്രി സ്ഫോടനം നടന്നത് സിപിഎം കേന്ദ്രമാണെന്ന പ്രമേയ അവതാരകന്റെ വാദം തള്ളി. മേഖല എസ് ഡി പി ഐ, പോപ്പുലര്‍ ഫ്രണ്ട്, ആര്‍ എസ് എസ് തുടങ്ങിയ വര്‍ഗീയ സംഘടനകള്‍ക്ക് ചില പോക്കറ്റുകളുള്ള പ്രദേശങ്ങളാണ്. അവര്‍ പരസ്പരം കൊലപാതകങ്ങള്‍ നടത്തിയിട്ടുണ്ട്. അതിന്റെ ഭാഗമായി ആയുധശേഖരണം നടത്തുകയും ചെയ്യാറുണ്ടെന്ന് പൊലീസിന്റെ ശ്രദ്ധയില്‍പ്പെട്ടിട്ടുണ്ട്. കര്‍ശന നടപടികളിലൂടെ അത്തരം വസ്തുക്കള്‍ കണ്ടെത്തി നിര്‍വീര്യമാക്കാനും സമാധാനം സ്ഥാപിക്കാനും തുടര്‍ച്ചയായ ശ്രമങ്ങളാണ് സര്‍ക്കാര്‍ അവിടെ നടത്തുന്നത്. അതിന് കഴിഞ്ഞിട്ടുമുണ്ടെന്നും മുഖ്യമന്ത്രി പറഞ്ഞു. കൂടുതൽ വായിക്കാം.

ശ്രീലങ്കൻ പ്രസിഡന്റ് ഗോട്ടബയ രാജപക്‌സെ രാജ്യം വിട്ടതിന് പിന്നാലെ പ്രതിഷേധം കടുപ്പിച്ച് പ്രക്ഷോഭകർ. പ്രധാനമന്ത്രി റനിൽ വിക്രമസിംഗെയുടെ ഓഫീസിന് സമീപം തടിച്ചു കൂടിയ പ്രതിഷേധക്കാരെ പിരിച്ചു വിടാൻ ശ്രീലങ്കൻ പൊലീസ് കണ്ണീർ വാതകം പ്രയോഗിച്ചതായി ബ്ലൂംബെർഗ് റിപ്പോർട്ട് ചെയ്തു.

ദേശീയപാതയിലെ കുഴികളുമായി ബന്ധപ്പെട്ട് കേന്ദ്രമന്ത്രിമാരെ പരിഹസിച്ച് മന്ത്രി മുഹമ്മദ് റിയാസ്. പൂർത്തിയാകാത്ത പദ്ദതികൾക്ക് മുന്നിൽ നിന്ന് ഫൊട്ടോയെടുത്ത് പോകുന്ന കേന്ദ്ര മന്ത്രിമാർ ദേശീയപാതയിലെ കുഴികൾ കൂടി എണ്ണണമെന്ന് റിയാസ് പറഞ്ഞു. റോഡിന്‍റെ ഭൂരിഭാഗവും പരിപാലിക്കുന്നത് ദേശീയപാത അതോറിറ്റിയെന്നെന്നും മുഹമ്മദ് റിയാസ്‍ പറഞ്ഞു.

ദേശീയ പാതയുടെ അവസ്ഥയെ കുറിച്ച് പലതവണ പരാതിപ്പെട്ടിട്ടും പ്രയോജനമില്ലെന്നും മന്ത്രി പറഞ്ഞു. ഒരു കേന്ദ്രമന്ത്രി ദിവസവും നടത്തുന്ന വാര്‍ത്താസമ്മേളനങ്ങളുടെ എണ്ണത്തേക്കാള്‍ കൂടുതലാണ് കുഴികളെന്നും മന്ത്രി പരിഹസിച്ചു. കേന്ദ്ര വിദേശകാര്യമന്ത്രി എസ് ജയശങ്കർ കഴക്കൂട്ടത്തെ മേല്‍പ്പാലം നിര്‍മാണം വിലയിരുത്തിയതിനെ മുഖ്യമന്ത്രി പിണറായി വിജയന്‍ വിമര്‍ശിച്ചതിന് പിന്നാലെയാണ് റിയാസിന്റെ പരിഹാസം.

