ന്യൂഡല്‍ഹി: തെലങ്കാനയില്‍ കോണ്‍ഗ്രസിന് കനത്ത തിരിച്ചടി നല്‍കി 12 എംഎല്‍എമാര്‍. കോണ്‍ഗ്രസ് പാര്‍ട്ടിയെ തെലങ്കാന രാഷ്ട്ര സമിതിയില്‍ (ടിആര്‍എസ്) ലയിപ്പിക്കണമെന്ന് ആവശ്യപ്പെട്ട് 12 എംഎല്‍എമാര്‍ അസംബ്ലി സ്പീക്കര്‍ പി.ശ്രീനിവാസ് റെഡ്ഡിക്ക് കത്ത് നല്‍കി.

119 അംഗ നിയമസഭയില്‍ നിലവില്‍ 18 എംഎല്‍എമാരാണ് കോണ്‍ഗ്രസിനുള്ളത്. അതില്‍ 12 പേരാണ് തങ്ങളെ തെലങ്കാന രാഷ്ട്ര സമിതിയില്‍ ലയിപ്പിക്കണമെന്ന് ആവശ്യപ്പെട്ടിരിക്കുന്നത്. നേരത്തെ കോണ്‍ഗ്രസിന് തെലങ്കാനയില്‍ 19 എംഎല്‍എമാരുണ്ടായിരുന്നു. ലോക്‌സഭാ തിരഞ്ഞെടുപ്പില്‍ വിജയിച്ച കോണ്‍ഗ്രസ് സംസ്ഥാന അധ്യക്ഷന്‍ ഉത്തം കുമാര്‍ റെഡ്ഡി നിയമസഭാ അംഗത്വം രാജിവച്ചതോടെയാണ് അംഗബലം 18 ആയി കുറഞ്ഞത്.

തെലങ്കാനയിലെ തന്ദൂര്‍ മണ്ഡലത്തില്‍ നിന്നുള്ള എംഎല്‍എയും കോണ്‍ഗ്രസ് നേതാവുമായ രോഹിത് റെഡ്ഡി ടിആര്‍എസ് അധ്യക്ഷനും തെലങ്കാന മുഖ്യമന്ത്രിയുമായ കെ.ചന്ദ്രശേഖര റാവുവിന്റെ മകന്‍ കെ.ടി.രാമറാവുവുമായി നേരത്തെ ചര്‍ച്ച നടത്തിയിരുന്നു. ടിആര്‍എസുമായി യോജിച്ച് പോകാനുള്ള താല്‍പര്യം ചര്‍ച്ചയില്‍ പ്രകടിപ്പിക്കുകയും ചെയ്തു. ഇതോടെയാണ് കോണ്‍ഗ്രസ് എംഎല്‍എമാര്‍ ടിആര്‍എസിലേക്ക് ചായ്‌വ് പ്രകടിപ്പിച്ചത്.

Read More: എല്ലാം ആചാരം പോലെ: എംഎല്‍എ സ്ഥാനം രാജിവച്ച കോണ്‍ഗ്രസ് നേതാക്കള്‍ ബിജെപിയിലേക്ക്

ടിആര്‍എസ് നടത്തുന്നത് മോശം രാഷ്ട്രീയമാണെന്ന് ഉത്തം കുമാര്‍ റെഡ്ഡി വിമര്‍ശിച്ചു. ടിആര്‍എസ് നടത്തുന്ന വികസന പ്രവര്‍ത്തനങ്ങളാണ് തങ്ങളെ മാറ്റി ചിന്തിപ്പിച്ചതെന്നാണ് സ്പീക്കര്‍ക്ക് കത്ത് നല്‍കിയ കോണ്‍ഗ്രസ് എംഎല്‍എമാര്‍ പറയുന്നത്.

സ്പീക്കർ എംഎൽഎമാരുടെ ആവശ്യം അംഗീകരിച്ചാൽ കോൺഗ്രസിന് നിയമസഭയിൽ പ്രതിപക്ഷ നേതൃപദവി നഷ്ടമാകും. 12 എംഎൽഎമാരെ നഷ്ടമായാൽ കോൺഗ്രസിന്റെ നിയമസഭയിലെ അംഗത്വം വെറും ആറിലേക്ക് ചുരുങ്ങും. മൂന്നിൽ രണ്ട് അംഗങ്ങളും പാർട്ടി വിടുകയാണെങ്കിൽ കൂറുമാറ്റ നിരോധന നിയമപ്രകാരം നടപടി സ്വീകരിക്കാൻ കഴിയാത്തതും കോൺഗ്രസിന് തിരിച്ചടിയാകും.

Get all the Latest Malayalam News and Kerala News at Indian Express Malayalam. You can also catch all the Latest News in Malayalam by following us on Twitter and Facebook