വാഗ്ദാനം മാർബിൾ പ്രതിമ, നൽകിയത് പ്ലാസ്റ്റിക് കൊണ്ട് നിർമിച്ചത്; വിവാദമായി സ്വാതന്ത്ര്യസമര സേനാനിയുടെ സ്മാരകം

ഭോപ്പാൽ: മധ്യപ്രദേശിലെ ഖാർഗോണിൽ ഗോത്രവർഗ സ്വാതന്ത്ര്യസമര സേനാനി താന്ത്യ മാമാ ഭീലിന്റെ പ്രതിമ നിർമ്മാണത്തിൽ ഗുരുതരമായ ക്രമക്കേട്. മാർബിളിലോ കല്ലിലോ നിർമ്മിക്കുമെന്ന് ഉറപ്പുനൽകി സ്ഥാപിച്ച പ്രതിമ പ്ലാസ്റ്റിക് (ഫൈബർ) കൊണ്ട് നിർമ്മിച്ചതാണെന്ന് കണ്ടെത്തി. രാഷ്ട്രീയമായ തിടുക്കവും ഉദ്യോഗസ്ഥരുടെ അനാസ്ഥയും ഒത്തുചേർന്നതോടെ, ഈ പദ്ധതി ഭരണപരമായ പരാജയത്തിന്റെയും അഴിമതിയുടെയും വലിയൊരു ഉദാഹരണമായി മാറിയിരിക്കുകയാണ്.

Also Read:ദൃശ്യ മാധ്യമങ്ങളിൽ വിദ്വേഷ പരാമർശങ്ങൾ വർധിക്കുന്നു; ഞെട്ടിക്കുന്ന കണക്കുകൾ പുറത്ത്

നവംബർ 15-ന് ഗോത്രവർഗ അഭിമാന ദിനം പ്രമാണിച്ച് പ്രതിമ അനാച്ഛാദനം ചെയ്യണമെന്ന രാഷ്ട്രീയ സമ്മർദ്ദമാണ് ഈ വീഴ്ചയ്ക്ക് പിന്നിലെ പ്രധാന കാരണം. ഫണ്ട് അനുവദിച്ച ശേഷം പ്രതിമ നിർമ്മാണം പൂർത്തിയാക്കാൻ വെറും 22 ദിവസത്തെ സമയം മാത്രമാണ് ഖാർഗോൺ നഗരസഭ നൽകിയത്. ഈ ചുരുങ്ങിയ കാലയളവിനുള്ളിൽ നിർമ്മാണം പൂർത്തിയാക്കാൻ ഉദ്യോഗസ്ഥർ കാട്ടിയ അമിതവേഗത ഗുണനിലവാരത്തെ ബാധിച്ചു.

Also Read:ഇൻഡോർ മലിനജല ദുരന്തം: എട്ട് മരണമെന്ന് സർക്കാർ, നഷ്ടപരിഹാരം നൽകിയത് 18 കുടുംബങ്ങൾക്ക്

പ്രതിമ നിർമ്മാണത്തിൽ യാതൊരു മുൻപരിചയവുമില്ലാത്ത സ്ഥാപനത്തിനാണ് നഗരസഭ കരാർ നൽകിയത്. 9.9 ലക്ഷം രൂപയ്ക്കായിരുന്നു കരാർ ഉറപ്പിച്ചത്. പ്രതിമ കല്ലിലോ ലോഹത്തിലോ നിർമ്മിക്കണമെന്ന ജില്ലാ ഭരണകൂടത്തിന്റെ കർശന നിർദ്ദേശം മറികടന്നാണ് ഫൈബർ-റീഇൻഫോഴ്സ്ഡ് പോളിമർ  ഉപയോഗിച്ച് പ്രതിമ നിർമ്മിച്ചത്. കരാർ ഏറ്റെടുത്ത കമ്പനി ഇത് മറ്റൊരു ഏജൻസിക്ക് ഉപകരാർ നൽകുകയായിരുന്നുവെന്ന് പിന്നീട് കണ്ടെത്തി.

സംഭവം വിവാദമായതോടെ കരാർ കമ്പനിയെ കറുത്ത പട്ടികയിൽ ഉൾപ്പെടുത്തുകയും ഉത്തരവാദികളായ ഉദ്യോഗസ്ഥർക്ക് നോട്ടീസ് അയക്കുകയും ചെയ്തിട്ടുണ്ടെന്ന് ഖാർഗോൺ കലക്ടർ ഭവ്യ മിത്തൽ അറിയിച്ചു. ഇതുവരെ കരാറുകാരന് പണം നൽകിയിട്ടില്ലെന്നും അധികൃതർ വ്യക്തമാക്കി.

Also Read:ഡിജിറ്റൽ അറസ്റ്റ് തട്ടിപ്പുകൾക്ക് തടയിടാൻ കേന്ദ്ര സർക്കാരിന്റെ നിർണായക ഇടപെടൽ; വരുന്നു കിൽ സ്വിച്ച്

മധ്യപ്രദേശിലെ വലിയൊരു വോട്ട് ബാങ്കായ ഗോത്രവർഗ വിഭാഗത്തെ പ്രീതിപ്പെടുത്താൻ ബിജെപി സർക്കാർ വലിയ പ്രാധാന്യം നൽകുന്ന ദിനമാണ് ബിർസ മുണ്ടയുടെ ജന്മദിനമായ നവംബർ 15. ഗോത്രവർഗ ഐക്കണുകളെ ആദരിക്കുന്നതിന്റെ ഭാഗമായാണ് താന്ത്യ മാമാ ഭീലിന്റെ പ്രതിമ സ്ഥാപിക്കാൻ തീരുമാനിച്ചത്. എന്നാൽ രാഷ്ട്രീയ ലക്ഷ്യങ്ങൾക്കായി ഭരണകൂടം കാണിച്ച അനാവശ്യ ധൃതി ഒടുവിൽ സർക്കാരിന് വലിയ നാണക്കേടായി മാറിയിരിക്കുകയാണ്.

Read More: റിപ്പബ്ലിക് ദിനാഘോഷം; യൂറോപ്യൻ യൂണിയൻ നേതാക്കൾ മുഖ്യാതിഥികളാകും