Union Budget 2026 : കേന്ദ്ര ബജറ്റ് 2026: ഓഹരി വിപണിയിൽ പ്രത്യേക വ്യാപാരം; നിഫ്റ്റിയും സെൻസെക്സും മാറ്റമില്ലാതെ തുടരുന്നു

Union Budget 2026 Updates: ന്യൂഡൽഹി: കേന്ദ്ര ധനമന്ത്രി നിർമ്മല സീതാരാമൻ 2026-ലെ കേന്ദ്ര ബജറ്റ് പാർലമെന്റിൽ അവതരിപ്പിക്കാനിരിക്കെ, ഇന്ത്യൻ ഓഹരി വിപണികൾ ഇന്ന് പ്രത്യേക വ്യാപാരത്തിനായി തുറന്നു. സാധാരണയായി ശനി, ഞായർ ദിവസങ്ങളിൽ വിപണിക്ക് അവധിയാണെങ്കിലും ബജറ്റ് പ്രഖ്യാപനങ്ങളോടുള്ള തൽസമയ പ്രതികരണം കണക്കിലെടുത്താണ് ബിഎസ്ഇ, എൻഎസ്ഇ  എന്നീ എക്സ്‌ചേഞ്ചുകൾ ഇന്ന് പ്രവർത്തിക്കുന്നത്.

Also Read:കേന്ദ്ര ബജറ്റ് ഇന്ന്; വമ്പൻ പ്രഖ്യാപനങ്ങൾക്ക് കാതോർത്ത് രാജ്യം

ഇന്ന് രാവിലെ വ്യാപാരം ആരംഭിച്ചപ്പോൾ സെൻസെക്സും നിഫ്റ്റിയും വലിയ മാറ്റങ്ങളില്ലാതെയാണ്  മുന്നേറുന്നത്. സെൻസെക്സ് 82,300 പോയിന്റിന് മുകളിലും നിഫ്റ്റി 25,300 പോയിന്റിന് മുകളിലുമാണ് വ്യാപാരം നടത്തുന്നത്.

എന്നാൽ അന്താരാഷ്ട്ര വിപണിയിൽ സ്വർണ്ണത്തിന്റെയും വെള്ളിയുടെയും വിലയിലുണ്ടായ വൻ ഇടിവിനെത്തുടർന്ന് കമ്മോഡിറ്റി വിപണികളിൽ വലിയ തകർച്ച രേഖപ്പെടുത്തി. മൾട്ടി കമ്മോഡിറ്റി എക്സ്‌ചേഞ്ച് , പ്രമുഖ വെള്ളി ഉൽപ്പാദകരായ ഹിന്ദുസ്ഥാൻ സിങ്ക് എന്നിവയുടെ ഓഹരികൾ വ്യാപാരം തുടങ്ങിയ ഉടൻ തന്നെ 10 ശതമാനം ഇടിഞ്ഞ് ലോവർ സർക്യൂട്ടിലായി.

നിക്ഷേപകരുടെ പ്രതീക്ഷകൾ

ധനമന്ത്രി നിർമ്മല സീതാരാമന്റെ ഒമ്പതാമത് ബജറ്റ് പ്രസംഗത്തിൽ നിക്ഷേപകർ പ്രധാനമായും ഉറ്റുനോക്കുന്നത് നികുതി ഇളവുകളാണ്. മൂലധന നേട്ട നികുതി, സെക്യൂരിറ്റീസ് ട്രാൻസാക്ഷൻ ടാക്സ്  എന്നിവയിൽ ഇളവുകൾ ഉണ്ടാകുമോ എന്നത് നിക്ഷേപകർക്ക് നിർണ്ണായകമാണ്.

Also Read:ബജറ്റിന് പിന്നാലെ വിദ്യാർഥികളുമായി ധനമന്ത്രിയുടെ സംവാദം; ഇത്തവണ കേന്ദ്രബജറ്റിന് പ്രത്യേകതകളേറെ

പ്രതിരോധം , റെയിൽവേ, അടിസ്ഥാന സൗകര്യ വികസനം , പൊതുമേഖലാ ബാങ്കുകൾ എന്നീ മേഖലകൾക്ക് ബജറ്റിൽ ലഭിക്കുന്ന വിഹിതം വിപണിയെ സ്വാധീനിക്കും.

നികുതി പരിഷ്കാരങ്ങൾ

സിഗരറ്റുകൾക്ക് ഇന്ന് മുതൽ 40 ശതമാനം പ്രാബല്യത്തിൽ വരുന്ന സാഹചര്യത്തിൽ ഐടിസി  പോലുള്ള ഓഹരികളുടെ നീക്കം ശ്രദ്ധേയമാകും.ഇന്ന് ഞായറാഴ്ചയായതിനാൽ വ്യാപാരം നടക്കുന്നുണ്ടെങ്കിലും സെറ്റിൽമെന്റുകൾക്ക് നിയന്ത്രണമുണ്ട്.

കഴിഞ്ഞ വെള്ളിയാഴ്ച (ജനുവരി 30) വാങ്ങിയ ഓഹരികൾ ഇന്ന് വിൽക്കാൻ സാധിക്കില്ല. അതുപോലെ ഇന്ന് വാങ്ങുന്ന ഓഹരികൾ തിങ്കളാഴ്ച വിൽക്കാനും കഴിയില്ല. ബാങ്കിംഗ് പ്രവർത്തനങ്ങൾക്കും ക്ലിയറിംഗ് സിസ്റ്റങ്ങൾക്കും അവധിയായതിനാലാണ് ഈ നിയന്ത്രണം.

Also Read:കേന്ദ്ര ബജറ്റ് 2026: ആരോഗ്യ മേഖലയ്ക്കുള്ള വിഹിതം ഇരട്ടിയാക്കണമെന്ന് ജൻ സ്വാസ്ഥ്യ അഭിയാൻ; ബജറ്റ് പ്രതീക്ഷകൾ ഇങ്ങനെ

പ്രതിരോധ, റെയിൽവേ തുടങ്ങിയ മേഖലകളിലെ ഓഹരികൾ നിക്ഷേപകരുടെ നിരീക്ഷണത്തിലാണ്. രാവിലെ 11 മണിക്ക് ധനമന്ത്രി ബജറ്റ് അവതരിപ്പിച്ചു തുടങ്ങുന്നതോടെ വിപണിയിൽ വലിയ ചലനങ്ങൾ പ്രതീക്ഷിക്കാം.

Read More:കേന്ദ്ര ബജറ്റ് 2026; എയിംസ് പ്രഖ്യാപനം ഉണ്ടാകുമോ? കുന്നോളം പ്രതീക്ഷയിൽ കേരളം