ന്യൂഡൽഹി: രജനീകാന്തിന്റെ രാഷ്ട്രീയ പ്രവേശനത്തെ പരിഹസിച്ച് ബിജെപി നേതാവ് സുബ്രഹ്മണ്യൻ സ്വാമി. രാഷ്ട്രീയത്തിലേക്ക് കടക്കുന്നുവെന്ന് മാത്രമാണ് രജനി അറിയിച്ചത്. കൂടുതൽ വിശദാംശങ്ങൾ വെളിപ്പെടുത്തിയിട്ടില്ല. ബാക്കിയെല്ലാം മീഡിയ ഹൈപ്പാണ്. രജനീകാന്ത് നിരക്ഷരനാണ്. തമിഴ്നാട്ടിലെ ജനങ്ങൾ ബുദ്ധിയുളളവരാണെന്നും അദ്ദേഹം എഎൻഐയോട് പറഞ്ഞു. തന്റെ രാഷ്ട്രീയ പാർട്ടിയുടെ പേരും മൽസരാർത്ഥികളെയും രജനി പ്രഖ്യാപിക്കട്ടെയെന്നും അതിനുശേഷം താൻ പ്രതികരിക്കാമെന്നും സുബ്രഹ്മണ്യൻ സ്വാമി പറഞ്ഞു.

2019 ലെ ലോക്‌സഭ തിരഞ്ഞെടുപ്പിൽ രജനീകാന്ത് ബിജെപിയെ പിന്തുണയ്ക്കുമെന്ന് സംസ്ഥാന ബിജെപി പ്രസിഡന്റ് ഡോ.തമിളിസൈ സൗന്ദര്യരാജൻ പറഞ്ഞു. അതേസമയം, രജനീകാന്തിന്റെ രാഷ്ട്രീയ പ്രവേശനത്തെ കമൽഹാസൻ സ്വാഗതം ചെയ്തു.

ചെന്നൈയിൽ നടന്ന ആരാധക സംഗമത്തിലാണ് രജനി രാഷ്ട്രീയ പ്രഖ്യാപനം നടത്തിയത്. സ്വന്തം രാഷ്ട്രീയ പാർട്ടി രൂപീകരിക്കുമെന്നും വരുന്ന നിയമസഭാ തിരഞ്ഞെടുപ്പിൽ എല്ലാ സീറ്റുകളിലും മൽസരിക്കുമെന്നും രജനി പറഞ്ഞു. പദവിയോ സ്ഥാനമാനങ്ങളോ മോഹിച്ചല്ല രാഷ്ട്രീയത്തിലേക്ക് കടക്കുന്നത്. വാഗ്‌ദാനം പാലിക്കാനായില്ലെങ്കിൽ 3 വർഷത്തിനുശേഷം രാഷ്ട്രീയത്തിൽനിന്നും പിന്മാറുമെന്നും രജനി അറിയിച്ചു.

രജനിയുടെ രാഷ്ട്രീയ പ്രഖ്യാപനം ആരാധകർ കരഘോഷത്തോടെയാണ് വരവേറ്റത്. തമിഴ്നാട്ടിലെങ്ങും ആരാധകരുടെ നേതൃത്വത്തിൽ ആഘോഷങ്ങൾ നടക്കുകയാണ്.

Get Malayalam News and latest news update from India and around the world. Stay updated with today's latest News news in Malayalam at Indian Expresss Malayalam.

ഏറ്റവും പുതിയ വാർത്തകൾക്കും വിശകലനങ്ങൾക്കും ഞങ്ങളെ ഫെയ്സ്ബുക്കിലും ട്വിറ്ററിലും ലൈക്ക് ചെയ്യൂ