2021-2036 കാലഘട്ടത്തിൽ ഇന്ത്യയിലെ പ്രായമായവരുടെ എണ്ണം ഉയരുമെന്നും യുവാക്കളുടെ എണ്ണം കുറയുകയും ചെയ്‌തേക്കുമെന്ന് റിപ്പോർട്ട്. നിലവിൽ ഏറ്റവും കൂടുതൽ ജനസംഖ്യയുള്ള ബീഹാർ, ഉത്തർപ്രദേശ് സംസ്ഥാനങ്ങളിൽ 2021 വരെ യുവാക്കളുടെ ജനസംഖ്യയിൽ വർധനവ് രേഖപ്പെടുത്തിയിരുന്നു. എന്നാൽ ഇനി മുതൽ അത് കുറയുമെന്ന് പ്രതീക്ഷിക്കുന്നതായി സ്റ്റാറ്റിസ്റ്റിക്സ് മന്ത്രാലയം പുറത്തിറക്കിയ ‘യൂത്ത് ഇൻ ഇന്ത്യ 2022’ റിപ്പോർട്ടിൽ പറയുന്നു. കൂടുതൽ വായിക്കാം.

സംസ്ഥാനത്ത് ഇന്ന് ശക്തമായ മഴയ്ക്ക് സാധ്യതയുണ്ടെന്ന് കേന്ദ്ര കാലാവസ്ഥ വകുപ്പിന്റെ മുന്നറിയിപ്പ്. എല്ലാ ജില്ലകളിലും യെല്ലോ അലർട്ട് പ്രഖ്യാപിച്ചിട്ടുണ്ട്. മത്സ്യത്തൊഴിലാളികൾ കടലിൽ പോകരുതെന്ന് നിർദേശമുണ്ട്.

തൃശൂർ തളിക്കുളം ബാറില്‍ ബൈജു എന്ന യുവാവ് കുത്തേറ്റ് മരിച്ച സംഭവത്തില്‍ ഏഴു പേർ അറസ്റ്റിൽ. കാട്ടൂർ സ്വദേശികളായ അജ്മൽ, അതുൽ ,യാസിം, അമിത് ,ധനേഷ് , വിഷ്ണു , അമൽ എന്നിവരാണ് പിടിയിലായത്. ബാർ ജീവനക്കാരൻ നൽകിയ ക്വട്ടേഷൻ ഏറ്റെടുത്താണ് കൊലപാതകം. ബില്ലിലെ തിരിമറി ബാറുടമ കണ്ടു പിടച്ചതിന്‍റെ വൈരാഗ്യമാണ് കൊലയിലേക്ക് നയിച്ചത്. ബാറുടമയുടെ സഹായിയായിരുന്നു കൊല്ലപ്പെട്ട ബൈജു.

സിസിടിവി ദൃശ്യങ്ങളിൽ നിന്നാണ് പ്രതികളെ തിരിച്ചറിഞ്ഞത്. ആക്രമണത്തിൽ ബാറുടമ കൃഷ്ണരാജിന് ഗുരുതരമായി പരുക്കേറ്റു. ബൈജുവിന്‍റെ സുഹൃത്ത് അനന്തുവിനും കുത്തേറ്റു. കൃഷ്ണരാജിനെ കൊച്ചിയിലെയും അനന്തുവിനെ തൃശൂരിലെ ആശുപത്രിയില്‍ പ്രവേശിപ്പിച്ചിരിക്കുകയാണ്.

ഇന്നലെ രാത്രി ഒൻപതരയോടെയാണ് സംഭവം. ബില്ലിൽ കൃത്രിമം കാണിച്ചതിന് ചില ജീവനക്കാരെ ബാറുടമ ശാസിച്ചിരുന്നു. ഇതേച്ചൊല്ലി ജീവനക്കാരും ബാറുടമയും തമ്മിൽ വഴക്കുണ്ടായി. ഇതിനു പിന്നലെയാണ് കൊലപതാകം.

ശ്രീലങ്കൻ പ്രസിഡന്റ് ഗോട്ടബയ രാജപക്‌സെ ബുധനാഴ്ച പുലർച്ചെ രാജ്യം വിട്ടു. വ്യോമസേനാ വിമാനത്തിൽ ഭാര്യയ്ക്കും രണ്ടു സുരക്ഷ ഉദ്യോഗസ്ഥർക്കും ഒപ്പം മാലിദ്വീപിലേക്ക് കടന്നതായി ഇമിഗ്രേഷൻ ഉദ്യോഗസ്ഥനെ ഉദ്ധരിച്ച് വാർത്താ ഏജൻസിയായ അസോസിയേറ്റഡ് പ്രസ് റിപ്പോർട്ട് ചെയ്തു. സമ്മർദത്തെ തുടർന്ന് രാജിവയ്ക്കാൻ രാജപക്‌സെ സമ്മതിച്ചിരുന്നു. ഇന്ന് രാജിവയ്ക്കുമെന്ന പ്രഖ്യാപനവും ഉണ്ടായിരുന്നു അതിനിടയിലാണ് നീക്കം. ശ്രീലങ്കൻ സ്പീക്കർക്ക് ഇതുവരെ പ്രസിഡന്റിന്റെ രാജിക്കത്ത് ലഭിച്ചിട്ടില്ലെന്ന് സ്പീക്കറുടെ ഓഫീസ് അറിയിച്ചു.